ئەمە بڵاوبكەوە
FaceBook  Twitter  

  

نووسینی: د.چواس حسن

--------------------------

لەسەروبەندی ساڵیادی سێ ساڵەی ڕووداوی گەورەی مێژوویی ڕیفراندۆمی 25 ئەیلولی 2017، سەرۆك بارزانی بە كتێبێ (بۆ مێژوو) شكۆی ئەو یادە گەورەیەی ڕاگرت و پشكۆی یادەوەریی رووداوەكانی لە دڵی هەموو ئازادییخوازێكی كوردستاندا گەشاندەوە.

دەركردنی كتێبەكە لەدوای تێپەڕبوونی تەنها سێ ساڵ بەسەر ڕووداوەكەدا، هەرچەندە ناونیشانەكەی (بۆ مێژوو)ش بێت، دەلالەتێكی قوڵتر وەك لە تەنها كتێبێكی یادەوەری یان شیكاریی مێژوویی لێ دەخوێندرێتەوە، بەڵكو پێمان دەڵێت كە ڕیفراندۆم هەرچەند ڕووداوێكی مێژووییە، بەڵام مێژوونیە بەڵكو داهاتوویە. ئەوەش بەڕێگەی ئەوەی كە ڕاستیەكانی ئەو ڕووداوە تا درەنگ نیە بخرێنەڕوو، بۆ ئەوەی بەشداریەكی كارا لەو گفتوگۆیەدا بكەن كە تا ئێستاش لەسەر رەهەندەكانی دەكرێت، هەروەها بۆ ئەوەی ئەو تەمە بڕەوێنێتەوە كە هەندێك بەئەنەقەست و بەمەبەستی شاردنەوەی ڕووی ڕاستەقینەی خۆیان، پێگەی لاوازیی مێژووییان لەو ڕووداوەدا، دەیانەوێت بەسەر ئەو سەردەمەیدا بكێشن، بگرە خوازیارن لە كارەساتێكدا ئەو ڕووداوە وون ببێت و لەبیرەوەریی هەموو تاكێكی كوردستانی دەربكەن.

بەو مانایەی كتێبی (بۆ مێژوو) بەشێكە لە كێشمەكێشە هزریەكەی دوای ڕیفراندۆم، ئەو كێشمەكێشەی كە لەمەودوا بەردەوام دەبێت، نەك لەسەر ئەوەی كە ڕیفراندۆم كاتی بوو یان نا؟ یاسایی بوو یان نا؟ پێوویست بوو یان نا؟ بەسوود بوو یان نا؟ بەڵكو لەبارەی كێشمەكێشە سەرەكیەكەی كە كوردستان مافی هەیە سەربەخۆ بێت یان نا؟ كوردستان بۆی هەیە داوای سەربەخۆیی بكات یان نا؟ جا ئەو كێشمەكێشە چەند بەردەوام دەبێت ئەوە داهاتوو دیاری دەكات.

ئەم ووتارەش تەنها بەشداریەكی بچووكە لەسەنگەری ڕیفراندۆمدا، بەشداریەك كە لەهەستی شانازی بەخۆكردنەوەی بەشداری كردن لە ڕووداوەكەدا، ئەگەر بە (بەڵێ)یەكیش بووبێت بۆ سەربەخۆیی كوردستان، خۆی دەنوێنێت، (بەڵێ)یەك بایی ئەوە دەكات كە دەرفەت بداتە هەر كوردستانیەك شانازیەكی مێژوویی لەڕەوتی سەدان ساڵەی خەباتی بزووتنەوەی ڕزگاریخوازیی كوردستانی بۆ خۆی تۆمار بكات.

