ئەمە بڵاوبكەوە
FaceBook  Twitter  

بەشی یەكەم

لەساڵانی 1956- 1957 قوتابی سەرەتایی بووم لە قوتابخانەی خالدیەی سەرەتایی كە لەگەڕەكی خانەقا بوو، گەلێ جار لەگەڵ منداڵانی گەڕەك بۆ نادی (خلیل ئەفەندی) دەچووین بۆ خوێندن و یاریكردن، نادی (خەلیل ئەفەندی) ئێستاكە كراوەتە شوێنی خانەنشینانی هەولێرو كاتی خۆیان لەوێ بەسەر دەبەن، ئێمە منداڵانی گەڕەكی خانەقا كە بۆ نادی (خەلیل ئەفەندی) دەچووین بە كۆڵانەكەی بەرامبەر (سینەما حەمرا) دا دەڕۆیشتین و لەبەر دەرگای ماڵێك ماشێنێكی بە چادر داپۆشراومان بەدیدەكردو هیچ كات چادرەكەی لەسەر لانەدەدرا، ئێمەی منداڵان لەیەكترمان دەپرسی، (ئەرێ ئەو سەیارەیە لۆ هەر لێرە داپۆشراوەو قەت چادرەكە لانادرێ؟). كەسمان وەڵامی پرسیارەكەمان نەدەزانی.. تا رۆژێك قوتابی (تەحسین خلیل) هات و بەیەكەوە لەگەڵ مندالەكان بۆ نادی (خەلیل ئەفەندی) بەهەمان رێگادا بەلای سەیارە داپۆشراوەكەدا رۆیشتین، دیسان هەمان قسەو پرسیاری رۆژانی رابردوومان كرد، تەحسین خلیل گوتی (ئەمن دەزانم ئەو سەیارەیە بۆ لێرە داپۆشراوە، با بچینە نادی لۆتان باس دەكەم)، لەنادی (خەلیل ئەفەندی) لەدەوری یەكتردا دانیشتین و تەحسین خەلیل هاتە گۆو ووتی، لە (بابم پرسی ئەم سەیارەیە لۆ لەپێش دەرگای ماڵێك لە نزیك سینەما حەمرا داپۆشراوەو راوەستاوە؟) لەوەڵامدا بابم واتە باوكی تەحسین خەلیل ووتی (تەحسین لەكن كەس باسی ئەو سەیارەیە مەكە، ساحێبی ئەو سەیارەیە زۆر خەتەرەودژی حكومەتە، شیوعیە، حكومەت گرتیتی، بابی كوڕە گیراوەكە لەخۆشەویستی كوڕەكەی سەیارەكەی داپۆشیوەو رێگا نادات كەس بیهاژوات، بابم گۆتی ئەگەر باسی ئەو سەیارەیە بكەیت و حكومەت بزانێ هەموو دەگیرێین) ئێمەی منداڵان كەسمان مانای شیوعی و حكومەت و گرتن و ئەشكەنجەمان نەدەزانی، كەسیشمان پرسیارمان لە تەحسین نەكرد كە مانای شیوعی چیە؟ ئەو زۆر بە ترسەوە قسەكانی بۆ كردین و ئێمە ترساین و بێدەنگ بووین، بەڵام تایبەت بەخۆم قسەكانی (تەحسین خەلیل) لەزهنم چەسپاو لەیادم نەدەكردو بەردەوام كە بەلای سەیارەكە رەت دەبووم هەموو وتەكانی (تەحسین)م بیر دەكەوتەوە، تا كەمێك هەراشتر بووم و شۆڕشی 14ی تەمووزی 1958 بەرپابوو، هەر لەیەكەم رۆژی شۆڕش جەماوەری شاری هەولێر رژانە سەر شەقامەكان و خۆپیشاندانی گەورە رێكخراو شیوعیەكان رۆڵی پێشڕەوایەتی و سەركردایەتی كردنیان هەبوو، ئیتر بە ئاشكرا باسی شیوعی و پارتی و تێكۆشەران دەكرا، لەم رۆژگارەدا شوێنی كۆبونەوەو یاریكردنی لاوان و هەرزەكارانی گەڕەكی خانەقا گۆڕەپانی قەبرستانی شێخ ئۆمەر بوو، لەوێدا باس هەر باسی شیوعی و پارتی بوو، لاوەكان بەسەر ئەم دوو رەوتەی شیوعی و پارتی دابەش ببوون، بەڵام ژمارەی شیوعیەكان گەلێك زۆرتربوون، هەندێ جار باسی سەركردەكانی حزبی شیوعیان دەكرد، لەوانەی لەیادم مابن باسی ( جەمال حەیدەری و نافع یونس و عادل سەلیم و محمد محمد شێخە شەل و عەزیز محمد)دەكراو، باسی ئازایەتی ئەو هاوڕێیانەیان دەخستە بەرباس، گەلێ جار لاوە شیوعیەكان كە زۆربەیان دانیشتووی گەرەكی خانەقا بوون باسی سەیارە داپۆشراوەكەیان دەكرد، كە سەیارەكە هی هاوڕێی سەركردە (عادل سەلیم) بووە، لەم رۆژگارەدا ناوی هاوڕێ (عادل سەلیم)م زانی وبەبێ ئەوەی بیناسم یان بیبینم خۆشمدەویست، زۆر حەزم بەدیداری دەكرد....

