ئەمە بڵاوبكەوە
FaceBook  Twitter  

 

 

هەفتانە دلێر كەریم دەینووسێت

 

 

پێشینان وتوویانە بەرز فڕین ملی مرۆڤ دەشكێنێ، یان دەڵێن بەرز مەفڕە دوای نزیك دەنیشیتەوە، من دژی ئەو بۆچوونانەم، مرۆڤەكان دەبێت بەرز بفڕن و هەوڵی گەیشتن بە چینە بەرز و پاكەكانی ئاسمان بدەن. نابێ وەك باڵندەیەكی ماندوو بەنێو كۆڵان و باڵاخانەكاندا تێپەڕی، ئەگینا هەر دەبێ دوكەڵی ئەو كارگە و ئۆتۆمبێلانە بچێتەوە سنگت وا مرۆڤە ماندووەكان ئیشی تێدادەكەن و بازرگانە چاوچنۆكەكان بەروبوومەكەی دەچننەوە.

كە چوویتە كەناری ڕووبارێك، دەریایەك، بچۆرە قوڵایی و مەترسە، بە پەندێكی پێشینانی خۆیان وەڵامیان بدەرەوە و بڵێ گۆم تاقوڵ بێت مەلەی خۆشە، ئەوانەی لە لێوار و تەنكاو مەلەدەكەن، وەك باڵندەی نزم فڕیوو تەنها چڵكاو و پیسی و پاشەڕۆی خواپێداوان بەقوڕگیدا دەچێت و هەناسەیەكی ئاسوودەی هەڵنامژیت.

زۆرینە نزم دەفڕن و لەلێوارەكان مەلەدەكەن؛ تۆ بۆ ئەوەی دووڕ و مەرجانت دەسكەوێت دەبێت بجیتە قوڵایی و بەردەوام ڕووبەڕووی ئالنگارییەكان ببیتەوە، بزانە بەبێ تێكۆشان و ماندووبوون و هەوڵی بەردەوام، یان ناگەی بەهیچ شتێك، یان گەر گەیشتی، بەهاكانیان دەگۆڕیت.

 

  • 1