(بۆ مێژوو) لە نووسەرەكەیەوە:

یەكێك لە خاڵە گرنگەكانی كتێبی بۆ مێژوو، نووسەرەكەیەتی، تەنها لەبەر ئەوەنا كە سەرۆكی گەورەترین پارتی كوردستانی باشورە (پارتی دیموكراتی كوردستان) یان سەرۆكی هەرێمی كوردستان بووە یان ئەوە شەست ساڵە پیشمەرگەیەكی ئازادیخواز و دیموكراسخوازی ڕێچكەی خەباتی كوردستانیانە بۆ وەدیهێنانی مافە ڕەواكانی گەلی كوردستان و دیموكراسی لەعێراقدا یان كوڕی سەركردەیەكی ئەفسانەیی بزووتنەوەی ڕزگاریخوازی كوردستانە (بارزانی نەمر) یان ...هتد، كە هەریەكێك لەو پێگە شۆڕشگێڕی و سیاسی و كۆمەڵایەتیانە بەسن بۆ ئەوەی كە هەر خوێنەرێكی جیددی بەدوای خوێندنەوەی كتێبەكەیدا بگەڕێت، بەڵكو پتر لەبەر ئەوەی كە داڕێژەر و داكۆكیكار و پلان دانەر و جێبەجێكاری یەكەمی ڕووداوی ناوەڕۆكی كتێبەكەیە كە (ڕیفراندۆمی 25 ئەیلول)ە.

نووسەر لە كتێبەكەیدا دەتخاتە ناو ڕووداوەكان، دەتباتەوە گەشتێكی مێژوویی، كە دەگەڕێتەوە لانی كەم بۆ سەد ساڵ لەمەوبەر، گەشتێك بۆ هەموو دابەشكاری و پێشێلكاری و پشتگوێخستن و خۆنەبانكردن و پاشان ستەم و هستریای داگیركەران لەبەرامبەر مافە هەرە سادەكانی گەلی كوردستان لە بوون و ژیان و ئازادی و یەكسانی و هاوتایی لەگەڵ گەلانی دیكەی ناوچەی خۆرهەڵاتی ناوەڕاستدا. دەتباتەوە بۆ ئەو ساتە وەختانەی كە جیهان لەهەمبەر ئەوتاوانانەی كە بەرامبەر بەكورد كران، لەباشترین حاڵیاندا، خۆیان كڕ كرد، ئەگەر نا گەلێك لە زلهێزە جیهانیەكان بەشداریشیان لە خولقاندنی ئەو دۆخەدا كردووە كە كوردستانیان ئێستا لەهەر چوار پارچەی كوردستاندا تێدا دەژین یان سەوداومامەڵەیان بە خەبات و تێكۆشانیەوە كردووە.

ئەوە یەكەم جار نیە كە سەرۆك بارزانی مێژووی خەباتی كوردستانیان دەنووسێتەوە، زۆر دەمێكە خەباتی لانی كەم سەدەی بیستەمی كوردستانیانی لە دووتوێی كتێبە بەناوبانگەكەیدا (بارزانی و بزووتنەوەی ڕزگاریخوازی كورد) نووسیووەتەوە و پێشكەشی كردوە بەمێژووی كوردستان،نەك تەنها لەسۆنگەی نووسینەوەی مێژووی كوردستان بەڵكو لەسۆنگەی ئەوەی كە نووسینەوەی مێژوو بەشداریەكی كارایە لە دروستكردنی داهاتوودا. ئەو زنجیرە كتێبەی مێژووی بنەماڵەیەك (بارزانی) و عەشیرەتێك (بارزانیەكان) و پارتێكی سیاسی (پارتی) و گەلێك (كوردستانی خواروو) هێندە تێكەڵ دەبنەوە، هەندێكجار دەبنەوە بەیەك و بەئەستەم لێك جیادەكرێنەوە، بەشێوەیەك باسكردن لەمێژووی هەر یەكێكیان بەمانای باس كردن لەمێژووی ئەوەی دیكەیان دێت.

