ئەمە بڵاوبكەوە
FaceBook  Twitter  

لێدوانی پەیتا پەیتای بەرپرسە سیاسی و سەربازییەکانی ئێران بۆ هێرش بۆسەر بنکەو بارەگاکانی هێزەکانی ئۆپۆزیسیۆنی ئێران و تەنانەت بۆ سەر هەریمی کوردستان، زیاد دەکەن.

لەدواین لێدوانیدا باڵیۆزی ئێران لە بەغدا لە چاوپێکەوتنێکیدا لەگەڵ کەناڵی فەرمی عێراقیە، هەڕەشەی هێزی زەمینی بۆسەر هێزەکانی ئۆپۆزیسیۆنی ئێرانی دەکات، و هاوکات هەرێمی کوردستان بەبەرپرسیار دەزانێت لە سنور دانان بۆ جموجۆڵی هێزەکانی دژ بەری ئێران.

ئەم هەڕەشانەی بەرپرسانی ئێران لە هێزەکانی ئۆپۆزیسیۆنی ئێران تازە نییەو هاوکاتیش زۆر کەمتر پەیوەندی بەهێزەکانی ئۆپۆزیسیۆنی هەیە، بەڵکو راستەوخۆ هەڕەشەیە لە خەڵکی هەرێمی کوردستان و قەوارەکەی.

هێزەکانی ئۆپۆزیسیۆنی ئێرانی بەشێوەی گشتی، جموجۆڵی سەربازیان نییەو لە ماوەی ٣٠ ساڵی رابردوودا، بە دەگمەن روویداوە چالاکیەکی سەربازی کرابێت... ئەم چالاکییە دەگمەنانەش زۆرتر لەلایەن ئەو هێزانە ئەنجامدراون، کە کێشەی سەرەکیان لەگەڵ دەسەڵاتی ئاخوندەکان نییەو زۆرتر بەدوای ئەوەوەن کە ئاخوندەکان دەرگای گفتوگۆییان بۆ بکەنەوەو سوچێکی دەسەڵاتیان پێبدەن. بەجیا لەوانەش ئەم چالاکییە سەربازیانە، لە هەلومەرجی ئێراندا لە بنەرەتدا بەزیانی بزوتنەوەی کرێکاریی و نارەزایەتی جەماوەری لەشارەکاندا دەشکێتەوە و بە سودی کۆماری ئیسلامی تەواو دەبێت.

جمهوری ئیسلامی ترسی لە بزوتنەوەیی کرێکاریی و جەماوەری و سیاسی لە ناوەندە کرێکارییەکان و شارەکان هەیە، کە رۆژ بەرۆژ زیاتر پەرەدەسەنن و فراوانتر و دەبنەوەو بە ئاقاری رێکخراوبوونی هوشیارانەدا هەنگاو دەنێن... هاوکات جمهوری ئیسلامی کێشەی لەگەڵ هەرێمی کوردستان هەیە و لەگەڵ دەوڵەتی تورکیادا هەریەکەیان دەیەوێت رۆڵ و پێگەی خۆی لە کوردستان و هەریمدا زیاتر بکات، بەتایبەتیش کە پرسی چوونە دەرەوەی هێزەکانی ئەمریکا، لە ئارادایە.

دەسەڵاتی هەرێم، گۆشارەکانی لەسەر هێزەکانی ئۆپۆزیسیۆن، هێندە کاریگەرە کەنەک ڕێگای جموجۆڵی بەرجەستە بە هێزەکانی ئۆپۆزیسیۆنی ئیرانی نادات، بەڵکو هاوکاری هیزەکانی ئیران و دەزگاو باندەکانیان دەکەن بۆ سەر هیزەکانی ئۆپۆزیسیۆن، بۆیە ئیران کیشەی لەگەڵ دەسەڵاتی سیاسی هەرێم نییە، بەڵکو کیشەی لەگەڵ پرسی سیاسی خەڵکی کوردستانە و هەوڵدەدەن ئەو قەوارەیەی بۆتە ئەمری واقع، لاوازو سەرئەنجامیش ئەگەر بۆیان بکرێت لە بەینی ببەن.

هەروەها ئیران خوازیارە کە دەسەڵاتی هەرێمی کوردستان، بەتەواوەتی بەرووی ئیران و پاراستنی بەرژەوەندیەکانی ئەودا وەرچەرخێ و پشت بکاتە ئەمریکا و غەرب. بەتایبەتی لە ئێستادا کە ئەمریکا و ئیران لە گفتۆگۆ و سازاندان لەگەڵ یەکتری پرسی هەریمی کوردستانیش وەکو کارتێک لەلایەن هەردوو لایانەوە، بەدەستەوە دەگیرێت. ئیران دەیەوێت لەگەڵ ئەوەدا کە ئەمریکا ناچارە هیزە سەربازییەکانی لە عێراق و کوردستان بکێشێتەوە، خوازیارە حزوری سیاسی و هەوڵگری ئەمریکاش کەم بکاتەوە و گۆرەپانی سیاسی کوردستان بە پلەی یەکەم بۆخۆی ساغ بکاتەوە، لەوەش زیاتر لەبەرامبەر بە لەشکرکێشی و روڵی تورکیادا، دەیەوێت دوای کشانەوەی ئەمریکا رۆڵی یەکلاکەرەوە بگێڕیت.

لەهەموو حاڵەتێکدا، ئیران دەیەوێت بە پاساوی جموجۆڵی سەربازی هیزەکانی دژبەری ئیران، حزوری سیاسی و تەنانەت سەربازی خۆی لە هەرێمی کوردستاندا زیاتر بکات و لەو چوارچێوەیەشدا ئەوەی لەتواناییدا بیت لە هیرشی هەوایی و بۆمباباران و تیرۆری کادر و هەڵسوراوان تا دەگاتە هیرشی سەربازی، دەست پاریزی ناکات، بەڵام ئامانج تەنها هیزەکانی ئۆپۆزیسیۆن نییە، بەڵکە بەدوای ئامانجی ترەوەیە کە پەرەدانە بە حزوری سیاسی زۆرتری خۆی لەدوای رۆشتنی ئەمریکاو هاوکاتیش لاوازکردنی هەریمی کوردستان و ئەو قەوارە سیاسییە کە هەیە...

خەڵکی ئازادیخوازی کورستان و جەماوەری نارازی لەدەسەڵاتی بزوتنەوەی کوردایەتی، چۆن لەخەباتی بەردەوامدان بۆ راماڵینی دەسەڵاتی حزبە تاڵانچیی و مافیایەکانی هەرێم، ئاواش ئەرکیانە هەم پاریزگاری لە هیزەکانی ئۆپۆزیسیۆن بکەن و هاوکاتیش دەبێ پلان و نەخشەکانی جمهوری ئیسلامی لەڕیگای خۆپیشاندان و نارەزایەتی جەماوەرییەوە، لەناوخۆی کوردستان و دەرەوەی کوردستان بەشکست بکێشن، لەو راستایەشدا پشتیوانی بزوتنەوەی کریکاریی و جەماوەری لە بزوتنەوە کریکاریی و جەماوەری لە ئێراندا بە ئاقاری سەرکەوتندا، رۆڵی کاریگەر دەگێرێت، لە شکست پێهێنانی پلان و نەخشەکانی دەسەڵاتی ئاخوندەکاندا لە هەرێمدا.

  • 1