ئەمە بڵاوبكەوە
FaceBook  Twitter  

ئەزموونی هەر وڵات و کۆمەڵگەیەک، لەهەر بڕگە و سەردەمێكدا بە باش یان بە خراپ، رەنگدانەوەی دەسەڵاتی سیاسی و جۆری حکومڕانییە. بۆیە کاتێک باسی ئەزمونی هەرێمی کوردستان دەکەین، هەرگیز بەمانای ئەزموونی خەڵکی کوردستان نییە. ئەزموونی هەرێمی کوردستان و ئەو قەوارەیەی ٣٠ ساڵە هەیە، ئەزموونی بزوتنەوەی کوردایەتی و حزبە سیاسیەکانی و دەسەڵاتەکەیەتی. هیچ حزب و لایەنێکی سیاسی لەناو بازنەی بزوتنەوەی کوردایەتیدا، نییە، خۆی بەخاوەنی ئەزموونی هەرێم نەزانێت و بەرگری لەم ئەزموونە نەکات. ئەم ئەزموونە بەهیزترین کەسایەتی سیاسی ئۆپۆزیسیۆن "پیاوی خاکی" و باوکی هەژاران" دەکاتە یەکێک لە گەورەترین ملییۆنێرەکان. گەورە سەرمایەدارو خاوەن کۆمپانیای گەورەکان پەلکێشی ناو سیاسەت و نیعمەتی دەستبەسەداگیراوی ئەو ئەزمونە دەکات. شێخ و مەلا بنەماڵەییە بۆماوەیەکان، دەکاتە تولفی سوشیال دیموکراسی!! کوردی. ئەم ئەزموونە قاسەو سەرچاوەیەکی لێوان لێو لەداهاتی دەست بەسەرداگیراوی چینی کرێکار و بێبەشانی کۆمەڵگەیە. حزبە سیاسییەکان و دەسترۆشتوەکانیان، بنەماڵەکانیان و کەمایەتیەک سەرمایەداری وابەستە بەحزبی، کردۆتە ملیاردێر و ملیۆنەر و فەراهەم کردنی ژیانێکی شاهانەی ناوازەی کەم وێنە لە ئاستی دنیادا.

هەموو حزبە سیاسیەکانی ناو خانەوادەی بۆرژوازی کورد، بە قەومی ئیسلامیەوە، بەدەسەڵات و ئۆپۆزیسیۆنەوە سوێندی بەرگری لەم ئەزموونە خاڵی هاوبەشییانە. ئامادەن لەژێر ناوی بەرگری و بۆ پاراستنی ئەم ئەزموونە شەری دەستەو یەخە لەگەڵ برا کوردە ناڕازییەکانیان، کرێکار و کارمەندو موچەخۆرە برا کوردەکانیان، بکەن و خەڵتانی خوێنیان بکەن. دەڵین ئەم ئەزموونە بەخوێن و قوربانی دان هاتۆتە بوون و هەر کەس و لایەنێک دەستی بۆ ببات پیرۆزیەکی نەتەوەیی دەلەوتێنێ و دەبێ باجی سەرەرۆیەکەی بدات.

لەبەرامبەردا بۆ جەماوەری بەرینی کوردستان، ئەم ئەزموونە بەهۆی دەرکەوتنی ناوەرۆکە چینایەتی و سیاسیەکەی و دژایەتی ئاشکرای لەگەڵ خواست و ماف ویستەکانیدا زۆر زوو، بووە دیوەزمە، بووە غولێکی قێزەونی سیاسی، کە برینە قوڵەکانی چەندین دەهەی ژیر دەسەڵاتی سایەی بەعسی، هەڵدایەوە و خوێ ڕیژی دەکات. چۆن حزبە سیاسییەکانی بۆژوازی کورد، بەرگری لە ئەزموونەکەیان دەکەن و شانازی پێوە دەکەن و بە کەشتییەک وێنای دەکەن کە نوقوم بوونی، مایەی کارەساتە بۆ هەموویان، بۆ جەماوەری فراوانی کوردستانیش ئەم ئەزموونە سەرچاوەی برسێتی و گرانی و بێکاری و هەژاری و نەخۆشی و بیمافیەکانیانیانە، سەرچاوەی تیکشکاندنی ئیرادەی سیاسییانە، سەرچاوەی بەچارەسەرنەگەیشتنی پرسی کوردە، سەرچاوەی داوکەوتووی و پاشەوپاش گەڕانەوەی کۆمەڵگە و داروخانی سلکی خوێندن و پەروەردە، تەندروستی، بنەمای ئابوری و کردنیەتی بە کایەی وڵاتە چنگ بەخوێنەکانی ناوچەکەیە. بۆیە ئەم ئەزموونە لە چاوێ چینی کرێکاری و بیبەشی کوردستانەوە نەک هیچ پیرۆزییەکی نییە، بەڵکو هێندە سیما و روخسارێکی قێزەونە کە ژێرەژوورکردنی خەون و خولیاو لەوەش زیاتر بەکردەوە بۆی هاتوونەتە مەیدان...