كتێبی (بۆ مێژوو) و كتێبەكانی دیكەی بارزانیش، لەو سۆنگەیەوە هاتوون كە دەبێت خۆمان مێژوو بنووسینەوە، چونكە مێژوونووسینەوە تەنها بەدۆكیۆمێنت كردنێكی نیازپاكانەی چەند ڕووداوگەلێكی گەلێك یان نەتەوەیەك نیە، بەڵكو لەلایەك دادگایەكە بۆ هەموو كەس و ڕووداوەكانی ڕابردوو، بۆیە دەبێت ئێمەش لەو دادگایەدا حزورێكی ئەكتیڤمان هەبێت تا مافەكانمان لەوێوە نەكرێن بەژێر لێوەوە. لەلایەكی دیكەش مێژوونووسینەوە پلانێكە بۆ داهاتوو، چونكە ئەو نووسینەوەیە تێڕوانینی گەلێك بۆ داهاتووەكەی هێندەی تێڕوانینی بۆ ڕابردووەكەی دەگۆڕێت. لێرەوەیە بارزانی گوێ بە كاتی نووسینەوەی مێژوو نادات بەڵكو دوای تەنها سێ ساڵ دەینووسێتەوە، چونكە دەزانێت كە مێژوو ڕووداوێكی بەردەوامە، دەبێت لەهەموو چركەساتەكانیدا بەشداری تێدابكەیت، لە داهاتوو جیاناكرێتەوەتەوە، بەڵكو تەنانەت نووسینەوەشی بەشداری كردنە لە دروستكردنیدا لە فۆرمەلەكردنی داهاتووی مێژوو خۆیدا، بۆ نابێت تەنانەت نووسینەوەشی فەرامۆش بكرێت.

(بۆ مێژوو) لە ناوەرۆكەكەیەوە

كتێبی (بۆ مێژوو) بەشێوەیەك داڕێژراوەتەوە كە پردێك بێت لەنێوان ڕابردوو و ئێستا و داهاتوودا، واتا هەرچەند باس لەمێژوویەك بكات ئەوا مەبەستیەتی گرێی بداتەوە بە ڕووداوی ڕیفراندۆمەوە، ڕیفراندۆم وەك بەرەنجامێكی سرووشتی كارلێكی نێوان دوو هێڵی سەرەكی كە مێژووی گەلی كوردستان و عێراق لە ماوەی لانی كەم سەد ساڵی ڕابردوو پێك دەهێنن، ئەوانیش هێڵی زوڵم و ستەم لە گەلی كوردستان لەلایەك و هێڵی خەبات و تێكۆشانی بێ پسانەوەی لەلایەكی دیكە. بەواتای ڕووداوەكە (ڕیفراندۆم) بەرهەمی كارلێكی نێوان ئەو دوو هێڵە سەرەكیەیە، لەهەمان كاتدا ڕووداوەكە خاڵی كۆتایی نیە بەڵكو لێرەوە جارێكی دیكە ئەو هێڵانە درێژ دەبنەوە، هەریەكیان لەبەرامبەر ئەوەی دیكە ڕووداو تۆمار دەكات، لەكاتێكدا هێڵی زوڵم و ستەم هەروەك لەڕابردوودا تاوانی سەركوت كردنی گەلی كوردستان، بۆردومان كردنی خەڵكی سڤیل، ڕاگواستن و تەعریب كردنی خاكی كوردستان، ڕاگواستنی بەكۆمەڵی گوندەكان، جینۆسایدی فەیلی و بارزانیەكان، ئەنفال و كیمیاباران، سەركوتكردنی ڕاپەڕین، ....هتدی تۆماركردووە، لەبەرامبەردا هێڵێ خەبات و تێكۆشان گەلێك لەخۆبردن و قوربانی دان و دەستكەوتی وەك شۆڕش و ڕاپەڕینەكانی شێخ مەحمود و بارزان، شۆڕشی ئەیلول و بەیانی 11 ئازار، شۆڕشی گوڵان و ڕاپەڕین و هەڵبژاردنی پەرلەمان و دامەزراندنی هەرێمی كوردستان، گۆڕینی شێوازی دەوڵەتی عێراق و بونیادنانەوەی لەسەر بنەمای فیدراڵی و دیموكراسی لە دەستوری ساڵی 2005ی تۆمار كردووە. دوو هێڵ (ستەم و خەبات) كارلێك دەكەن و پێكدادەدەن، تا لە چركە ساتێكدا ڕیفراندۆم بەرهەم دێنن، پاشان 16 ئۆكتۆبەر بەرهەم دەهێننەوە.

