ئەمە بڵاوبكەوە
FaceBook  Twitter  

 

21 ی شوباتی هەموو ساڵێك رۆژی جیهانی زمانی دایكە، پێدەچێت ئەوە یو ئێن ئەو رۆژەی دەستنیشان كردبێ، هەڵبەتە هۆكارێك لە پشت ئەو رۆژەیە، لێ من نامەوێ باسی هۆكارەكە بكەم بەقەت ئەوەی باس لە پیرۆزی زمان دەكەم.

لەدنیادا هەزاران زمان و زارۆكە هەیە، هەندێكیان توانەوەو هەندێكێشیان كە ریشەیەكی پتەوی هەبوو هێشتا زیندوون و بە ملیۆنان قسەی پێدەكەن، زۆررینەی ئەوانەی توانەوەو نەمان یان لەژێر داگیركاریدا لەناوچوون یاخود خاوەن زمانەكان نەیانتوانیوە بیپارێزن و بەزمانی دی قسەیان كردووە، ئەوەتا زمانی كوردی لەوەتەی دنیادنیایە لەژێر فشاردا بوەو رژێمە داپڵۆسێنەرەكان ویستویانە لەناوی ببەن و زۆر كاریشیان لەسەر كردووە، بەڵام چونكە كورد هوشیار بووە تادێ گەشەی زیاتر دەكات و دەتوانین بڵێین دەوڵەمەنترین زمانی جیهانە.

دەمەوێ بڵێم هەركەس و خێزانێك لەنێو كۆمەڵگادا هەقی خۆیەتی بەزمانی خۆی قسەبكا، منداڵەكانیشی هەر بەو زمانە پەروەردە بكا، هەوڵدانیش بۆ بیربردنەوەی هەر زمانێك لەنێو كۆمەڵگاكاندا ئەوە نیشانەی كوشتن و لەناوبردنی ئەو میللەتەیە، ئەوەی من دەیبینم ئێستا چەندین قوتابخانەی بیانی و توركی لەم هەرێمەی ئێمەدا كراونەتەوە، ئەوە هەوڵێكە بۆ لەبیربردنەوەی زمانی دایك، نەخشەیەكە وڵاتە هەرێمایەتیەكان دایانڕشتووە بۆ پەراوێز خستنی زمانی كوردی، كەچی وەزارەتی پەروەردە بەردەوام رێگەپێدانیان دەداتێ و منداڵەكانی خۆشیان دەنێرنە ئەو قوتابخانانەو كوردیان لەبیر دەبەنەوە، ئەوەش پێمان دەڵێ ئەو حوكمەتۆكەی خۆمان لەجیاتی ئەوەی پلانی هەبێ كەچی پلانی لەدژ دەگێڕن و تەقەی سەری دێ.

زمان گەشە ناكا ئەگەر لەناوەندی دیموكراسی راستەقینە پەڕوباڵ نەهاوێ، بەتایبەت دەبێت دروشمی پێكەوەژیان هەبێ و ئەوجار ئازادانە رێگە بەهەموو نەتەوەكان بدرێ بەزمانی خۆیان بخوێنن و قسەبكەن، پێچەوانەكەی دەبێتە كارەسات بۆ زمانە كەمینەكان هەروەك لە ئێران توركیا دەگوزەرێ، هەروا گەشەكردنی زمانی دایك چەند پەیوەندی بە حكومەتەوە هەیە دوو ئەوەندە كۆمەڵگا، نابێت كاتێك دەزانین حكومەت پڕۆژەی نییە بۆ گەشەی زمان، ئێمە دەستەوەستان بین دەكرێ خۆمان بڕیار بدەین منداڵەكانمان دەنێرینە كام قوتابخانە، لە ماڵەوەش هەردەبێت بەزمانی دایك قسەیان لەگەڵ بكەین تا بزانن ئەو زمانە لەگەڵ یەكەم قومەشیر رژاوەتە هەناوی كۆرپەكانمانەوە.

  • 1