ئەمە بڵاوبكەوە
FaceBook  Twitter  

بەشی یەكەم

رێكخستنەكانی حزبمان لەناو شاری هەولێر تاكو زستانی 1984 گەلێك فراوان و پەیوەندی توندوتۆڵی لەگەڵ جەماوەر هەبوو، ژمارەیەك كادیری ئازاو نەترس و شارەزا لەكاری حزبی و جەماوەری پەروەردەبوون، و رۆژانە هاوڕێیانی رێكخستنەكان لەجوڵەو چالاكی رێكخراوەییدابوون بە وریاییەكی شۆڕشگێڕانەوە ئەركەكانی حزبیان جێبەجێ دەكرد... رێكخستنەكانی حزبمان لەریزی قوتابیان و لاوان و مامۆستایان و كرێكاران و كاسبكاران بەشێوەیەكی گونجاو لەگەڵ بارودۆخەكەی ئەوسای ناو شاری هەولێر رێكخرابوون، ژمارەیەكی پێویست ماڵی حزبیمان هەبوو بۆ حەوانەوەی كادیرەكانی حزب و ئەنجامدانی ئەرك و كاری حزبی، ماڵەكان بەتەواوی نهێنی بوون و هاموشۆی خزمان و دۆست و ناسراوەكانی خۆیان كەم كردبۆوە، هەروا ماڵە حزبیەكان هیچ كام لە هاوڕێیانی ناو شار هاتوچۆیان نەدەكرد، ئەم بارودۆخە بەردەوام بوو تاكو زستانی 1984 تەواوی ئەندامانی مەفرەزەكەی هاوڕێ (عەباس محمد) كە لەناو شار بوون لەیەك شەودا لەلایەن فەرمانگەی ئەمنی هەولێر گیران، شەڕی دەستەویەخەش لەگەڕەكی عەدالەتی شاری هەولێر لەنێوان پێشمەرگەو پیاوانی ئەمن روویدا، بۆ بەیانی رۆژی دواتر هەواڵی گیرانی هاوڕێیانی پێشمەرگەی حزبمان زۆر بە فراوانی بڵاوكرایەوە، پیاوانی رژێمی بەعس و ئەمنە كوردەكان و (مامۆی خاین) پرۆپاگەندەیان بڵاوكردەوە كە گوایە هاوڕێیان بەرەو ناوچەی سلێمانی رۆیشتوونەو و پەیوەندیان بە هاوڕێ (بەهائەدین)ەوە كردووە... ئەو رووداوە بارودۆخێكی یەكجار نالەبارو دژواری لەناو شاری هەولێر هێنایە پێشەوەو دڵەڕاوكێ و مەترسی زۆری دورست كرد، پیاوانی ئەمن لەناو شاری هەولێر پروپاگەندەی بەرفراوانیان بڵاودەكردەوە كە دەزانین تاوانبار (رەوەند) لەناو شاری هەولێرەو شوێنی لەلای فەرمانگەی ئەمن زاندراوە، لەم رۆژانە لەگەڵ تاوانبار كۆچەر و ئارام دەكوژرێن.. ئێمە بۆ پاراستنی ماڵەكانی حزبیمان و هاوڕێیان بڕیارماندا ئەگەر ناچار و پێویست نەبێت روویان تێنەكەین، هەوڵدەین ماڵی دۆست و هاوڕێی تر بەكاربێنین، بۆ جێبەجێكردنی بڕیارەكە هاموشۆی ماڵە حزبیەكانمان بڕی، رۆژێكیان لەگەڵ هاوڕێ كۆچەر بۆ كارێكی پێویست یەكترمان لەماڵی (حاجی حسن) ی ئامۆزای هاوڕێ كۆچەر گرتەوەو، دوای كەمێك دانیشتن و ئاخاوتن، هاوڕێ كۆچەر دەستی بەپێكەنین و بەخۆشی و بەدەنگی بەرز پێدەكەنی، ووتم هاوڕێ كۆچەر بە چ پێدەكەنی؟ با منیش بزانم بەڵكو پێبكەنم، لەوەڵامدا كۆچەر ووتی: تووشی روداوێكی زۆر سەیر بوومە، ( لەم رۆژانە بیرم كردەوە بچمە ماڵی مامۆستا (تاهیر عەلی) ماڵەكەی لە شوقەكانی ئیسكانە، دوای نوێژی شێوان چوومە ماڵەوەیان، هەركە هاورێ مامۆستا (تاهیر عەلی) چاوی پێمكەوت شاگەشكەبوو، یەكسەر لەباوەشی گرتم و ماچی كردم، زۆر بەگەرمی و خۆشیەوە پێشوازی لێكردم، بەهاوسەرەكەی ناساندنم، دوای ئەوەی پشوێكم دا مامۆستا (تاهیر عەلی) ووتی: دیسان زۆر بەخێربێیت زۆر دڵخۆشم كە ئەمشەو هاتی، چونكە ئەمشەو ئاهەنگی دۆڵمەمان هەیە، دۆڵمە خواردنێكی زۆر خۆشە، ئەگەر دۆڵمەمان هەبێت مانای وایە جەژنە.. مامۆستا چەند جارێك ئەم قسانەی دووبارە كردەوە، هاوڕێ كۆچەر بەردەوام بوو وتی: خۆت دەزانی من حەزم لە دۆڵمە نییە، بەڵام لەبەر دڵی مامۆستا منیش دەموت راستەو دۆڵمە خۆشە، بەڵام ووتم مامۆستا تاهیر وابزانم دۆڵمە نیوەڕۆیان لێدەنرێت، ئێوە بۆ بەشەو دورستتان كردووە؟ لەوەڵامدا مامۆستا ئەوجا ئاهەنگ و خۆشیەكە لێرەیە، پاشان ووتم مامۆستا درەنگە برسیتان نیە بۆ دۆڵمەكە ناینن؟ مامۆستا ووتی با سارد بێتەوە، هەندەی پێنەچوو سفرە دانراو قاپ و ملاك ئامادەكران، هاوسەری مامۆستا تاهیر مەنجەلە دۆڵمەكەی لەنزیك مامۆستا داناو منداڵەكان شوێنی خۆیان گرت و دانیشتن، مامۆستا قۆڵ و باسكی هەڵكرد و مەنجەلی دۆڵمەی لەسەر سنیەكە بەتاڵكردو لەسەرخۆ لەشوێنی خۆی دانیشت، منیش سەیرم كرد بنی دۆڵمەكە گۆشتێكی زۆری تێدابوو، لەدڵی خۆمدا ووتم باشە دەتوانم دۆڵمە نەخۆم و هەندێ گۆشت بخۆم، من لەم بیركردنەوەدابووم مامۆستا بەدەنگێكی بڵند ووتی: یاللا ئاهەنگ دەستی پێ كرد، مامۆستاو هاوسەرەكەی و منداڵەكان هەموو بەیەكەوە پریاندایە سەر سنیەكەو هەندی بڵێیت یەك و دوو هەركەسەو بەشە گۆشتی خۆی برد، دەستیان بەگۆشت خواردن كرد، یەك دەی ووت سێ پشكم بەركەوتووە ئەویتر دەی ووت دوو، مامۆستا ووتی من چوار پشكم بەركەوتووە، گۆشتیان دەخواردو پێدەكەنین، منیش واقم ورمابوو نەمزانی بۆ وایان كرد، لەبەر من بوو یان دۆڵمەكە هەر وا دەخۆن، گۆشتیان خواردو پەنجەیان لێستەوەو سڕیەوە، ئەنجا مامۆستا ووتی: یاللا با دۆڵمە بخۆین، رووی لەمن كردوو ووتی: مامۆستا ناسیح چما ئەتو گۆشتت نەخوارد؟ ووتم مامۆستا گۆشت خواردنی چی، وامزانی شتێك روودەدات بۆیە واتان كرد، فێڵتان لێكردم، بەمنتان نەووت ئاهەنگی دۆڵمە خواردن بەم شێوەی ئێوەیە، ئەگەر نا لەم هەموو گۆشتە شتێكم هەر بەردەكەوت، بەناچاری دۆڵمەم خوارد، هەموویان هەرپێدەكەنین و دۆڵمەیان نۆشكرد).