لێرەوەیە كتێبەكە هەم بەناونیشان و هەم بەناوەرۆك پێمان دەڵێت، ڕیفراندۆم بەرهەمی پرۆسەیەكی مێژووییە، بەڵام سەرەتای مێژوویەكەیشە بۆخۆی.

(بۆ مێژوو) پێمان دەڵێت

كتێبی (بۆ مێژوو) لەگەڵ ئەوەی كە خەباتی ڕزگاریخوازی گەلی كوردستان وەك یەك پاكێج، لانی كەم لەسەرەتای سەدەی بیستەمەوە تا ئەمڕۆ، باس دەكات، بەڵام پتر و ووردتر جەخت دەكاتەوە لەسەر ڕیفراندۆمی گەلی كوردستان ساڵی 2017، ئەوەش ئەگەر لەسەرێكەوە بگەڕێتەوە بۆ ئەوەی كە خودی سەرۆك بارزانی وەك نووسەر لەكتێبەكانی پێشوویدا زۆر بەدرێژی و ووردیی مێژووی پێشتری ئەو خەباتەی لە دووتوێی سێ بەرگی كتێبی (بارزانی و بزووتنەوەی ڕزگاریخوازی كورد)ی باس كردبێت و بەپێوویستی زانیبێت كە ئەم كتێبە بۆ ووردەكایەكانی ڕووداوی (ریفراندۆمی گەلی كوردستان ساڵی 2017) تەرخان بكات، بەڵام لەلایەكی دیكەوە ماناو مەغزای ئەوەی لێ دەخوێندرێتەوە كە بارزانی وەك سەركردە و پێشمەرگە و سیاسیەكی گەورە و بەئەزموون، خودی ڕیفراندۆمی گەلی كوردستانوەك یەكێكە لە خاڵە جومگەییەكانی مێژووی خەباتی ڕزگاریخوازی گەلی كوردستان و هەروەها مێژووی عێراقیش دەخاتە ڕوو.

مەبەست لێرەشدا لە خاڵی جومگەیی واتا ئەو ساتەڕووداوەی كە دەكرێت كات و مێژووی تێدا لەت بكەین بۆ پێشو پاش ڕووداوەكە، هەروەك چۆن شۆڕشی 14 تەمموز یان بەیانی 11 ئادار یان راپەڕین یان رووخانی ڕژێمی بەعس ساڵی 2003 خاڵی جومگەیین لەمێژووی گەلانی عێراقدا.

