ئەمە بڵاوبكەوە
FaceBook  Twitter  

 

لپشت ئوپەراسیونێن توركیا پرۆژێ‌ داگیركرنا باشۆرێ‌ كوردستانێ‌ هەیە...!

پشكا پێنجێ‌

بێدەنگیا ل باشۆر لهەمبەری ئوپەراسیوونان:

هەرێما كوردستانێ‌ یا د رەوشەكا هەری خراب دا، نە ل بەغدا پرسگرێكرێن خوە چارەسەركرنە نەژی د دهندرێ‌ خوە دە خوەدی لهەڤهاتنن، دناڤبەرا پارت و ئالیێن كوردستانی ڤەقەتیانەك هەیە، هەموو ئالی ب پارتێن دەسهەلاتێ‌ ڤە دانپێدانێ‌ بڤێ‌ چەندێ‌ دكەن، ئێك هەلویستی و ئێك گوتار ل سەر پرسێن چارەنڤیساز ناهێنە دیتن، خەما حزبێ‌ یا بسەر خەما نیشتمانی و ملەتی كەفتی، هەر ل رۆژا دامەزراندنا حكومەتا هەرێمێ‌ هەتا ئیرۆ د حوكمرانیێ‌ دە حزبایەتی هەیە، حزبایەتیا زال یا خوە سەپینەر، كو گەلەك جاران نرخ و سەنگێ‌ نا دەنە دامەزراوێن خوە یێن حوكمرانیێ‌ ژی.

ئوپەراسیونێن توركیا ل دەڤەرێ‌ هەر چەندە گەلەك یێن مەترسیدارن، بێهنا داگیركرنێ‌ لێدهێت، ئنیەتێن وان یێن زەلالن، كو دخوازن پێگەهێ‌ كوردان لاوازكەن، رەوشەكا نە ئارام ل دەڤەرێ‌ پەیداكەن، لێ‌ هێشت باوەریا دەسهەلاتێ‌ پتر ب بیانویێن توركیا هەیە، نە تنێ‌ یێن بێدەنگ و دبێ‌ هەلویستن، مرۆڤ دەما ل راگەهاندنا وان ژی مێزە دكەت، زێدە خزمەتا ئوپەراسیوونێ‌ دكەن، گەلەك ئیماژێ‌ ب مەترسیێن داگیركەریێ‌ ناكەن، باشە مە تەخمینكر دەسهەلات خوەدی بەرژوەندە دگەل توركیا چما هێز و ئالیێن سیاسی یێن دن بێدەنگن، دەنگێ‌ كەسەكێ‌ ناهێتن هەر وەكە تشتەك د گورەپانێ‌ دە چێنەبووی.

راستیەك هەیە ئەو ژی ئەوە، كو سایكولوژیەتا خەلكێ‌ ب ئاوایەكێ‌ گشتی یا هاتیە هنگافتن، بیاڤێن ئازادیا رادەربرینێ‌ یێن هاتیە سەركوتكرن، ئەگەر رەوش بڤی ئاوای نەبایە، باوەرناكەم خەلك یێ‌ بێدەنگ بایە لهەمبەری ئەڤێ‌ داگیركرەریا توركیا، قوناغ گەلەك یا مەترسیدارە حكومەت و پارت و ئالیێن سیاسی و جڤاك د حالەتێن بێدەنگیەكا نە نورمال دانە، هەتا نها چ هەول نینە كودەنگیەك دروست ببیت و ب ئێك دەنگ بێژنە توركیا نە بو ئوپەراسیونەكا بڤی شێوەی.

مرۆڤ دەما ژ نرخاندن و شروڤەیێن شرۆڤەكاران مێزە دكەت، د گەهیتە وی ئەنجامی، كو نها ل هەرێمێ‌ دو بوچوون هەنە، ئێك: لگور نرخاندنا بوچوونا ئێكێ‌ پەكەكە هوكارێ‌ سەرەكی یە، پەكەكە پتر توركیا گەفەیە لسەر هەرێما كوردستانێ‌، ئەگەر پەكەكە لڤر نەمینیت، توركیا نكاریت هیچ ئوپەراسیونەكێ‌ ئەنجامدەتن، نە راستەوخو ئەڤ بوچوونە پتر هەڤبیرە دگەل ئوپەراسیونێن توركیا، هەلگرێن ئەڤێ‌ بوچوونێ‌ پتر نێزی بەشێ‌ هەری مەزن یێ‌ دەسهەلاتێ‌ نە، ئەڤ بوچوونە خوەدی ئینسیاتیفە و كاریگەریا وێ‌ هەیە لسەر چێكرنا هەلویستان، بێدەنگیا نها دهێتە هەستپێكرن ل هەمبەری مەترسیێن ئوپەراسیوونا توركیا، فشارێن ئەڤێ‌ بوچوونێ‌ نە، سەرچاوەیا ئافراندنا ئەڤێ‌ بوچوونێ‌ بەشێ‌ هەری مەزنێ‌ دەسهەلاتێ‌ یە، واتە دەسهەلاتا باشۆر دەستەكێ‌ د دەتە ئەڤێ‌ بوچوونێ‌، نزانم چاوان بویەرا گوشتنا سێزدە سڤیلێن خەلكێ‌ سەرسنكێ‌ لبیر نەمایە. دوهەم: لگور نرخاندنا بوچوونا دویێ‌، توركیا نەیارەكێ‌ سەرسەختێ‌ گەلێ‌ كوردە، لهەر درێ‌ پێشڤەچوونێن كوردان هەبن توركیا كەلەمەكە لپێشیا ئەوان پێشڤەچوونان، د ئوپەراسیوونێن توركیا پەكەكە هەجەتە و ئارمانج داگیركرنە و لاوازكرنا پێگەهێ‌ كوردانە ل دەڤەرێ‌، ئەڤ بوچوونە بەروڤاژی بوچوونا دەسهەلاتێ‌ یە، واتە ئەو زێدە كوردستانیانە هزردكەن، چ بەرژوەندێن بەرتەسك لپشت ئەڤێ‌ بوچوونێ‌ نینە، د نرخاندنێن ئەڤێ‌ بوچوونێ‌ دە پەكەكە ژی لڤر نەمینیت دەهان هێجەتێن دن توركیا دێ‌ ئینیتە پێش، چونكە توركا ب زەلای دبێژیت ل تەنشتا مە نابیت چ ستاتویێن كوردی هەبن، چەند ناكوكی ژی هەبن پەكەكە هێزەكا كوردستانی یە و توركیا وەلاتەكێ‌ داگیركەرە.

