ئەمە بڵاوبكەوە
FaceBook  Twitter  

خەلەكا چوارێ‌

ئەم بگشتی یێ‌ دناڤ پروڤان دا، نورمالە دەما هاوەلاتیەك گازندا بكەت بێژیت ئەڤە چ كوردی یە هوون د مەدیایێ‌ دە پێ‌ دئاخڤن، ئەم تێناگەهین و فامناكەین، بەس نها گەلەك گوهرین یێن چێبووین، كار یێ‌ گەهشتیە ئەوی رادەی، زور جاران دێ‌ بینی د كەنالەكێ‌ تێلەفزیونی دە بێژەرەكێ‌ دەڤوكا سورانی یێ‌ هەڤدیتنێ‌ دگەل نڤیسكارەكێ‌ باكورێ‌ كوردستانێ‌ دكەت و چ گرفت ژی ناهێنە پێش، هەبوونا تێكەلیێن پتر دناڤبەرا بەشێن كوردستانێ‌ دا دێ‌ هێشتا زێدەتر مە پێشدا بەت ژبوی سەرخستنا پروپوزەلێ‌ ستانداردكرنا زمانێ‌ كوردی، ئەڤا دكتور لەزگین دبێژیت د ناڤا هەموو زمانان دە دوو جوریێن هەین ( زمانێ‌ گەلەری، زمانێ‌ فەرمی) ئەم دەما پیچەك ئاخڤتنا خوە مێسك دكەین دگەل بوتانی، خەلكەك دبێژیت ئها ئەڤە وەكە پەكەكێ‌ د پەیڤیت، ئەو رەوشا سقەت نە خەلكێ‌ چێكریە، بەلكو دەسهەلاتا دەڤەرێ‌ و بەرتەسكیا حزبیە دبیتە هوكارێ‌ هندێ‌ دەڤەر ڤەمایی بمینیت، رەۆشەنبیر و كەسێن نڤیسكار گەرەكە گوهنەدەنە ئەڤێ‌ چەندێ‌.

لجەم من گەلەك یا سەیر بو، دەما دكتور لەزگین ئانی زمان، كو د دیدارەكا مەدیایی دە نابیت مرۆڤ بێژیت: ئێ‌ مامو لجها ڤێ‌ مرۆڤ دكاریت بێژیت: سەیدا .. كەكا .. ئەزبەنی .. بەرێز ) پاشان گوتی ئەز دگەل بەرێز نینم، ئێ‌ باشە چاوا تو دگەل بەرێز نینی بەس دگەل پەیڤا ئەزبەنی، هەلبەت پەیڤا ئەز بەنی زێدە د كوچكێن كەسێن فەودال دە دهێنە بكارئینان، كو كەسێن جوتیار و تەخ و توێژێن عەشیرەتێ‌ نە دشیان د ئاستەكێ‌ وەكهەڤ دە مامەلێ‌ د كوچكا ئاغای دە بكەن، پەیڤا ئەزبەنی واتە دبێژیتە ئاغای ئەم بەنینە ئەم مرۆڤێن نورمالین تو نە توخمێ‌ مەی تو گەلەك یلنتری، وێجا ئەو ببیتە زمانێ‌ سەردەمێ‌ مەدیایێ‌ گەلەك تشتەكێ‌ سیرە ..!

ئەگەر وەكە دكتور لەزگین دبێژیت ل دهۆكێ‌ دو بزاڤ هەبن، كو ئێكا ژوان دهۆكی یا صرفبیت، تەڤگەرێن بڤی ئاوی یێن ناوچەگەریا بەرتەسك دێ‌ هەولێن وان یێن بێ‌ ئەنجام بن، بیروكا سورمانجی هەتا رادەكێ‌ بیروكەكا باشە، واتەیا ئەڤێ‌ بیروكێ‌ لێكنێزیكبوونە د بیاڤێن پەیڤان دا، هەر هەولەكا ئارمانجا وێ‌ دل ساخی بیت د مەبەستێت لێكنێزیكرنێ‌ دە فەرە كەدا وان مرۆڤ پیرۆزكەتن.

