ئەمە بڵاوبكەوە
FaceBook  Twitter  

خەلەکا دویێ

زوى ب زوى ئەڤ چەندە گەلەک نەبوویە جهێ متمانا دکتاتوران، چونکە دەزگەهێن سیخوریێن وەلاتێن زلهێز ب هن ئاوایان هەلویستێن بەروڤاژى یێن خاپاندنێ دگەل وان بکارتینان، دەستپێکێن سالێن نوتان هێزێن نیف نەتەوى گەلەک توند مامەلە دگەل حکومەتا ئیراقێ دکر، دپشتڕە ژى دگوتە رایەدارێن ئیراقێ نەترسن ئەم دێ گەلەک موناوراتێن لەشکەرى کەین بەس د پلانا مەدا نینە چ دوربان ل وە بدەین، ئێک ژ ئەندامێن پارتا بەعسا گور بگور ژبوى جڤاتەکێ ڤەدگێرا و دگوت: د دەمێن شەرێ کوێتێ دە، قادا نیڤ نەتەوى گەلەک گەف ل حکومەتا ئیراقێ دکرن، ئەڤان گەفان ترس و لەرزەک خستبوویە دناڤا تەخ و توێژێن جڤاکێ دە، خەلک ب گشتى دناڤ سایکولوژیەتەکا خراب دا رۆژێن خوە دەرباسدکرن، جارەکێ پارتا بەعسا گور ب گور ل دەڤەرا ئامێدیێ هەموو کادرویێن خوە ل سەرسنکێ خرڤەکرن و ئەندامەکێ سەرکردایەتیا بەعسیان جڤینەک دگەل وان ئەنجام دا، د جڤینێ دا ئیماژە بهندێ دکر، کو وەلاتێن هەڤپەیمان چ کریارێن سەربازى ناپێکئینن، ئەڤا ئەو دکەن تنێ موناوەرەکا لەشکەریە و تشتەکێ دن نینە، ئەڤجا نەترسن و بلا چ گومانێن وە نەبن، هەر وەسا دگوت ئەڤ ئاخڤتنە وان راستەوخۆ یێن دگەل مەکرى نەکو ئیجتهاد و خواندنا مەیە ژبوى رەوشا سیاسى، بەعسى لسەر ئەڤى بالگەى رحەت د رازان، لەورا ژى گوهداریا کەسەکێ نەکر، هەر ب زرتەکیا خوە مامەلە دگەل بویەران کر، هەما هند زانى جهێن وان یێن ستراتیجى بوونە ئارمانجا لێدانێن سەربازى و مەش و کاروانێن وان د هەموو ملەکێ دە ئیفلیجکر، پشتى ڤێ چەندێ مورالا بەعسیان داکەفت و بەرف نەمانێ گاڤ هاڤێتن، پشتى ئەڤێ رەوشێ یەکەمین داخویانیا بەعسیان ئەو بوو دگوت: (غەدارا غەدر لمەکر).

ئەو هەیبەتا بەعسیان د ماوێن حوکمرانیا خوەدا بنەجهکرى، ب تەمامى بنگەها وێ هاتە هەژاندن، وان بخوە ژى ئێدى باوەرى ب پارتا خوە نەما، کەسێ ئاگەهى لسەر کەسێ نەما، ڤەقەتیانەکا بەرچاڤ کەفتە دناڤ رێزێن وان دە، لسەر ئاستێن جودا جودا ئەو ئاوەرى هاتە پێش، کو جڤاکا نیڤ نەتەوەى جارەکا دن نابیتە پشت و پەنا بو دکتاتوران، ئەڤ خالە بوویە ئەگەرێ هندێ جسارەتەکا خورت لجەم خەلکێ پەیداببیت لهەمبەرى زورلما رژێما دکتاتورى.

فاکتەرێن هندر و ناڤخوەیى:

دەسهەلاتا بەعسییان هند کریارێن هوڤانە ئەنجام دابوون، هەر تاکەکێ (ئیراقى، کوردستانى) د هندرێ خوە دە خوە ب کەسەکێ بەرهەلستکار د حەسباند، ئەو بویەرێن هاتیە پێش نەیێن سەیربوون بەلکو تشتەکێ چاڤەرێکرى بوون، خەلک ب گشتى لبەندا دەرفەتێن گونجایبوون، داکو ب کریار لهەمبەرى ستەما بەعسیان هەلویستان ئافرینن، ژ ئالیێ تەخ و توێژێن گەل ڤە، ژینگەهەکا هاریکار دهاتە دیتن، ب تایبەتى ژى ل دەڤەرێن کوردنشین، چونکە دەسهەلاتێ ب زهنیەتەکا شوڤینى سەرەدەرى دگەل گەلێ کورد دکر و دخواست نەتەوا کورد وەکە پاشگو بخوە بکاربینن، ئەڤە ژى ژ ئالیێ نەتەوا کورد ڤە نە دهاتە قەبولکرن، چەند ستەما وان زێدە دبوو هند نەرازیبوون دژوارتر دهاتنە پێش.

سەرەراى هەبوونا گەلەک بویەرێن تراژیدى ژى لێ د چ سەردەمان دە، گەلێ مە بێ ئومێد نەبوویە، هەر تم یێن ب مورال بوونە، هەر وەختێ شورەش راستى لێدان و شکەستنان ژى هاتبیتـ، کەسێن تێکوشەر جارەکا دن دەست ب چالاکیان کریە و گورەپانا سیاسى چولنەکریە، تەخ و توێژێن جڤاکێ ب گەلەک رێگان پشتەڤانیا شورەشێن خوە کریە، جڤاکێ مە و تەڤگەرێن خوە بەردەوام دناڤ تێکەلیان دا رەوش بهەڤڕە شوپاندییە.

