ئەمە بڵاوبكەوە
FaceBook  Twitter  

ئێرە وڵاتی هەموومانە وپێی دەڵێن كوردستان،هەرچی هزر و جوانی و لۆژیك هەیە كاڵ بۆتەوە،هەرچی مەزاج و نمایش و بەلارێ بردن و بەزۆرخۆكردن بە شت هەیە زەق بۆتەوە،گەر نەتوانی سەركەوتن بەدەست بێنی بڕۆ لای بن كەوتووەكان سەركەتوو دەبی،گەر نەبووی بە ژمارە ونەخوێندرایەوە،بڕۆ لای نەخوێندەوارەكان دەبیت بە ژمارەیەكی قورسی كاتی،گەر ماندو وهیلاك و شەكەت و شەونخون و پاك و راست و حەق بێژبووی،ئەوا چاوەڕێی هیچ مەكە و بۆ خۆت دەردە دڵی بۆ خۆت بكە.

تەنها رۆژنامەی كوردستانی دایك لە خەباتی (100) ساڵەی تێپەڕیكردووە،هەرچەندە ئەم رۆژنامەیە نەماوە وبەڵام وەكو مێژوو باسم كرد،میدیای نوسراوی وەرزشی كوردی لای زۆران وایە مێژووێكی (36) ساڵەی هەیە،كاتێك رۆژنامەی كاروانی وەرزش لەرێكەوتی 30/7/1985 بڵاوكرایەوە،بەڵام راستی ئەمە وەكو یەكەم رۆژنامەی وەرزشییە ودەكرێت ئەمەش ساڵانە وەك یادێك یاخود بابەتەكانی ئەم رۆژنامە وەرزشییە ئەرشیف ودیكۆمێنتكاری بۆبكەین و لەهەمان كاتدا وەك مێژوو باسی بكەین.

بەڵام لە شارێكی باشووری كوردستان وەك سلێمانی و رێك لە رێكەوتی 2/6/1921 واتە بەر لە (100) لەمەوبەر لەم شارە لە رۆژنامەی پێشكەوتن یەكەم هەواڵی وەرزشی كوردی بەناونیشانی (ئەسپ تاودان) بڵاودەبێتەوە،زۆرێك لە وڵاتانی رۆژهەڵاتی ناوەراست وتانەت وڵاتی دەوراوپشتیش بە شكۆی ئەم جۆرە مێژووانە نەگەیشتوون و وڵاتێكی وەك بێ وڵاتی كوردستان بەم شانازییە گەیشتووە.

بەڵێ (مێجەرسون) ی بەریتانی حاكمی ئەوسای شاری سلێمانی چەند رۆژێك لە رێكەوتی 2/6/1921 گەنجانی شاری سلێمانی كۆدەكاتەوە ئەسپ سواری ونیشان شكان وچەند یارییەكی تر ئەنجام دەدەن وپاشان (مێجەرسۆن) هەر بەخۆی دەیكات بە هەواڵێك كە دەبێـە یەكەم هەواڵی وەرزشی لە چوارپارچەی كوردستان لەرۆژنامەی پێشكەوتن لەرێكەوتی 2/6/1921 لەرۆژی پێنج شەممە بڵاوی دەكاتەوە.

ئەمڕۆ (100) ساڵ یادی دەبڵ یۆبیلی زێڕینی میدیاكارانی وەرزشی كوردستانە،ئەمڕۆ سەدەیەك تێپەڕی و (100) مۆم بێ ئەوەی دابگیرسێ كوژایەوە،چونكەهەموومان لەم مێژووە مێژووینە بێ مێژوو وبێ خەبەر وبێ مژاربووین!،داخەكەم هەواڵێكی وەرزشی كوردی (100) ساڵی یادبێت ویادیش نەكرێتەوە،دەبوایە حكومەت وپەرلەمان وهەرچی لایەنی پەیوەندیدارە شكۆیەك بۆ شكۆی مێژووینی ئەم مێژووە سەدەییە بەرز رابگرن،بەڵام ئەم مێژووە شۆڕبوەوە بۆ نێو (101) ساڵ وخۆزگەم خەڵكی عەوامیش نەبێ،هەر میدیاكارانی وەرزشی كوردستان جولەیەكیان بكردبوایە،ئێمە دەمێكە راهاتووین (سونەت) دەكەین و وازمان لە (فەرز) هێناوە!.

یادی یەكەم هەواڵی وەرزشی كوردی لە تێكڕایی گەلەكەمان ومیدیاكارانی وەرزشی كوردستان پیرۆزبێت،تەنها لەلایەنی پەیوەندیدار داوا دەكەم هەموو ساڵێك رۆژی 2/6 بكەن بە رۆژی رۆژنامەگەری وەرزشی كوردی ورۆژنامەی پێشكەوتنیش وەك رۆژنامەی (كوردستان) ی دایك بە رۆژنامەی یەكەم هەواڵی وەرزشی هەژماربكرێت.

  • 1