سەروتاری رێگای كوردستان
لە 20ی ئۆكتۆبەردا هەرێمی كوردستان دەنگیدا. بە پێچەوانەی هەندێ پێشبینی، كە دەكران ڕێژەی دەنگدان گەیشتە 72% كە، ئەمەش ڕەنگدانەوی خەمخۆری خەڵكی كوردستانە بۆ ئەوەی پەرلەمانی خۆی زیندووبكاتەوە، لە ڕەوشێكی سیاسی نائارام و شەڕئامێزی ناوچەكەدا، كە لەوانەیە شەڕی ئیسرائیل و حماس و حزباللەی لوبنان فراوان ببووایە و، كاردانەوە بۆ ئەو درۆن و ڕۆكێتانەی هەبووایە، كە لە لایەن میلیشیاكانی عێڕاق بەكارهێنرا و، ناوەندێكیش لە نەیارانی گەلەكەمان بەخواستەوە چاوەڕێی دواخستنی هەڵبژاردنی پەرلەمانیان دەكرد.
سەرەڕای هەموو كەلێن و كەموكوڕییەكانی بانگەشەی هەڵبژاردن و لەوانە دیاردەی پۆست پۆپۆلیزم، واتە ئەوپەڕی پۆپۆلیزم و بەكارهێنانی پارەی سیاسی و پایەی حوكمڕانی و ورووژاندنی شوناسی لۆكاڵی و پڕوپاگەندە بۆ شارچێتی، كە تێكڕای ئەم بابەتانە لە سەرەتاوە چاوەڕوانكراوبوو و پێشبینی بۆ دەكرا، بەڵام ئەوەی چاوەڕوانكراو نەبوو و، پێشبینی بۆ نەدەكرا، ئەو دەنگانەیە، كە لە كاتی ژماردنی ئاكامەكاندا بە پووچەڵ دانرا‌و، بەگشتی دەگاتە ( ) دەنگ و، ئەم ژمارە زۆرەش لەو دەنگە پۆچەڵكراوانە بە بەراوردكردن لەگەڵ ڕێژەی بەشداری لە دەنگدان حاڵەتێكی ناهاوسەنگ و نائاساییە و جێگای گومانە.
هەڵبژاردن ئەنجامدرا و، گومان لەسەر دیاردەی دەنگی پووچەڵ دروست بوو. بەشێك لە گومانەكەش پەیوەندیی بەوە هەیە، كە هەڵبژاردن بە ئامێری ئەلیكترۆنی ئەنجامدرا، كە ئەم ئامێرانە لە بەشێكی زۆری دەوڵەتە ئەوروپیییەكاندا دوای تاقیكردنەوەی بۆ چەند ساڵێك وازیان لێهێنا و، هەردەم ئەو ئامێرانە ئەگەر بە مەبەست دیزاین نەكرێت، ئەوا ئەگەری هاككردنی هەیە.
بەجێهشتن و فەرامۆشكردنی ئەم گومانە، ڕەوشێكی نەرێنی لە زۆر بواردا دروست دەكات، لەوانە: لاوازی متمانەی خەڵك بە هەڵبژاردن و پاراستنی دەنگەكانی و بە پرۆسەی هەڵبژاردن وەك میكانیزمێكی دیموكراسی و، خوڵقاندنی ڕەوشێكی نەرێنی لە پەیوەندیی نێوان لایەنە سیاسییەكان و، گرفت دروستبوون لە هەوڵەكانی دامەزراندنی كابینەی نوێ.
لەم هەلومەرجەدا یەكەمین هەنگاوی خەمخۆری بۆ هەڵبژاردن و ئاكامەكانی ،ئەنجامدانی وردبینی و لێكۆڵینەوەیە لە بابەتی دەنگە پووچەڵكراوەكان و یەكلاكردنەوەی ئەم بابەتە تەمومژاوییە، كە هاوكاتە لەگەڵ ئەو گوتارانەی ئاماژە بە دەستتێوەردانی دەرەكی لەم بابەتەدا دەكەن.