ئەڤ بێدەنگیا ل باشور هەی گەلەك یا مەترسیدارە، كەسێن رەوشەنبیر و سیاسەتمەدارێن سەربەخوە گەرەكە بكەڤنە دناڤ لڤ و تەڤگەرەكێ‌ دە و هەولبدەن فشارێ‌ لسەر دەسهەلاتێ‌ پێكبینن، كو هەلویستەكێ‌ ئێكگرتی یێ‌ هەڤدژی ئوپەراسیوونێن توركیا بهێتە راگەهاندن، دەست ب چالاكیێن جودا جودا بهێتەكرن هەم د هندرێ‌ كوردستانێ‌ دە هەم ژی ل دەرڤەی كوردستانێ‌ بزاڤ بهێنەكرن، كو لوبیەكا كوردستانی دڤێ‌ دەربارێ‌ ل ئەوروپا و ئەمریكا خورت بكەڤنە قادان و نەرازیبوونێن خوە بینن زمان.

بەردەوامیا ئوپەراسیونا و پێشبینیا سیستەمێ‌ چەتەكەریێ‌:

ئەڤ ئوپەراسیوونە ئەگەر بەردەوامی پێبهێتەدان و هەبوونا لەشكەرێ‌ توركیا ل دەڤەری ببیتە ریالیتەیا هەر دەمی، ژینگەها كونتاكا رۆژانە دەركەڤیتە دناڤ ژیانا رۆژانە یا هەڤوەلاتیان دە، دێ‌ گەلەك دیاردێن خراب و مەترسیدار لێدەركەڤن، پێشبینیا هندێ‌ دهێتەكرن هەتا سیستەمێ‌ چەتەگەریێ‌ دەركەڤیتە هولێ‌، هەبوونا ژینگەها بڤی ئاوای دهێتە هەستپێكرن، ژبەركو تەخ و توێژێن كومەلگەهێ‌ لڤان دەڤەران د هێلا ئابوری دە نە د ئاستەكێ‌ باشدانە، ئابورێ‌ تاكی ژی دەما تێكدچە، ژبوی پەیداكرنا پاریێ‌ ژیارێ‌ مرۆڤ خوە ب ئاسانی د چەمینیت و بێ‌ ئیرادە دبیت.

چێگیربوونا هێزێن داگیركەر دێ‌ ب مەبەست ئارامیا دەڤەرێ‌ تێكدەن، دێ‌ رەوشەكا تەژی ترس پەیداكەن، دێ‌ ژیانێ‌ د هەر ئالی دە ئێخنە بن فكارو گومانان، رەۆشا ئابوریا خەلكێ‌ بخوە ژی یا خراب، دویر نینە ئەڤ چەندە بهێتە بكائینان ژبوی هندێ‌ وان نەچاركەن و راگێشنە بن باندورا سیستەمێ‌ چەتەگەرێ‌، مەبەست ژ ئەڤێ‌ پێشبینیێ‌ ئەو نینە، كو بێژین سوبەهی ئەڤ سیستەمێ‌ جەتەگەریێ‌ دێ‌ جهێ‌ خوە گریت، بەس ب بورینا دەمی دێ‌ ئەو چەند بیتە كریار، سالێن نوتان دەما بنگەهێن توركیا ل دەڤەرێ‌ هاتیە بنەجهكرن، گەلەك یێن ژار و بێدەسهەلات بوون، بێ‌ رەزامەندیا دەسهەلاتێ‌ نەدكارین پێنگاڤەكێ‌ پێشدا بچن، لڤێ‌ داویی پشتی تێكەلیێن خوە بەرفرەهكری، ل ڤێرە و وێرا هە دوست و هەڤال ژ خوەرە پەیداكری، ئێدی تورێن وان یێن هەولگیریێ‌ وەكە دهاتە خوەیاكرن گەلەك بهێزكەفتن و پێتڤیاتیا وان بكەسێ‌ نەما، د سەردەمەكێ‌ دە چ سەیارەكا پەكەكە تێدا بانە ئێكسەر دبوویە ئارمانجا فروكێن وان یێن بێ‌ فروكەڤان، گرنگە دەسهەلاتا دەڤەرێ‌ دڤی بواری دە یا هوشیار بیت، دەمێ‌ پرس مەزندبیت و ژ دەستدەردكەڤیت ئێدی فایدە نادەت.

 

 

  • 1