دەوڵەت باخچەلی لە كۆبوونەوەی هەفتانەی فراكسیۆنی پارتەكەی لە پەرلەمانی توركیا لە وتارێكدا وتی "چاوەڕێ دەكەین پەیوەندی رووبەڕوو لە نێوان ئیمراڵی و گروپی دەم پارتی بەبێ دواكەوتن بەڕێوەبچێت و بە بڕیارەوە بانگەوازەكەمان دووپات دەكەینەوە".
دەوڵەت باخچەلی سەرۆكی مەهەپە رۆژی ٢٢ـی تشرینی یەكەم داوای لە عەبدوڵا ئۆجەلان، رێبەری زیندانیكراوی پەكەكە كرد كە "بێتە پەرلەمانی توركیا و لە كۆبوونەوەی فراكسیۆنی دەم پارتی قسە بكات و بڵێت تیرۆر بە تەواوی كۆتاییهاتووە و رێكخراوەكە هەڵوەشێندراوەتەوە". دواتر لە چەند كۆبوونەوەیەكی دیكەی فراكسیۆنی پارتەكە پێداگری لە قسەكانی خۆی كرد.
باخچەلی كە هاوپەیمانی ئاكپارتییە، لەلایەكەوە پێداگرە لەسەر پەیامەكانی بۆ عەبدوڵا ئۆجەلان، لەلایەكی دیكەوە دەڵێت، كۆتاییهاتنی پەكەكە نزیكە و دەم پارتی و جەهەپە تۆمەتبار دەكات بەوەی بە فەرمانی قەندیل دەجوڵێنەوە.