چاوان دەڤوكا سورانی بویە دەڤوكەكا سەردەست:

بەشێ‌ كوردستانا باشۆر دەما هاتیە گرێدان ب ئیراقێ‌ ڤە، سیاسەتا رازیكرنێ‌ هاتە بكارئینان ئەڤ مژارە هەتا رادەكێ‌ یا دویری شدەتێ‌ بوو، كورد رازیكرن لهەمبەری هندێ‌، كو ئەگەر ئەو بەشەكبن ل ئیراقێ‌ دێ‌ شادبن ب هن ئازادیان و دكارن ب زمانێ‌ خوە بخوینن و بنڤیسن، ئوكەیا كوردان بڤی ئاوایەی هاتە ستاندن، د هەمان دەم دا ژی تورك ژی رازیكرن ب وێ‌ چەندێ‌، كو ئەو سیاسەتەكێ‌ دێ‌ ب كارئینن، ئازادیا كوردێن باشۆر ب چ رەنگان باندورا خوە لسەر كوردێن باكور نەبیت، جەوهەرێ‌ ئەوێ‌ سیاسەتێ‌ ژی رژدیا بكارئینانا دەڤوكا سورانی بوویە، ژ وی چاخێ‌ ئەم بوویە بەشەك ل ئیراقێ‌ دەڤوكا سورانی دەڤوكوكا سەردەستە و پەروەردە ب وێ‌ دەڤوكێ‌ هاتیەكرن، پرانیا تەخ و توێژێن جڤاكێ‌ كوردستانی لسەر وێ‌ بنگەهێ‌ رەوشەنبیریا خوە ئاڤاكریە، رەۆشەنبیرێن كرمانجی ژی زێدە رەوشەنبیریا وان ب زمانێ‌ عەرەبی و دەڤوكا سورانی یە،ئەڤە راستیەكە ناهێتە ئینكاركرن.

دكتور لەزگین وەسا خوەیاكر، دەما نڤیسكارەكێ‌ كورد وەغەر دكە، مەدیایێن دەولەتێن داگیركەر دبێژن نڤیسكارەكێ‌ لوكال یێ‌ كوردان وەغەركر، بەرچاڤە كو مەبەستا وان بچویكرنە، دیسان دەما هەلبەستڤانەك ل سلێمانیێ‌ یان ل دهۆكێ‌ وەغەرێ‌ دكە، كەنالێ‌ كوردستان 24 و كەنالێن دن بو هەلبەستڤانێ‌ سلێمانیێ‌ دێ‌ بێژن مەزنە هەلبەستڤانەكێ‌ كوردستانێ‌ وەغەركر .. لێ‌ بو هەلبەستڤانێ‌ دهۆكێ‌ دێ‌ بێژن هەلبەستڤانەكێ‌ بادینان وەغەركر، شاشیەك مەزنە ئەم ئەڤێ‌ هەلسوكەوتا نە ڤەكولینكری بینە وی ئاستێ‌ ئەڤا دەولەتێن داگیركەر بكارتینن، چونكە ئەگەر بهویری ئەم بنێرین كەنالێ‌ كوردستان 24 پارتەكا سیاسی دەستەك دكە و سەرۆكێ‌ ئەوێ‌ پارتیێ‌ د بنگەها خوە دە كرمانجە، پرانیا پەیڤینێن وی ژی ب دەڤوكا سورانی نە، لگور نێرینا من ئەڤە مەزنیە و بێ‌ دودلی ژی زهنیەتەكا كوردستانیانە لپشتە ..!

نەیا دروستە ژبوی بیروكەكا بەرتەسك مرۆڤ كەسێن دن هاندەت، ئەگەر نڤیسكارەكێ‌ بادینان یان یێ‌ پارێزگەها دهۆكێ‌ ب دهۆكی نەك ب كرمانجی نڤیساند بیت، نها نەهێتە نیاسین گونەه زێدە یا وی یە، هەلبەستڤان مۆید تەیب وەكە میناك هاتە بكارئینان، باشە دیوانێن ئەڤی هەلبەستڤانی ئەگەر نەبنە لاتینی .. نە بنە عەرەبی .. نەبنە فارسی .. نەبنە ئنگلیزی .. نەبنە توركی و زمانێن دن، مەزناهیا وی تنێ‌ دێ‌ د چارجوفێن دهۆكێ‌ و دەڤەرا بادینان دهێتە دورپێچكرن و سنورێن وێ‌ زێدەتر دەرباسناكەت، د ڤیستەڤالەكا گەلاڤێژ دە ئەگەر ئەز شاش نەبم ژنەكا مەغربی ڤەكولینەك لسەر هەلبەستێن شێركو بێكەس چێكربوو، ئەگەر هەلبەستێن وی نەهاتبانە ڤەگوهاستن بو زمانێ‌ عەرەبی بێگومان ئەو چەند نە دهاتە پێكئینان، وێجا ئالیێ‌ سەرەكی یێ‌ نە بەرفرەه ناسكرنا رەوشەنبیر و نڤیسكارێن بەهدینان ئەو بخوەنە ..! ئەم فەرە دانپێدانێ‌ بڤێ‌ راستیێ‌ بكەین.

 

  • 1