ئەم ئەزموونە بەهۆی ئەوەی کە لەناوخۆیدا ئاوا قیزەونە و بێزراوە، خاوەنی هیچ جێگا شانازییە و بەگرییەک نییە، هاوکات لە ئاستی ناوچەکەو رای گشتی جەماوەری ئازادیخواز و ئینساندۆستیشدا، بیزرار و نەفرەت لێکراوە. هەروەها تا هاتووە لە ئاستی دنیای فەرمی کۆمەڵگەی نێو دەوڵەیشدا، جیگاو ڕیگای روو لە لێژی و رەوینەوەی پشتیوانیەکانیەتی. ئەم ئەزموونە نە توانیویەتی ژیرخانێکی ئابوری دابمەزرێنی و نەتوانیویەتی هەنگاو بەرەو ئایندەی سیاسی کارساز بنێ، نەتوانیویەتی ئەو شەق بوونەی لە شەری دەسەڵاتی خوێناویدا، هەرێمیان کرد بۆ دوو زۆن، یەکبخاتەوە. بەجیا لەوانەش لەهیچ زەمینەیەکدا روویەکی جوانی نیشانی دنیا نەداوە، لەزەمینەی ئازادی و ئازادییە سیاسیەکاندا، هیرش بۆسەر ئازادییەکان و ئەو پەراوێزە لە ئازادی کە لە بنەرەتدا کەشی نیمچەکراوەی سیاسییە، و بەرهەمی قوتبی نەبوونەبوونەوەی دەسەڵاتە... یەکیك لەو لایەنانەیە کە دەسەڵاتی سیاسی بزوتنەوەی کوردایەتی بەنەخشەوە لە دژی وەستاون و هەرچی لەدەستیان هاتووە لە دژی ئازادییەکان کردویانە. لە پەیوەند بەمافە فەردی و مەدەنیەکان، کە بەشیکە لە پرسی ئازادی و پێوانە بۆ رادەی ئازادیخوازی و پیشکەوتنخوازی، زۆر دڵرەقانە مامەڵەیان لەگەڵی کردووە، ئازادی فەردی بەمانای وشە یاساغ کراوە، باسێک لە مافە مەدەنیەکان نییە و هەموو مافێکی مەدەنیەیان کردۆتە قوربانی جبەی مەلا و خێڵی کەلتوری داڕزیوی کۆنەپەرستی و ئیسلامی. نەک مافەکانی ژنان پیشێل دەکرێت، بەڵکو قوربانیانی دەستی پیاو سالاری و شەرەف، گەورەترین گۆرستانی بێناونیشانی کردۆتە گڵکۆی هەزاران ژن و بکوژانیش ئازاد و بێ لیپرسینەوە لە شەقامی دەسەڵاتی مافیاکانی پشتکردنە یاسادا، پیاسە دەکەن. یاسا، بە مەتری قڵشتی چینایەتی دەپێورێت و بۆتە حەربەیەک بەدەستی دەسەڵاتەوە بۆ سەرکوت و زیندانی بەرەی ئازادیخوازو بێبەشانی کۆمەڵگەو پارێزەری دەسەڵاتی مافیاکان و پیاوەکانیان. دوای ٣٠ ساڵ لەدەسەڵات، بەرپرسانی دزی  و گەندەڵی ئاشکرا، نۆکەر پیشەکان، بازرگانە چاوچنۆکەکان کە خراپترین کاڵاو شمەک، هاوردەی کوردستان دەکەن، دەستگیر نەکراون و یاسا نەک دەستی پێیان نەگەیشتووە بەڵکو ڕاخستنی فەرشی سوری دەسەڵات، دەستی ئاوەڵاکردون و کردونیەتە قارەمانی پسپۆری بواری ئابوری و بازرگانی. لە بەرامبەردا ئەو هاوڵاتیانەی مریشکێک، دەبەیە نەوت و پارچەیەک دایبیان بردووە، قارەمانەکانی یاساو پارێزەری دەسەڵات، بە پلانی زۆر تۆکمە!! دەستگیریان کردوون لە کونجی زیندانی پارێزگاری لە ئاسایش و یاسایان!! توندیان کردوون. لە پەیوەندیەکانیاندا، داهات و دەسەڵات... مەبنا بووەو بۆ ئەو مەبەستەشیان لەجیگای پەیوەندی سیاسی و هاوسەنگ، لەگەڵ وڵات و دەوڵەت و ‌هیزە سیاسیەکان، نۆکەر پیشەیی و خۆشخزمەتیان کردۆتە کردۆتە بژاردە و باسی سەرکەوتنی دیبلۆماسیەتی کوردیش گوێ کەڕ دەکات. نەبوونی هیچ ئاسۆ و بەرنامەیەک بۆ ئایندەی سیاسی کوردستان و لەوەش زیاتر وەستانەوە بەرووی هەر هەوڵ و تیکۆشانێکی ئازادیخوازنەدا بۆ چارەسەری ئەو پرسە، بەڵگە ناوێت... زیندووکردنەوەی دەسەڵاتی بۆماوەیی لە باپیرانەوە بۆ باوک و کوڕ و ئامۆزاکان، پەڵەیەکی رەش و گێڕانەوەی فۆرمی دەسەڵاتە لەگۆڕنراوەکانە... ئەمانەو دەیان مەسەلەی تر وایکردووە ناوەرۆکی دەسەڵاتی ئەم ئەزموونە بەجۆرێک بۆگەن بکات، کە راماڵینی ببێتە تاکە ڕێگاچارەی ناچاری. بۆیە کەس ئامادەنییە بەرگری لە ئەزموونێک بکات، کە لەلایەکەوە جەماوەری فراوانی خەڵک بەدەستیەوە گیرۆدەو هەراسانن و لەلایەکی تریشەوە جێگای دڵخوازی نەخشەی بۆرژوازی جیهانیش نییە... لە ئاستی ناوخۆی کوردستاندا، هیزی کاراو پر ئینرژی کۆمەڵگە، لە پیشیانەوە لاوان ئەم قەوارەو ئەزموونە جێ دەهێڵن و ئەگەر ڕیگری زۆر و خەتەرناک و قورس نەبوونایە، رۆشتن و جێ هێشتنی کوردستان لەلایەن لاوانەوە سەدان بەرابەری ئیستا دەبوو... رای گشتی خەڵکی ئازادیخوازی دنیا، و ناچار بوونی دنیای فەرمی و وڵاتەکان و کۆمەڵگەی نێو دەوڵەتی بۆ پشتیوانی لەهەر ئەزموون و جوڵانەوەیەک، وابەستەیە بە ناوەرۆکی ئەو ئەزموون و دەسەڵاتەوە، ئەوەی وای کرد تاڕادەیەک دنیا بەرگری لە ئەزموونی کوردستانی سوریا بکات... مەرسومی یەکسانی ژن و پیاو، بەرگری قارەمانانە لە کۆبانی، تیکشکاندنی تەلیسمی ترسی داعش و لمۆز لەزەویدانی سەربازی داعش و هاوکارەکانی لەپێشیانەوە تورکیا، بەفەرمی ناسینی مافی هاوڵاتی بوون و لە بەشداری لەدەسەڵات و بەڕیوەبردندا... ئەو نموونانە بوون کە بەجیا لەوەی خەڵک ئامادەبوونی بەرگریان لی بکەن، کە بەبەرهەمی دەستی خۆیانیان دەزانی، هاوکات لە زۆرێک لەو وڵاتانی تری دنیاوە لاوانێک هاتن بۆ پشتیوانی بەشداری و بەرگری لێکردنی.