تا لە ساڵی 1973 كە ئەندامی لیژنەی محەلی هەولێر بووم، و كۆبونەوەیەك لەماڵی هاوڕێ (سامیە شاكر چاوشلی)لەگەڵ هاوڕێ (رەمۆ شێخۆ) ئەندامی مەكتەبی سیاسی حزبی شیوعی سوری ئەنجامدرا، و بەشێك لەئەندامانی لیژنەی محەلی هەولێر بەشداربوون، هاوڕێ عادل سەلیم وە ژووركەوت و هاوڕێیان بەناوی خۆی پێشوازیان لێكرد، بەندە ئەوەندە دلخۆش و شاد بووم بەوردی سەیری رەفتارو هەڵسوكەوتیم دەكرد، هاوڕێ (عادل) جلوبەرگی كوردی و كڵاو وجەمەدانی پۆشی بوو، وەكو سەركردەیەكی زاناو لێهاتوو بەناوی محەلی هەولێر قسەی بۆ هاوڕێ (رەمۆ شێخۆ) دەكرد، دەربارەی پەیوەندی حزبمان لەگەڵ پارتی و شۆڕشی ئەیلول كە زۆر نەگونجاو و نالەبارو خراپ بوو، هاوڕێ عادل سەلیم ووتی ئێمە وەكو حزبی شیوعی عێراق بەهیچ شێوەیەك نامانەوێت لەگەڵ پارتی لێكبترازێین و دابڕان و دوركەوتنەوە لەنێوانمان رووبدات، دەمانەوێت لەبەرامبەر بەعس و رژێمەكەی پێكەوەبین، ئەوكات بەهەردوولامان بەهێز دەبین و داكۆكی لەگەلەكەمان دەكەین، بەڵام رەوتێكی راسترەو لەسەركردایەتی پارتی بوونی هەیە، وكۆشش دەكەن كە پارتی و شۆڕشی گەلەكەمان بەلارێدا ببەن و گەلەكەمان لەم رێگایەوە تووشی هەڵدێر و شەڕێكی كاولكارو ماڵوێرانی بكەن، بەڵام ئێمە وەكو حزبی شیوعی پەیوەندی باش و بەهێزمان لەگەڵ (مەلا مستەفا بارزانی) ناترازێنین و هەڵوێستی راست و دروستی بارزانیمان لەدوای كودەتای 1963 ی بەعسیەكان لەیادەو لەبەرچاوە.