دەسهەلاتا داگیرکەران ل دەڤەرێن کوردان گڤاشتنێن مەزن لسەر جڤاکێ پەیرەودکرن، خەلک نەچاردکر بکەڤنە دبن باندورا سیاسەتا وان دە، گەلەک شێوازێن فشاران بکارئینان داکو تەخ و توێژێن کومەلگەهێ دویر ل حەز و ڤیانا خوە هن کاران ئەنجامدەن، ئێک ژوان کاران سەپاندنا سیستەمێ چەتەگەریێ بوو دناڤ کوردان دا، ب کریار ئەڤ سیستەمە هاتە جیبەجیکرن، رەنگە ب هزاران کورد تەڤلى ئەڤى سیستەمێ چەتەگەریێ بوون، بەلێ رێژەیەکا گەلەک کێم ب رۆلێ نوکەرى و سیخوریێ رادبوون، ب تەڤایى دلێ وان یێ گرێدایى پرسگرێکا وان یا نەتەوى و نیشتمانى بوو، ئەڤە ب وێ رامانێ کو چ جاران پشت و پەنایێن راستەقینە نەبوونە ژبوى سەرخستنا هێزێن داگیرکەر و نەیارێن کوردان، تنێ وان یێ خواستى دەمێن خوە ببورینن، د خەیالێن وان دە نەبوویە ئەو ب چ رەنگان خزمەتا ئەجیندایێن کوردستانێ بکەن، رژێمێ بخوە ژى هند متمانە بوان نەدهات، لدەمێن پێتڤى داژى هند پشتا خوە بوان ندبەست، تشتێ داگیرکەران دڤیا بهێتە جیبەجیکرن تنێ ئەو بوویە، کو ب چ رەنگان نەبنە پشت و پەنا بۆ شورەش و رێکخستنێن سیاسى یێن کوردان، لگور نێرینا وان ئەڤە بخوە ب دەستکەفتەکێ مەزن دهاتە هەژمارتن.

دەمێن بیرۆکا سەرهەلدانێ هاتیە پێش، ئەو گروپێن بچۆک یێن پارتیزان د چیایێن کوردستانێ دە ب هەماهەنگیا رێکخستنێن نهینى و دەستەکا خەلکێ هندر، هەموو تەخ و توێژێن جڤاکێ دابەزینە سەرشەقامان و سەرهەلدانا سەرتاسەرى دایە دەستپێکرن، کەسێن ب هەست و رامان گرێدایى دەسهەلاتێ ب هێزەکا گەلەک بچوک هاتنە دیتن، ئەو هزرا بەرێ بۆ دەسهەلاتێ دهاتەکرن بوویە بازارەکى دن و گەل خوە لبەرامبەرى ستەما وێ گەلەک مەزن نمایشکر.

هێزا دەولەتێ وەکە دامەزراوە گەلەک یێن مەزن و بەرفرەهبوون، هێزێن پارت و ئالیێن سیاسى هەر تم لهەمبەرى دەولەتێ ب هێزەکا زێدە بچۆک دهاتنە پارڤەکرن، دەما سەرهەلدان هاتیە ڕاگەهاندن هاوکێشە ب تەماى هاتە گوهارتن، ئێدى هێزێن دەولەتێ گەلەک بچۆک بوون د بەرامبەر داژى یێن پارت و ئالیێن سیاسى یێن ئوپوزسیونخواز ب دەهان جاران مەزن بوون، ب ئاسانى ناڤەند و بنگەهێن وێ هاتنە ڕامالین، هەر چەندە کارێکتەرێن دەرەکى هێشت بریارا ژناڤبرنا دەسهەلاتێ نە دابوویە ئیکلایکرن، لێ پێکهاتێن کوردستانێ ب زەلالى بریارا خوە دابوویە ئیکلایکرن، ب چ شێوازن نەدڤیا جارەکا دن ئەو هەلویستێن بێدەنگیێ بکاربینن لهەمبەرى زولم و ستەما ئەوێ دەسهەلاتا زوردار.

کاریگەریا کوچا ملیونى د نیڤ نەتەویکرنا پرسا کورد دە:

باوەریا دەسهەلاتێ گەلەک یا خورت بوویە، کو ب رێکا هێزێ جارەکا دن دەسهەلاتا خوە ڤەگەرینیت و وەکە جاران ئینسیاتیفا خوە بدەتە سەپاندن، بەرسڤا هەرى دژوار یا حکومەتا بەعس بکارئینانا چەکێن پێشکەفتى یێن وى سەردەمى بوون، لێدانا سڤیلان ژى بو وان نە خەمەکا زێدە مەزن بوو، خەلکى ژى باش ویژدانا وێ فامدکر، دزانى تشتێ ژ دەستێن وێ بهێت ئەو کەمترخەمیێ ناکەن، دەستێن هێزێن وێ یێن ڤەکرى بوونە دڤى بیاڤى دا، خەلکێ بێ دودلى پێشبینا بویەرێن تراژیدى ژ هێزێن رژێمێ دکر، دزانى تشتێن کو ممکن بیت ئەو تەخسیریێ ناکەن.

تێبینى: ئەڤ بابەتە ب لاتینى ل گوڤارا دەنگ هەژمارە (121) ل کوردستانا باکور هاتیە بەلاڤکرن.