ئەزموونی هەریمی کوردستان و ئەو دەسەڵاتەی لەم قەوارەیەدا بۆتە دێوەزمە و بەزۆری هیز دەستی بەدەسەڵاتەوە گرتووە، ناتوانێت تاسەر بمێنێتەوە... هەر دەسەڵاتێک متمانەی جەماوەری لە پشت نەبوو، مەحكوم بە مەرگ و راماڵینە و کۆمەڵگەی نێو دەوڵەتیش چ لە ئاستی رای گشتی و چ لە ئاستی رەسمیدا، بەرگری لێ ناکەن.. جەماوەری ئازادیخوازو بێبەشی کورستان بریاری خۆیان داوە کە بژاردە راماڵینی ئەو دەسەڵاتەیە، کۆمەڵگەی نیو دەوڵەتیش کۆتایی پشتیوانی خۆیان لە دەسەڵاتی ئیستای بۆرژوازی کورد، راگەیاندوە... لە هەلومەرجێکی ئیستادا پرسیار ئەوەیە ئایندەی سیاسی کوردستان و چی بەسەر دێت و ئەڵتەرناتیفی کارساز کامەیە... بەشی سێهەمی وتارە وەڵام بەم مەسەلەیە دەداتەوە...

ماویەتی...

  • 1