ئەمە بڵاوبكەوە
FaceBook  Twitter  

 

شەوێكی ناوەڕاستی مانگی شوباتی 1974 بۆ ماڵی ناوبراو چووین، كە بەژووركەوتین (ن) بەتەنیا لەماڵ بوو، گلۆپی حەوشەكەی كوژاندبۆوە، و لەژوورەوەش تەنیا دوو گلۆپ داگیرسابوو، ماڵەكەشی گەورە بوو ژووریشی زۆر بوو، ماڵەكەی هەر لە فەرمانگەیەكی ئەمن دەچوو، دوای كەمێك پشوودان كۆبوونەوەی لێكۆڵینەوە بە سەرپەرشتی هاوڕێ (عادل سەلیم) سازدرا و بە هێمنی هاوڕێ (عادل سەلیم) بابەتی كۆبوونەوەكەی خستەڕوو، باسی سەفەرەكانی (ن . ی) بۆ ناوچەی گەڵاڵە و دیداری لەگەڵ هەندێ بەرپرسی پارتی خستە بەردیدی (ن)، لەكاتێكدا دەیان كادیر و ئەندامانی حزب لە بەندیخانەی (دەربەندرایات) بەند بوون، و جگە لە پەیوەندی ژێربەژێری لەگەڵ ئەفسەرێكی پلە باڵا لە ئۆردوگای سەربازی هەولێر. ئیتر گفتوگۆ بەردەوام بوو تا كاتژمێر دوانزەی نیوەشەو، بەبێ ئەوەی نە ئاو و نە چاو نە نانە رەقەش هەبێت، تەواو ماندوو و شەكەت بووین، هاوڕێ (عادل سەلیم) گوتی با پشووێك بدەین و رووی لە (ن)  كرد و گوتی: هەی سەرگەورە (زۆرجار هاوڕێ عادل ئەو دەستەواژەیەی بۆ خۆشی لەگەڵ هاوڕێیان بەكاردەهێنا)، بەڵام ئەو جارە جۆرێك ناڕەزایی پێوە دیار بوو، ئەوە چییە نە ئاو و نە چاو نە نانێك هەیە؟ لە ئێوارەوە هەر جگەرە هەڵدەمژین، بڕۆ هەندێ نانە رەقە بێنە، هاوڕێیان (عادل سەلیم و محەمەد شێروانی  و جەبار حەسەن)  جگەرەكێشی ژمارە یەك بوون جگە لە (ن. خ. خ)،  ژوورەكە هەمووی چڕە دووكەڵ بوو. لەوەڵامدا گوتی: كەس لە ماڵ نییە و، چوو هەندێ نانی وشكی هێنا. پاشان كۆبوونەوەكە بەردەوام بوو، هەرچی هەبوو خرایەڕوو، (ن خ) كەمێك بێدەنگ بوو، لەدوا وتەی گوتی (من هەر شیوعیمە و لە هەر جێگایەك بم خراپە بەرانبەر بە هاوڕێیانی حزب ناكەم، ئینجا ئێوە كەیفی خۆتانە هەرچی بڕیار دەدەن ئازادن، بۆ مێژوو دەڵێم (ن) قسەكەی راست دەرچوو، ئەوەندەی ئاگاداربم هیچ كردەوەیەكی خراپی دژ بە حزبمان نەكرد، دوای ئەوەی پەیوەندییەكانی بەتەواوی زانرا لە حزب دەركرا.

