ئەمە بڵاوبكەوە
FaceBook  Twitter  

جەنابی مەعالی،  ئەمە خۆ  نوشتاندنەوە و کرووزانەوەیە !

ماکرون چیتان بۆ بکات ؟

 

لە سەر و بەندی سەردانەکەی سەرۆکی فەڕەنسا بۆ بەغدا بۆ بەشداریکردن لە کۆنفڕانسە هەرێمییەکەی ( هاوکاری و هاوبەشی ) لە ٢٨ / ٨ / ٢٠٢١ ، دواتر هاتنی بۆ هەرێم ، راگەیاندن و میدیا کاران ، ئەو سەردانەیان قۆستەوە و بە مێژوویی کردیانە مانشێتی پان و بەرینی هەواڵەکانی بینراو و بیستراو و نووسراو ، بە باوەشی گەرم و ماچ و مۆچ ، وەك ئەوە وابێت هەنگیان لە داردا  دۆزیبێتەوە !

بەدەر لەوەی ماکڕون سەرۆکی فەڕەنسایە ،  فەڕەنسا ئەندامی ناتۆ و یەکێتی ئەوڕوپایە ، ناتوانێ بەدەر لە نەخشە و ئەجیندا داڕێژراوەی ئەو دوو ئۆرگانە هەڵسوکەوتبکات ، فەڕەنساش وەك سەرجەم داگیرکارە زلهێزەکانیتر ،  مێژوویەکی قێزەون و خوێناوی و پڕ لە شەرمەزاری هەیە لە کوشتن و تاڵانکردن و سەرکوتکردن لە ڤێتنام و وڵاتانی ئەفریقی و بەناو بەهاری عەرەبی ، بەتایبەتیش لە  لیبیا  ......... . 

ئەو سەردەمە مۆدێڕنە ، قۆناغێکی نوێ و مەترسیدارە لە شەڕی نەرمی لەجیاتی و مۆنۆپۆڵکردن و داگیرکاری بە چەمگێکی نوێ بەدەر لە دروشمی زل و باقوبریقی مافی مرۆڤ و ئازادی دیموکراسی سەرمایەداری کە تەنها بۆ چەواشەکاری و ساختەکاری گەنگەشەی بۆ دەکەن .

دەبێ ئەوە بوترێ سەردەمی فەڕەنسای فڕانسوا  میتران ، سەردەمی زێڕینی کوردی باشوور بوو لە هاریکاری و بە دەنگەوەهاتنی نێو دەوڵەتی بۆ ورووژاندنی پرسی کورد و نەهامەتییەکانی لە نێوەندەکان ، دەرکەوتەکەی چەسپاندنی زۆنی دژە فڕێن بوو دوای راپەڕین لە نەتەوە یەکگرتووەکان . لە مانگی تەمموزی ساڵی ١٩٩٥ ، میتران و دانیالی هاوسەرەکەی بانگهێشتی هەردوو سەرۆکی حزبی یەکێتی پارتی بۆ کۆشکی ئێلێزێ لە پاریس کرد بۆ کۆتایی هێنان بە ململانێی ناوخۆ و پڕۆژەی ستاتیۆیەکی سەربەخۆی کوردی باشووری پێدان بۆ خۆ بەڕێوەبەری و پێیانڕاگەیەنرا کە فەڕەنسا بە هەموو هێز و توانایەوە پاڵپشتی لە کورد دەکات ( بە گوێرەی پێداچوونی شارەزایان ، ناکرێ ئەو هەنگاوە مەزنە بە بێ گەرەنتی و پاڵپشتی هەندێ لە وڵاتان بەدەر بێ و پرسیان پێ نەکرابێت ) ، بەڵام ئەجارەشیان خیانەت لە دۆزە رەواکەیکرا و پڕۆژەکەش بووە قۆچی قوربانی بەرژەوەندی دەسەڵات و بەرژەوەندیە رەهاکەی بنەماڵە و رادەستی میتی تورك کرا ، کە نەك هەر دوژمنی تاکی کوردە بەڵکو رقی لە دار و بەردەکەشێتی و دەمێکە جەنگی پیرۆزی جیهادی دژی گەل ی کورد راگەیاندووە ، وەك چەمانەوە و کرووزانەوە و سواڵکردنی پارە لە پریمەری حاکمی عێراق دوای رووخانی ،  لە بری ستاتیۆیەکی سەربەخۆ ! 

باشوور بووە مەکۆی سەردانی بەرپرسە بیانییەکان لە ئاستێکی بەرز ، هەر هەموویان جەختیان لە سەر رێکخستنەوەی ناو ماڵی کوردی کردووە و بوونی سوپایەکی بەهێزی یەکگرتووی توکمە و پرۆفیشناڵ ، تا کار لەکار نەترازاوە بەخۆدا بێنەوە بۆ پاراستنی ئەو قەوارەیە ، سەرجەمی ئەو بەڵێنانەی کە بە کورد دراون ، کە هێشتا نەکەوتۆتە بەر چاو و گوێی خەڵك و راگەیاندنەکان ، لە ئەنقەڕە و تاران سەوزەڵێیانە ! 

پاریس و زلهێزەکان ، گوایە چی بکەن و چ    متمانەیەکیان بە کوردا هەبێ کە خۆی نۆکەرایەتی بێگانە و خیانەت بژاردەیبێ و دەوڵەتی نەوێت ، خۆ بە زۆریش پێیاننادرێت ! ئەدی ئەوە نیە بۆ ئاویش داوایان لە خێرخوازان و کونسوڵی وڵاتانکردووە هاوکاریانبن !

  کات خێرا دەڕوات ، پەند لە مێژوو وەرنەگیرا و چەقۆش گەیشتۆتە سەر ئێسقان و خەونی درێژی بەناو خەباتی  سێ چارەکە سەدەی بەناو کوردایەتی ،  درۆیەکی شاخداری گەورە و چنینەوەی شکست و کەڵەکە بوونی نسکۆکان و بێ هیوا بوون و لەسێدارە دانی شکۆی نیشتمانێك تێپەڕینەکرد ، ئەمەش ئەو راستیە دەسەڵمێنێت کە گۆڕەپانی سیاسی کوردی پێویستی بە خەباتی کارگەراییە نەوەك خێڵگەرایی .

 

  • 1