ئەمە بڵاوبكەوە
FaceBook  Twitter  

دەسەڵات و كەرتی تایبەت

شێرپەنجەی ژیانی خەڵكن

  بەدیهێنانی دەوڵەتداری سەركەوتوو بەبێ خزمەتگوزاریەكی تەندروست لە لێكدانەوەیەكی پوچ زیاتر هیچی تر نییە و ناتوانێ ببێتە سەنتەرێك بۆ پاراستنی كۆی كایەی سیستەمی سیاسی چونكە لە دیوی ناوەوەی  وەها دەوڵەتێكدا جگە لە متبوون و گەڕانەوە بۆ دواوە هیچی تر نابینرێت، بۆیە گەر لەم گۆشەنیگایەشەوە لە واقعی كوردستان و ئەحزابی فەرمانڕەوا بڕوانین ئەوە رێك تێدەگەین كە ئەوەی لێرە ڕودەدات ئەوەیە كە ئەمانە بەرهەمیان هێناوە و بەردەوام شكست لە دوای شكست تۆماردەكەن دیارە  لەپاڵ شكستهێنانی لە تەواوی كەرتە خزمەتگوزارییەكاندا، كەرتی تەندروستی گشتیش هەرەسی هێناوە و ڕۆژ لە دوای ڕۆژیش نەخۆشخانە حكومییەكان پەراوێز دەخرێن و كارەسات و ڕووداوی نەخوازراو بەرۆكی هاووڵاتیان دەگرێت، لەبری چارەسەریش حكوومەت بە بەرنامە ئەم كەرتە هەستیارە ڕادەستی بازرگانانی چاوچنۆكی ئەحزابی فەرمانڕەوا دەكات و بوونەتە شێرپەنجە بۆ گیانی هاووڵاتییان.

لە تەواوی دنیادا حكوومەت نرخی نەخۆشخانەی تایبەتی بەپێی داهاتی زۆربەی هەرەزۆری كۆمەڵگە دیاری دەكات نەك بەپێی داهاتی ملیاردێر و ملیۆنەرەكان، لەگەڵ ئەوەشدا لەزۆربەی هەرەزۆری وڵاتانی كەمێك پێشكەوتووی دنیادا، نەخۆشخانە و خزمەتی تەندروستی بە خۆرایی یان بەپارەیەكی یەكجار رەمزی كەمە و هەموو هاووڵاتییان دەتوانن بێ جیاوازی سوودی لێببینن.

ئەم دەسەڵاتە سیاسییە نەخۆشە، لە پێناو ئیحتیكاركردن و زیاتر قۆرخكردنی تەواوی سێكتەرەكان بەردەوام لە هەوڵی ئەوەدایە لە ڕێگەی وێرانكردن و پەراوێزخستنی نەخۆشخانە و ناوەندە تەندروستییە حكومییەكانەوە پرۆسەی بە تایبەتكردن پەرەپێبدات و گوێشی لەوە نییە كە ڕۆژانە هاووڵاتییان بەهۆی نەبوونی پێداویستییە پزیشكییەكان و نەبوونی ئامێری پێویست، پزیشكی پسپۆڕ، دەرمان و خراپی نەخۆشخانە گشتییەكان دەبنە قوربانی، لە بەرانبەریشدا  هیچ پلان و بەرنامەیەكی ستراتیژی نییە بۆ چارەسەركردنی ئەم دۆخە، نەك هەرئەوەندە، بەڵكو كارئاسانی بۆ برەودان بە كەرتی تەندروستی ئەهلی دەكات و كەرتی تەندروستی گشتی (حكومی)یش ڕووبەڕووی چەندین كەموكوڕی و گەندەڵی ئاشكرا بووەتەوە، ئامانجیشیان لەم كارە ناچاركردنی هاووڵاتییانە بۆ رووكردنە نەخۆشخانە تایبەتییەكان، كە زۆربەی هەرەزۆری ئەو نەخۆشخانە تایبەتییانەش سەر بە دەسەڵات و بەرپرسانی حزبی دەسەڵاتن.

ئەم دەسەڵاتە كە خۆی خاوەنی نەخۆشخانە حكومی و تایبەتییەكانە بێشەرمانە یاری بە ژیانی خەڵك دەكات و مانەوەی شەوێكی نەخۆش لەزۆر حاڵەتدا نرخەكەی بەرابەرە بە مووچەی مانگێكی مووچەخۆر و كارمەندێك، بۆنموونە نرخی خزمەتگوزارییەكان لە نەخۆشخانە ئەهلییەكان لە ئاستێكی بەرزدا بەسەر هاووڵاتییاندا سەپێنراون، بەجۆرێك كرێی شەوێك مانەوەی نەخۆش تیایاندا، بەبێ ئۆكسجین و چاودێری چڕ و ئامێری هەناسەدانی دەستكرد، بڕی ٥٠٠ هەزار دینارە و بە خزمەتگوزارییشەوە نرخەكەی دەگاتە یەك ملیۆن و ٥٠٠ هەزار دینار.

ئەم مامەڵەیەی دەسەڵات و سیستەمی سیاسی، لە وێرانكردنی نەخۆشخانە حكومییەكان و نەهیشتنی كەمترین خزمەتگوازرییەكانی وایكردووە نەخۆشخانە گشتییەكان بوونەتە سەرچاوەیەكی دیكەی شێرپەنجە بۆ گیانی هاووڵاتییان و ئاسایش تەندروستی خستۆتە مەترسییەكی واوە  كە ڕۆژانە هاووڵاتییان بەهۆی خراپی دەرمان و گرفتی دكتۆر و خراپی نەخۆشخانەكان گیان لەدەست دەدەن و دەبنە قوربانی چاوچنۆكی و قاچاخچێتی دەسەڵات، ئەمە لە كاتێكدا دەبوو كەرتی تایبەت تەواوكاری كەرتی گشتی بێت نەوەك جێگرەوەی كەرتە گشتییەكان و لەڕێگەیەوە بازرگانی بە گیانی خەڵك و بە كەرتی تەندروستییەوە بكرێت بۆیە دەبێت خەڵك لە ئاست ئەم كوشتارگەیە بێدەنگ نەبێت و بە هەر نرخێك بێت نەخۆشخانە ئەهلی و تایبەتییەكان كە خاوەنەكانیان حزب و پیاوانی دەسەڵات و ئەحزابی فەرمانڕەوان، لەدەستیان دەربهێنرێت و بگێڕدرێنەوە بۆ خودی خەڵك، یان دابخرێن و خاوەنەكانیشیان وەكو دزانی حیرفەیی ریسوا بكرێن و بدرێنە دادگای جەماوەری و سەراوژێر بكرێن.

  • 1