هەر ئەو ماوەیەی كە ئەمینداری گشتی بوو، بەهیچ شێوەیەك هەوڵی نەدا منداڵەكانی لەمنداڵانی هاوڕێیان و هەژارانی شاری هەولێر جیا بكاتەوە و واستە بۆ مناڵەكانی بكات، هەر بۆ زانین لە ساڵی خوێندنی 1975 – 1976 خانەی مامۆستایانی سەرەتایی لە هەولێر كرایەوە، بەڵام بەعسییەكان هەوڵیاندا تەنیا قوتابی بەعسی وەربگرن، یان یەكێك ئەگەر واسیتەیەكی گەورەی هەبووایە، هاوڕێیانی قوتابی شیوعی و یەكێتی گشتی قوتابیان وەرنەدەگیران، شوان و جوانی هاوڕێ عادل سەلیم دەرچووی قۆناغی ناوەندی بوون و دەیانویست بچنە خانەی مامۆستایانی سەرەتایی، بەڵام ئەوانیش وەكو قوتابیانی تر كە بەعسی نەبوون وەرنەگیرابوون، رۆژانە شوان و جوان لەگەڵ قوتابیانی تر كە دەرچووی قۆناغی ناوەندی بوون، دەچوونە خانەی مامۆستایان، بەڵام وەرنەدەگیران، رۆژێكیان وام بەبیرداهات كە شوان و جوان لە خانەی مامۆستایان وەربگیرێن و ببنە مامۆستا لەدواڕۆژ بۆ هاوڕێ عادل سەلیم باش دەبێت، ئەگەر بارودۆخێكی خراپ و نالەبار بۆ حزب بێتە پێشەوە و دیسان هاوڕێ عادل سەلیم دەربەدەربێت یان تووشی بەندیخانە بێت، ئەوكات شوان و جوان دەتوانن ئاگایان لە دایكیان و شەماڵ و هەڤالی برایان كە بەتەمەن بچووك بوون، بێت، بۆیە بڕیارمدا ئەم بیرۆكەیە بخەمە بەر دیدی هاوڕێ عادل سەلیم  كاتێك بیرۆكەكەم لەگەڵ هاوڕێ (عادل سەلیم) باس كرد، هاوڕێ سەیرێكی كردم و بەهێمنی لێیپرسیم (باشە ئەدی منداڵی هاوڕێیان و هەژاران چۆن وەردەگیرێن؟ لەوەڵامدا گوتم، وەرناگیرێن ئەگەر واستەیان نەبێت، هاوڕێ عادل فەرمووی (باشە با شوان و جوانی ........ن وەكو منداڵانی هاوڕێیان و هەژاران وەرنەگیرێن و وتە كوردانەكەی بە جوانی كچە تاقانەكەی گوت، من ئەوكات شەرمم لەخۆم كرد و ئێستاكەش هەر شەرم لەخۆم دەكەم. ئەو بیرۆكەیەشم لەوەوە بۆ هات كە بەڕێز موسا سەمەد ئەوكات ئەمینداری گشتی پەروەردە و كوڕی پوری هاوڕێ عادلیش بوو، وای بۆ چووم هاوڕێ عادل تەنیا تەلەفۆنێكی بۆ بكات بە ئاسانی شوان و جوان وەردەگیرێن، بەڵام ئەوەم لەیاد نەبوو كە هاوڕێ عادل سەلیم سەركردەیەكی بەدیمەن و باڵا بەرز و بەردەوام رووەو ئاسۆ دەڕوانێ و پۆڵایەكی وا ئاو دراوە لەبەرانبەر هیچ هێزێك مانای چەمانەوە و گەڕانەوە رووەو دواوە نازانێت. هەر بەو بڕوا و هێز و توانایەی رووبەڕووی دیكتاتۆری عێراق (سەدام حوسێن) لە كۆبوونەوەیەكی فراوانی (بەرەی نیشتمانی و نەتەوایەتی پێشكەوتووخواز) بە بەشداری تەواوی ئەندامانی لیژنەی بەرە لە پارێزگاكانی عێراق، وتەكانی دیكتاتۆری رەت كردەوە و روونكردنەوەی پێویستی لەسەر بارودۆخی كوردستان پێشكەش كرد و (سەدامی دیكتاتۆری) بەدرۆ خستەوە.