لەرۆژی 3/9/1983 دەبوو كۆبونەوەی لیژنەی شاری هەولێر گرێبدەین، بەڵام نەماندەتوانی ئەندامەكانی لیژنەكە هەموو بەیەكەوە كۆببینەوە، دەبوو جارێك لەگەڵ هاوڕێ (كەریم عەزیز) و مامۆستا (ئەحمەد شێخۆ) كۆببمەوەو جارێكیش لەگەڵ هاوڕێ (كۆچەر و ئارام)، بارودۆخەكە وای دەخواست، لەگەڵ هاوڕێ كۆچەر و ئارام رێككەوتین شەوی 3/9/1983 بۆ كۆبوونەوە بچینە ماڵی هاوڕێ محمد مەولود لەگەڕەكی سەداماوە بوو، شوێنی ماڵەكە باش بوو، هاوڕێ (محمد مەولود) لەكارگەی جگەرەی هەولێر كرێكار بوو، منداڵی گەورەی نەبوو، هاتوچۆ بۆ ماڵەكەی زۆر كەم یان نەبوو، خانووەكەی هاوڕێ محمد لەسەر سەد مەتری دووجت دروست كرابوو، رۆژهەڵاتیش بوو، لەكاتی دیاریكراودا لەماڵەكە ئامادەبووین و دەستمان بە كۆبونەوە كرد، درەنگ داهات، ووتم ئێمە شوێنەكەمان ئاشكرا نەبووە، بۆیە بەباشی دەزانم بەیانی هەر لێرەبین پارێزراو دەبین، هاوڕێ كۆچەر ووتی : ئاخۆ جێگای ئێمە دەبێت، باشترە لەگەڵ هاوڕێ محمد قسە بكەیت، چونكە خانووەكە زۆر گچكەیە، بیرۆكەی مانەوەمان بەرۆژ لەگەڵ هاوڕێ محمد باسكرد، هاوڕێ محمد) ووتی: زۆرم پێخۆشە لێرە بن و جێگا دەبێت، چووینە ژوورێكی بچوك و خەوتین، بەیانی زوو لەخەو هەڵساین و لەگەڵ هاوڕێ محمد نانمان خواردو ئەو بۆ سەر كار چوو ئێمەش چووینە ژوورەكەی خۆمان، ژوورەكە بە بلۆك دروستكرابوو، گەچكاری نەكرابوو، زەوی و سەقفی ژوورەكە بەچیمەنتۆ دروست كرابوو، پانكەو موبەریدەی نەبوو، خواردنی نیوەڕۆشمان لەگەڵ دۆلكەك ئاو بۆ دانرابوو، پاڵكەوتین، هیچ هاتوچۆ لەناو حەوشەكە نەبوو لەبەر ئەوەی رەمەزان بوو، هاوسەری هاوڕێ محمد لەگەڵ منداڵەكانی لەژووری خۆیان بوون و باش بوو مەبەریدەریان هەبوو، كاتژمێر بووە 10ی بەیانی رۆژ بەرز بۆوەو ژوورەكە زۆر گەرم بوو، ووتمان چارە نیە دەبێت بەرگەی بگرین، بێدەنگ بووین و گەرماكەی هەر زیاد دەبوو، ووتمان با دەرگا بكەینەوە، تا كاتژمێر یەكی دوای نیوەڕۆ هەر لەژوورەكە بەرگەمان گرت، پاشان رێككەوتین كەچەند تەنەكە ئاوێك بێنین و ژوورەكە ئاو رشێن بكەین، ئاو لەحەوشەكە هەبوو، ئاومان هێناو زەوی و دیوارو سەقفەكەمان ئاوڕشێن كرد، ئەوەندەی پێنەچوو ئاوەكە بووە هەڵم و ژوورەكە وەكو گەرماوی مۆدەی جارانی هەولێری لێهات، لەژوورەوە ئەستەم بوو بەرگە بگرین، بۆیە هاتینە دەرەوەی ژوورەكە چوینە ژێر هەیوانە بچوكەكە لەوەش دەترساین منداڵەكان بەئاگابێن و بترسێن، جلەكانمان لەبەركردەوەو تەنیا فانیلەو شەرواڵمان لەبەر دابوو، مانەوەمان لەدەرەوەی ژوورەكە پێ باش نەبوو، بۆیە چووینەوە ژوورەكەو بە جلەكانمان هەندێ باوەشێنمان لەژوورەكە كرد، هەڵمەكە كەم بۆوەو دانیشتین، هاوڕێ كۆچەر ووتی زۆر گەرمایە با شەرواڵەكانمان لەبەر بكەینەوە، لەولاوە هاوڕێ (ئارام) ووتی: باشە ئەگەر شەرواڵمان لەبەر نەبێت ومەفرەزەی ئەمن بەسەرماندا بدات ، بەرووتی شەڕ بكەین و بكوژرێین، خەڵك چ دەڵێت؟ لەوانەیە بڵێن ئەو سێ كەسە شێت بوونە پێشمەرگە نینە، پێشمەرگە چۆن بەرووتی دەبێ! كەس نازانێت ، ئێمە چیمان بەسەرهاتووە؟

دەوروبەری كاتژمێر چواری ئێوارە گەرماكە كەمێك كەم بۆوەو ئێمە خۆمان ئامادەكردەوەو هاوڕێ محمد لەكار گەڕایەوەو هەواڵمانی پرسی و ووتی گەرماتان نەبوو؟، پێویستە موبەریدەیەك بكڕم، وتم هاوڕێ محمد ئەگەر لەبەر ئێمە موبەریدە دەكڕی پێویست ناكات و ئاوو هەوا بەرەو فێنكیەو لەمەودوا پایزە...

 

  • 1