ئەمە بڵاوبكەوە
FaceBook  Twitter  

دیدێ دیشامپ، راهێنەری هەڵبژاردەی فەرەنسا، بۆ یەكەمجار باسی گەڕاندنەوەی كەریم بنزیمای گۆڵكاری یانەی ریال مەدریدی بۆ ریزەكانی هەڵبژاردەی كەڵەشێرەكان كرد و گوتی "هەمووان دەیانویست كەریم بگەڕێتەوە هەڵبژاردەی وڵاتەكەی".

دوای 6 ساڵ دوورخستنەوە لە هەڵبژاردەی وڵاتەكەی، بەهۆی روودانی كێشەیەك لەنێوان خۆی و ڤالبوینای هاوڕێیدا، كەریم بنزیمای هیڕشبەری یانەی ریال مەدرید لە لایەن دێشامپەوە بانگهێشتی ریزەكانی هەڵبژاردەی فەرەنسا كرایەوە بۆ بەشداریكردن لە یۆرۆی 2020.

دێشامپ لە یەكەم لێدوانیدا، لەو بارەیەوە گوتی "كەریم بنزیمام گەڕاندەوە ریزەكانی هەڵبژاردەكەمان، كاتێك دڵنیابووم لەوەی هیچ كێشەیەك دروست ناكات و كاریگەری لەسەر سەقامگیریی ژووری جلگۆڕینمان نابێت".

دێشامپ هەروەها گوتی "بەڕاشكاوی بنزیما لە ماوەی رابردوودا لە پەیوەندی بەردەوامدا بووە لەگەڵ هاوڕێكانی و لەگەڵ هەڵبژاردەی فەرەنسا یاری لەگەڵ كردوون یان لەو تیپانەی یاری بۆ كردوون، بۆیە ئەو بڕیارەمدا، چونكە دڵنیابووم لەوەی هیچ كێشەیەك لە ناو تیپەكەماندا دروست ناكات".