 دوا بەدوای ئەم كۆبوونەوەیە هاوڕێ (عادل سەلیم) لە ئەمینداری گشتی لادرا و ناو و دەنگی هاورێ عادل لەسەرتاسەری عێراق و كوردستان بووە جێگای بایەخ و لێكۆڵینەوەی جەماوەر، هەر ئەوكات لەكۆبوونەوەی محەلی باس لەمەترسی سەر ژیانی هاوڕێ عادل كرا، هەر بەم هۆیەوە هاوڕێ عادل سەلیم لەلایەن پیاوانی بەعس لە لقی حزبی بەعسی عەرەبی سۆسیالیست لە كەركووك ژەهرخوارد كرا و شەهید كرا، بەبێ چەمانەوە و بەسەربەرزییەوە چووە ریزی شەهیدانی حزب و نیشتمان و گەلەوە.

لێرەدا بە پێویستی دەزانم ئاماژە بە ساتی بڵاوبوونەوەی هەواڵی شەهید بوونی هاوڕێ (عادل سەلیم) لەناو شاری هەولێر بکەم، هاوڕێیان و دۆستانی حزب كەوتنە جووڵە و هەواڵەكەیان وەكو تیشكی بروسك گەیاندە جەماوەر، و شاری هەولێر هەژا و تێكقژقژا و بەشێك لەجەماوەر و هاوڕێیان دوكانەكانیان داخست و لەماوەیەكی كەمدا دەوروبەری بارەگای حزب و ماڵی هاوڕێ عادل سەلیم بەسەدان كەسی لێ كۆبووەوە، بەسەدانیش روویان لە نەخۆشخانە كرد كە تەرمی پیرۆزی هاوڕێ عادلی لێ بوو، شەقامەكانی شاری هەولێر رەشپۆش كرا و بەدەیان لافیتەی رەش هەڵدەكران، و هاوڕێیان و جەماوەرێكی زۆر پارچە پەڕۆی رەشیان لەباخەڵی خۆیان دابوو، هەواڵەكە بەتەواوی قەزا و شارۆچكە و گوندەكاندا بڵاوبۆوە، جگەلە بڵاوكردنەوەی هەواڵی شەهیدبوونی هاوڕێ (عادل) لەسەرتاسەری كوردستان و عێراقدا بەسەدان هاوڕێیانی ئافرەت لەحەوشەی ماڵی هاوڕێ عادل سەلیم شینیان دەگێڕا لەروو و سنگی خۆیان دەدا، هاوڕێ عادل دڵسۆز و خۆشەویستی  هەمووان، سەركردە و هاوڕێ و دۆست و برای تەواوی ئەندامانی حزب بوو بەبێ جیاوازی، جگە لەوەی پەیوەندی كۆمەڵایەتی و دۆستایەتی و برادەرایەتی لەگەڵ جەماوەری هەولێر گەلێك فراوان بوو، تەواوی ئەندامانی مەكتەبی محەلی و ئەندامانی محەلی پیتاكیان لەجەماوەر كۆدەكردەوە، بەردەوام هاوڕێ (عادل) زۆرترین پیتاكی كۆدەكردەوە.

كاتێك تەرمی هاوڕێ (عادل سەلیم) بەرەو گۆڕستانی (شێخی چۆلی) بەڕێ خرا، بەهەزاران ئەندام و دۆست و لایەنگرانی حزب و جەماوەر بەدواوەی بوون، هەر لەم كاتەدا بەدەیان لەپیاوانی فەرمانگەی ئەمنی هەولێر كامێرای وێنەگرتنیان بەدەستەوە بوو و وێنەی جەماوەریان دەگرت، بەڵام جەماوەری ئازا و خۆڕاگری هەولێر بەدژی پیاوانی (بەعس و ئەمن) زیاتر و زیاتر بەرەو پیری رێڕەوەكە دەهاتن و بەڕێز و خەمبارییەوە بەشداریان لەناشتنی هاوڕێی سەركردە و شەهید كرد.

نەمری و سەربەرزی بۆ هاوڕێ (عادل سەلیم) شەهیدی رێگای ئازادی گەل و نیشتمان.

  • 1