ئەمە بڵاوبكەوە
FaceBook  Twitter  

لەڕوانگەی چینایەتیەوە

لەسیستەمی سیاسی زۆربەی ووڵاتانی دیموکراسیدا خه باتی ڕۆژانەی جەماوەر لەخستنە ڕووی داواکاریە ڕۆژانیەکاندا کارو چالاکیەکی کەم و دیارکراوی دەوێت هاوڵاتیان ڕوو بەڕووی زەحمەت و وەڵام نەدانەوە نابنەوە، هەرلەپێشکەش کردنی داخوازی یان واژۆ کۆکردنەوە یان پێشکەش کردنی یاداشتنامەیەک ، پەرلەمان دوای دیراسەکردنی داخوازیەکە ڕاستەوخۆ هەوڵی دابین کردن یان جێەجێکردنی داواکاریەکە دەدات وئاراستەی لایەنی پەیوەندیداری دەکات لەڕێگەی دەرکردنی یاسا یان ڕێنمایی وڕاسپاردەوە ، هەربۆیە هاونیشتمانیان بەئومێدەوە لەکاری پەرلەمانی دەڕوانن .

بەڵام لەووڵاتانی بەڕووکەش دیموکراسی بەتایبەت ئەو ووڵات یان هەرێمانەی کە دیموکراسیەت بەدامەزراوەییی نەکراوە و نەبووەتە کلتور و وەک بەهایەکی ڕێزلێگیراو چاوی لێ ناکرێت ، نموونەی ئەزموونی تاڵ وناشیرینی تاکڕەوانەی دەسەڵاتی هەرێمی کوردستان کە لەماوەی چەندین ساڵی ڕابردوودا بەهەزران جار خەڵکی داواکاری بەنووسین و دەربڕینی ڕاوسەرنجی خۆیان لەمیدیاکان یان لەڕێگەی پێدانی یاداشتنامە و هەڵمەتی واژۆ کۆکردنەوە و هەڵمەت وکەمپینی جۆراو جۆرەوە تابەخۆپیشاندان و مانگرتن و بایکۆت و ناڕەزایەتی دەربڕینی توند دەکات ،کاروچالاکیان لەچوارچێوەی یاساو ڕێکارەکان و لەزۆربەیاندا بەڕەچاو کردنی سیستەمی گشتی و بنەماکانی دیموکراسی کارو چالاکی ئەنجامدراوە .

بەڵام ئەم دووحزبە حکومڕانە بەجدی و بە پێی پێوویستی خەبات و ڕەوایەتی داواکاریەکان لە (دامەزراندن ،لە هەلی کار ،لە پێشێل کردنی ئازادیەکان و ،لەدادگای کردنی تاوانباران و گەندەڵکاران ، و ئاڵوگۆڕ کردن لەسیاسەت و بەرنامەی کاری نیشتمانیانە کەڕەچاوی مافی هاوڵاتی بوونی ڕاستەقینەی نەکردوە بەڵکو تەنها لەبەرژەوەندی چینی باڵادەست و گروپی دەست ڕۆیشتووی ناوحزب ودەسەڵاتی حکومەت کاریان کردووە .

دوو دەسەڵاتی پشت بەستوو( بەلۆژیکی هێز) نەک پشت بەستن بە (بەهێزی لۆژیک) هەڵوێستیان نواندوە وە لەکاتی بەرفراوان بوونی ناڕەزایەتیەکاندا زەبروزەنگیان پیادەکردووە، یان لەساتەوەختی هەڵبژاردنەکاندا بەدەیان بەڵێنیانداوە بەڵام لەهەر فرسەتێکدا بۆیان گونجاو بووبێت پاشگەزبوونەتەوە لەبەڵێنەکانیان و بەپێچەوانەوە و سەرکوت و تووندوتیژیان ئەنجامداوە دژی جەماوەری کوردستان و پەرلەمانیان خستۆتە خزمەتی جێبەجێکردنی سیاسەتەکانی حکومەتی هەرێم و دەستەوگروپی دەست ڕۆیشتوی بۆرجوازی مشەخۆرەوە.

بۆیە لەدۆخێکی ئاوادا کە نایەڵن دامەزراوەیەکی نیشتمانی ونوێنەرانی گەل بەحەق نوێنەرایەتی هاونیشتمانیان بکەن ،دەبێت جەماوەر بەگشتی و چینی کرێکارو توێژی مووچه خۆران ولەپێشەوەی ئەمانەش هێزو حزبە چەپ و دیموکراتیەکان وئۆپۆزسیۆن بەتایبەتی بەردەوامی بدەن بەخەباتی ڕۆژانە و بەبەرنامەیەکی چڕوپڕی دەوڵەمەند و بەخستنە ڕووی ڕێگە چارەی سیاسی و ئابووری کە بتوانێت دەستەبەری عەدالەت بۆخەڵک بکات و مرۆفەکان دەسەتیان بەمافەکایان بکات .

ئەگەر لە ڕوانگەی چینایەتیەو بڕوانینە مێژووی تێکۆشانی خەڵکی هەژار وزەحمەتکێش لەبەرامبەر دەسەڵاتداراندا هەمیشە بەزەبری هێز و خەباتی بێووچان وقوربانیدان چین وتوێژەکان بەئامانجەکانیان گەیشتوون و وەک وانەکانی مێژووی ململانێی چینایەتی فێرمان دەکات ( دەسەڵاتی سەرمایە بێ فشار وشۆڕش وزەبروزەنگی شۆڕشگێڕانە وخەباتی جەماوەری واز لەدەسەڵات ناهێنێت ) لەسەربنەمای ئەم واقعیە سیاسی وکۆمەڵایەتی وبەرنامە سەرمایەداریان ئەو هەموودەستێوەردانە هەرێمایەتی و نیودەوڵەتیانەی هەیە لەهەرێمی کوردستاندا ،

هاوتای خەباتی پەرلەمانی و ئیعلامی (سەرەکیترین و گاریگەرترین شێوازی کاری سیاسی خەباتی جەماوەری هەمیشەییە دوور لەکاری وەرزی) و خستنە ڕووی جێگرەوەی بەرنامە و سیاسەتی دەسەڵاتدارێتیە ودەبێت بەبەرنامە ڕووبەڕووی حکومڕانان بووەستینەوە بەدروشمی شۆڕشگێڕانە و بەبەرنامەی هەمەلایەنە و بەردەوامیدان بەتێکۆشانی شەقام و دروست کردنی جولانەوەی جۆراوجۆری جەماوەری بەرفراوان ودرێژ خایەن و لەحاڵەتی نەهاتن بەدەم داواکاریەکانە وە بەردەوامیدانە بە هەڵوێست و هۆشیارکردنەوەی جەماوەر و ڕێکخستن و هاندانیان و دێژەدان بە بزووتنەوەی جەماوەری دژی دەسەڵاتدارێتی سەرمایەداری تازە پێاکەوتو و هەڵتۆقیوی ناو دنیای سیاسی ئەمڕۆی کوردستان .

دواجار وانەکانی مێژوو دەرئەنجامی زۆر ڕوونی  داوە بەدەستی خەڵکەوە .

 

  • 1