خاڵە جومگەییەكانی مێژوو، هەمیشە گۆڕانكاریەكی گەورەی كەڵەكەبوونێكی هێواشی گۆڕانەكانی پێشووی خۆیانن، لەهەمان كاتدا سەردەمی دوای خۆیان بە ڕووداو و پەیوەندی نوێ دەنەخشێنن، بەشێوەیەك كە جارێكی دیكە تەنانەت ئینتما و هەڵوێستی تاكەكانیش دەپێونەوە، دەیانخەنە دووڕیانێكەوە كە چی دیكە ناڕۆشنی لەوەی كام پەیوەندی و سەردەمت قبوڵە، داكۆكی لەكام سەردەم دەكەیت (پێش ڕووداو یان دوای ڕووداو) قبول ناكرێت، دەبێت تاكەكان روون و ئاشكرا دیاری بكەن كام هەڵوێست و سەردەمیان قبوڵە. ئەوە لە ئێستادا بەگوێرەی ڕووداوی ڕیفراندۆمەوە، كاتێك ساڵیادی ڕیفراندۆم نزیك دەبێتەوە، بەڕوونی دەردەكەوێت، چونكە جارێكی دیكە تاكەكانی كوردستان هەڵوێستی خۆیان دووبارە دەردەبڕنەوە لەبەرامبەر ڕیفراندۆمدا، تەنانەت دەستەواژەی (من ڕیفراندۆمچیم) لەوانەیە پتر لەهەر دەستەواژەیەكی دیكە لەو سەروبەندەدا دەربڕی ئەو حەقیقەتەبێت، كە ڕیفراندۆم خاڵێكی جومگەییە، هەڵوێستی تاكەكان دیاری دەكات كە سەربەكام بەرەیەن (ڕیفراندۆم یان دژەكەی). ئەوەش لەسادەترین مانایدا دەری دەخات كە ڕیفراندۆم هێشتا ڕووداوێكە تەواو نەبووە، بەڵكو هەڵوێستی تاكەكان بەرهەم دەهێنێتەوە، ڕووداوێكە ناسنامەی هەڵوێستی تاكەكان دیاری دەكات.

گەر بگەڕێینەوە بۆ ڕابردوو، ڕابردوویەكی دووری مێژووی گەلی كوردستان، بۆ سەرەتای سەدەی بیستەم، تا دەگاتەوە ئەمڕۆكە، سەیر دەكەین كە گەلی كوردستان بەدوای پێگەیەكدا وێڵە لەناوچەی خۆرهەڵاتی ناوەڕاستدا، پێگەیەك كە هاوتای پێگەی نەتەوە سەرەكیەكانی دیكەی خۆرهەڵاتی ناوەڕاست (تورك و عەرەب و فارس) بێت،پێگەیەك كە تیایدا گەلێك دەتوانێت سەربەخۆ بێت، ڕاستەوخۆ بەشداری بكات لە ناوچەكە و جیهاندا، پارێزراوبێت، یەكسان بێت بەوانی دیكە، یان بەواتایەكی گشتگیرتر خۆی چارەنووسی خۆی دیاری بكات.