دوا بەدوای ئەم دیدارە هاوڕێ (عادل سەلیم) كە بەرپرسی لیژنەی محەلی نەینەوا بوو، بۆ مەحەلی هەولێر گەرایەوە و بە سكرتێری لیژنەی محەلی هەولێر دیاریكرا، ئیشو كارەكانی محەلی رێكخستەوەو ئەركەكانی دابەشكردەوەو خۆی رۆژانە بەدواداچوون و سەرپەرشتی كارەكانی دەكرد، هاوڕێ عادل سەلیم لەكاری حزبی و جێبەجێكردنی ئەركی حزبی پەیوەندی لەگەڵ مەكتەبی محەلی و ئەندامانی محەلی كاراو سەركەوتووبوو، كردەوەو گوتاری یەك بوو، ماوەی پەیوەندی لەگەڵ هاوڕێیان یەكسان بوو. گەلێك دڵسۆزو و سادەو سەربەرزو بەدیمەن بوو، ئەو ساڵانەی ئەمینداری گشتی ئەمانەی عامەی هاتوچۆ بوو هیچ جۆرە گۆڕانكاریەك بەسەر كارو كردەوەو هەلوێست و ژیانیدا نەهات، هەر لەم خانووەدا دەژیان كە لەتەك بارەگای حزب بوو، منداڵەكانی وەكو منداڵی هاوڕێیان و هەژارانی شاری هەولێر دەچوونە قوتابخانەو هەر خۆشیان وەكو تەواوی منداڵان دەگەڕانەوە ماڵەوەیان، نەسەیارەو نە پاسەوانیان لەگەڵدانەبوو، هاوڕێ عادل سەلیم كە ئەمینداری گشتی بوو، (نەسەیارەی تایبەتی و نە لێخورو پاسەوان و خانووی تایبەتی هەبوو) هەر ئەو بڕە پارەیەی وەردەگرت كە بەرپرسەكانی حزب لەحزبیان وەردەگرت و زیادەكەی موچەی ئەمینداری بۆ حزب دەگەڕاندەوە.

هاوڕێ عادل سەلیم پاشملە رێگای بەهیچ هاوڕێیەك نەدەدا قسە لەسەر هاوڕێیان بكات و، خۆشی قسەی لەدوای هاوڕێیانەوە نەدەكرد، هەر شتێك هەبوایە لەكۆبونەوەی حزبی بەنەرم و نیانی دەیخستە بەر دیدی هاوڕێیان و راو بۆچونی وەردەگرتن و پەلەی لە بڕیاردانی سەرپێیی و بەبێ بوونی زانیاری نەدەكرد، لەپاراستنی ریزەكانی حزبی لەخزانی پیاو خراپانی سەر بەملاو ئەولا لێهاتو و زانا بوو، لەم بوارەدا رێگای بە هاوڕێیان دەدا ئەگەر زانیاری دورستیان لابێت گوێبگرێت و ئەنجا رێوشوێنی گونجاوی دەگرتەبەر، هەر لەم بوارەدا رۆژێكیان هەندێ زانیاریم پێگەیشت لەسەر (ن.خ.خ) كە ئەندامی لیژنەی شاری هەولێر بوو، چووەتە ناوچەی گەڵاڵە لەبۆ دیدار لەگەڵ هەندێ بەرپرسی پارتی. لەكاتێكدا دەیان هاوڕێ شیوعی لە سجنی (دەربەند رایات) بەندكرابوون، كاتێك ئەم رووداوەم بەتەواوتی بەبەڵگەوە بۆ هاوڕێ (عادل) باسكرد، هاوڕێ عادل ووتی ئەم مەسەلەیە با نهێنی بێ و لەنێوان خۆماندا نابێت هیچ هاوڕێیەك لەلیژنەی محەلی و دەرەوەی محەلیش ئەم بابەتە بزانن، تۆ بەدواداچوون بكە و زانیاری كۆبكەوەو هەڵسوكەوتی (خ) و گۆڕانكاریەكانی بەسەریدا دێن تۆمار بكە، بۆ ئەوەی ئەگەر گەیشتینە راستیەكان ئەوكات دەیخەینە بەردەم كۆبونەوەی حزبی و بڕیاری گونجاوی دەربارەی دەدەین، كاتێك تەواوی پەیوەندیەكانی لەگەڵ پارتی و بەعس رۆنبۆوە لیژنەیەك لەهاوڕێیان (عادل سەلیم و محمد شێروانی و جەبار حەسەن و بەندە بۆ لێكۆڵینەوە لەگەڵ (ن.خ خ) پێكهێنرا بەمەبەستی لێكۆڵینەوە لە (ن خ خ).

 

 

 

  • 1