ئەمە بڵاوبكەوە
FaceBook  Twitter  

 

ئەو هاووڵاتیانەى کە بەدواى هەواڵى دەست درێژیەکانى تورکیادا ئەچن لە هەرێم / ى کوردوستان دا. زۆریان سەریان سوور ئەخوات لەم هێرش و پەلامارە هەمە جۆرەى تورکیا. دژى خەڵکى بێ خەتاو تاوانى کوردوستان. لەم دەست درێژى و تاوانە کە چل ساڵە بەرانبەر بە کورد پەیڕەوى ئەکات. کوشتن, ماڵ و زەرعات و باخ و ئاژاڵ سوتاندن. دەربەدەر کردن کە ڕۆژ لە دواى ڕۆژ لە پەرەسەندن دایە و توندو تیژتر ئەبێ. سەریان سوڕماوە و ئەپرسن تۆ بڵێى هەرێم بەشێک بێت لە تورکیا؟! ئەگینا چۆن فڕۆکە جەنگیەکانى بۆمباران کردنى کوردوستان ئەگەنە پێنجوێن؟ کە زیاد لە دو سەد کیلۆمەتر لە سنورى تورکیاوە دورە!! چۆن لە هەر ناوچەیەک بیانەوێ. بنکەو پایەگاى سوپا دائەمەزرێنن؟ ئەگینا چۆن وەزیرى بەرگرى تورکیا بەسەر ئەو بنکە و پایەگانەدا ئەگەڕێ. هەروەک لەناو خاکى تورکیا دابێ.. چۆن بە بێ پرس و ڕا سنورى نێو دەوڵەتى عێراق ئەبەزێنێ...؟!

       ئەم هەڵوێستە دوژمنانەى تورکیا بەرانبەر بە گەلى کورد. پەیوەست نیە بە بون و نەبونى (پەکەکە) ەوە بەڵکو رق و کینەى دەمارگیرى نەتەوەییە بەرانبەر بە کورد. کێشەى پەکەکە تەنها بیانوە, چونکە دوژمنایەتى تورکیا بەرانبەر بە کورد ئەگەڕێتەوە بۆ ساڵى ١٩٩٣ کە لە ئەنجامى ڕاپەڕینەکەى ئازارى ٩٩١. یەکەم حکومەتى کورد لەم بەشەى کوردوستان دا پێک هات. ئەو کاتە تورکیاو ئیران و سوریا بە هاندان و دەست خۆشى لێکردنى (سەدام). هەڵوێستى دوژمنانەى خۆیان یەکخست و چەند کۆبونەوەیەکى (سێ قۆڵى) یان لە ئەتفەرە و دیمەشق و تاران ساز دا. بەمەبەستى هەڵوەشاندنەوەى قەوارە کوردیەکەى کوردوستانى عێراق. تا ئەوە بو بە پیلان و دەست تێوەردانى ئەوان شەڕى ناوخۆى هەرێم لە ١/٥/٩٩٤ دا هەڵگیرسا و حکومەتەکەى کەرت وپەرت بو. جاریکى تر خەڵکى ئەم وڵاتە ماڵ وێران و دەربەدەرکرا. و هێزى چەکدار و موخابەراتى تورکیا و ئێران ڕژانە هەرێم/ ەوە.

       لەو کاتەوە تورکیا بە تایبەتى چەندین بنکە و پایەگاى سەربازى لە هەرێم دا داکوتاوە... ئەم دەست درێژیەى تورکیا هۆکارێکى مێژویى ترى هەیە. ئەگەڕێتەوە بۆ ساڵى ٩١٨ کە حکومەتى عوسمانى ڕوخێنرا. و ولایەتى موسڵ واتە کوردوستان بو بە کێشە لە بەینى حکومەتى (کەمال ئەتاتورک) و حکومەتى بەریتانیا دا. تا ساڵى ٩٢٥ کە ئەو ولایەتە بە شارەزور/ یشەوە کەوتە دەست بەریتانیا و لەگەڵ هەردو ولایەتى بەغداد و بەسرە دا دەوڵەتى عێراق/ یان لێ پێک هێنرا!!

       لەو ساڵەوە حکومەتەکانى تورکیا بە تەماى ئەوەن کە ئەم هەرێم/ ە جارێکى تر بخەنەوە سەر کۆمارى تورکیا چونکە بە ئەقڵیەتى سوڵتانەکانى عوسمانى بیر ئەکەنەوە.

       لەبەر ئەمەیە کە لە ساڵى ٩٨٢ وە وەبە بیانوى ئەوەى کە گوایا پەکەکە, لە خاکى هەرێم/ ەوە پەلامارى تورکیا ئەدەن... ئەم دەست درێژیە بگرە ئەم داگیرکردنە ساڵ لە دواى ساڵ لە پەرەسەندن دایە و خەریکە هەمو هەرێم ئەگرێتەوە. واتە ئەمە لە خۆى دا هەوڵێکە بۆ زەوتکردنەوەى ولایەتى موسڵ/ ى جاران

       ئەوەى زیاتر سەرنج رائەکێشێ ئەم دەست درێژیە تاوانکارییەى تورکیا بە ئاگادارى حکومەتى ئەمریکا ڕوئەدات. کە خۆى بە هاوپەیمانى ستراتیژى عێراق دائەنێ. و لە لایەکى ترەوە بنکەى سەربازى و فڕۆکەخانەى جەنگى و باڵیۆزخانەى لە هەرێم دا هەیە. کورد واتەنى ( ئەم ماستە مویەکى تێدایە یان ئەم دوکەڵە بێ ئاگر نیە).

جاتۆ بلێى هێزو کەسایەتیە نیشتمان پەروەرەکانى کورد دەرکیان بەم پیلانە کردبێ؟! 

  • 1