لەپێناو وەدیهێنانی مافی دیاری كردنی چارەنووسدا، زۆر لەمێژەوە كوردستانیان خەبات دەكەن، جوانترین رۆڵەكانی خۆیانیان كردۆتە قوربانی، تیۆرەزەیان بۆ كردووە، سیمبوڵ و سروود و دروشمی تایبەتیان بۆ داناوە، كۆمەڵە و دەستە و حزبیان بۆ دامەزراندوە، پاشانیش بەردەوام شۆرش و ڕاپەڕینیان بۆ كردووە. ئەم وویستەی كوردستانیان بۆ گەیشتن بەمافی دیاریكردنی چارەنووسیان لەلایەك و لەلایەكی دیكە ئەو فەرامۆش كردن و پەراوێزخستنەی دەسەڵاتدارانی بەغدا بەدرێژایی سەدەی ڕابردوو بۆ سادەترین مافەكانی كوردستانیان،وای كرد كە هەمیشە نێوانى کورد و حکومەتەکانى بەغدا، هەر لەسەرەتاى دامەزرانى دەوڵەتى عێراقیەوە تا ئێستاشى لەگەڵدا بێت، لەکێشەیەکى بەردەوامدابێت. شۆڕشەکانى شێخ مەحمودى حەفید لەنێوان ساڵانى ١٩١٩ و ١٩٣١ دا ، ڕاپەڕینەکانى بارزان لەساڵى ١٩٣١ و ١٩٤٣ لەپاى پشتگوێخستنى مافەکانى کوردستانیانسەریانهەڵدا، ساڵى ١٩٦١ تا ١٩٧٥یش یەکێک لەگەورەترین شۆڕشەکانى کورد (شۆڕشى ئەیلول) لەڕووى جوگرافیا و ماوەوە لەمێژووى هاوچەرخماندا بەرپابوو. لەو ساتەوە شۆڕش بووە ئاکتێکى دامەزراوە و بەردەوام، پێشمەرگایەتى بووە دامەزراوەیەکى سەربازى داکۆکیکار لە مافەکانى کوردستان و دیموکراسی، تا ئەوەى لەساڵى ١٩٧٠دا فۆرمى ئۆتۆنۆمى وەک بنەما و چوارچێوە بۆ دیاریکردنى مافەکانى کورد و پەیوەندى نێوان کورد و بەغدا ڕێکەوتنى لەسەر کرا، بەڵام ئەو ڕێکەوتنەش بۆیە بەردەوام نەبوو، بەهۆى ئەوەى لەلایەک بەعس تەنانەت لەو دانپێدانانە کەمەى بە مافەکانى کوردیش پەشیمان بووەوە، لەلایەکى دیکەش ماف و ناسنامە و پێگەیشتوویی گەلى کوردستان زۆر گەورەتربوو وەک لەوەى لە چوارچێوەى ئۆتۆنۆمیدا جێگەى ببێتەوە. ئەوەبوو تا لە ڕاپەڕینى بەهارى ١٩٩١ بەدواوە، هەرێمى کوردستان لەسەر بنەماى وویستى هاووڵاتیانى کوردستان و بەهەڵبژاردنێکى گشتى دامەزرێندرا، کوردستانیان چوارچێوەى فیدراڵییان وەک فۆرمى ڕێکخستنى پەیوەندى نێوان کوردستانى باشوور و بەغدا دیاریکرد و سووربوون لەسەرى تا لەدەستورى عێراق ساڵى ٢٠٠٥دا چەسپاندیان، بەڵام سەرجەم ئەو هەڵوێست و ڕووداوانەى کە لەنێوان هەرێمى کوردستان و بەغدا لەدواى پەسندکردنى دەستورى عێراقى ساڵى ٢٠٠٥ ڕوویاندا، دەمانخەنە بەردەم ئەو ڕاستیەى کە هێشتا کێشە و گرفتەکانى نێوان کوردستانیان و بەغدا بەکۆتا نەهاتوون، چونكە لەلایەك گەلی كوردستان هێشتا گەیشتن بە مافی دیاریكردنی چارەنووسی بەدوا پنتی خەباتی دەزانێت و لەلای بەرامبەریش هێشتا بەغدا تواندنەوەی گەلی كوردستان لە بەناو چوارچێوەی یەكێتی خاك و گەلی عێراقدابەدوا پنتی سیاسەتی خۆی دەزانێت. ئەمە بنەما سەرەكیەكەی كێشەی نێوان كوردستان و بەغدایە، كە بەشێكی گەورەی مێژووی سەد ساڵی ڕابردووی عێراقی نەخشاندوە.

ڕیفراندۆمیش هەر لەو چوارچێوەدا دێت، جارێكی دیكە تەئكید دەكاتەوە لەسەر ئەو ڕاستیەی كە گەلی كورد لە ڕاپەڕین و كۆڕەودا بەگوێی بەغدا و جیهانیدا دا، بەوەی كە ناكرێت ئیرادە و وویستی گەلی كوردستان لەچوارچێوەیەكی تەسكی یاسایی یان سیاسیدا كە لەئاست مافەكانی گەلی كورددا نەبێت قەتیس بكرێت، ناكرێت بەبیانووی پاراستنی چوارچێوەی عێراقی یەكگرتوو یان بەرژەوەندی ئەم دەوڵەتی هەرێمی یان ئەو دەوڵەتی زلهێزی جیهانیی مافەكانی گەلی كوردستان بكرێن بەژێر لێوەوە، بەڵكو دەبێت دەرفەتی تەواو بەگەڵی كوردستان بدرێت بۆ ئەوەی خۆی چارەنووسی خۆی و بەپێی ئەو شایستەییەی كە یاسای سرووشتی و نێودەوڵەتی پێی داوە دیاری بكات. هەروەك چۆن ئەو پاساوانە لەماوەی سەد ساڵی ڕابردوودا نەیانتوانیوە كە ئیرادە و وویستی گەلی كوردستان بۆ وەدیهێنانی ئەو مافانەی سارد بكەنەوە.

لەلایەكی دیكەوە بەخوێندنەوەی ئەو مێژوو و ڕاستیانەی كتێبەكە دەیخاتەڕوو، بۆمان دەردەكەوێت كە دوای ساڵی 2017 سەردەمی ڕیفراندۆم دەست پێ دەكات، ئەو سەردەمەی كە كێشمەكێش و خەبات و وویستی خۆی هەیە، داواكاریەكانی پەیوەست بەمافەكانی كوردستانیانی تێدا گەلێك فراوانترە وەك لە سەردەمی پێش ڕیفراندۆم. ئەوە تەواو وەك سەردەمی دوای ئۆتۆنۆمییە، كاتێك گەلی كوردستان بڕیاری ئەوەی دا ئەو چوارچێوەیە ناتوانێت وویستەكانی گەلی كوردستان بێنێتەدی، بۆیە فیدراڵیەت بووە داواكاری سەرەكی، هەرچەندە ڕژێمی بەعس بەهەموو هێزێكیەوە بەرەوڕووی تەنانەت ئۆتۆنۆمیەكەش بووەوە، بەڵام خەباتی گەلی كوردستان بەردەوامبوو، چۆكی دانەدا تا لەساڵی 2005دا پێی گەیشت.

ئێستاش گەلی كوردستان بەڕێگای ڕیفراندۆمەوە فیدرالیزمی وەك چوارچێوەیەكی یاسایی سیاسی مافەكانی تێپەڕاندووە و هاتۆتە ئەم دیوی شێوازی فیدراڵییەوە. بەڵام ئەم قۆناغە نوێیە، واتا قۆناغی دوای فیدراڵیەت، چۆن و بەچ شێوازێك رەسم و شەكڵی پەیوەندی نێوان هەرێم و بەغدا دەنەخشێنێت؟ ئەوە دەوەستێتە سەر گەلێك فاكتەری ناوخۆیی و هەرێمی و جیهانیی. ئەوەی لەوبارەیەوە لەسەر ئاستی جیهانییش تەئیدی ئەو قۆناغە نوێیە دەكات بریتیە لە دروشمی ووڵاتانی زلهێز كە بریتیە لە (كوردستانێكی بەهێز و عێراقی یەك پارچە)، بەواتای ئەگەر عێراق یەكپارچەش بمێنێتەوە ئەوا دەبێت كوردستان بەهێز بێت، ئەو بەهێزیەش لەسەر چ شێوازێكی ڕێكخستنی یاسایی دەوڵەتدا لەنگەر دەگرێت، ئەوا دەبێت كاری لەسەر بكرێت و خەباتی نەپساوەی بۆ بكرێت، هەروەك چۆن كتێبی (بۆ مێژوو) دەیەوێت ئەو پەیامە بگەیەنێت.

لەكۆتاییدا دەبێت كتێبی (بۆ مێژوو) بەچاوێكی فراوانتر وەك لە چوارچێوەی حزبیی بخوێنینەوە، چونكە كتێبەكە پەیوەستە بەڕووداوێكەوە كە بەسرووشت و دەلالات و مەغزاكانی چوارچێوەی حزبیی تێپەڕاندووە، بەڵكو تەنانەت ناكرێت بەتەنها لە چوارچێوەی رووداوەكانی ئەم دەیەی ئێستاشدا بیخوێنینەوە، بەڵكو دەبێت لە چوارچێوەی كۆی خەباتی ڕابردووی كوردستانیان لەماوەی سەدەی ڕابردوودا و خەباتی ساڵانی داهاتووشیدا، بۆ گەیشتن بەمافەكانی، بخوێنینەوە. بۆیە پێشنیار دەكەم هەموو بیخوێنینەوە.