ئەمە بڵاوبكەوە
FaceBook  Twitter  

  

  ٭ ئەمڕۆ (٥٦)  ساڵ بەسەر تۆمارکردنی داستانی هەندرێن ،لە لایەن پێشمەرگە قارەمانەکانی حزبی شیوعی عیراق و دۆستەکانیان تێدە‌پەڕێت.ئەم داستانە  کۆتایی، یەک لە شەڕە هەرە ناودارو یەکلاکەرەوەکانی بزووتنەوەی ڕزگاریخوازی کوردە، لە ماوەی ١٩٦١-١٩٧٠ دا. کە تەنیا دەوروبەری ٢٥٠  پێشمەرگەی قارەمان، بە هێزی هێرش بەرو پشتیوان، بە چەکی سادەی دەستی پێشمەرگەو تەنیا سێ تۆپ، بەڵام بە ئیرادەیەکی پۆڵایین، توانیان لەسەر چیای هەندرێن، بەرامبەر شاری ڕواندز ،  لە پارێزگای هەولێر،لیوایەکی تەواوی سوپای داگیرکەری عیراق، بە هەموو کەرەستەی جەنگی و پاڵپشتی فڕۆکە و هەزاران جاشی بەکرێگیراویش هاوکاریان بوون،تێک بشکێنن و ڕیسوایان بکەن و گەورەترین زیانیان پێ بگەیەنن..

 لە دوای سەرکەوتنی پێشمەرگە لەم شەڕەدا، حکومەتی عیراق لە سەردەمی سەرۆک کۆمار عەبدولرەحمان محەمەد عارفدا، ناچار بوو ،داوای شەڕ وەستان و وتووێژ لە سەرکردایەتی شۆڕشی کورد بکات. دواجار بەیاننامەی عەبدولرەحمان بەزازی سەرۆک وەزیران بڵاوکرایەوە،کە دانی بە چەند داواکارییەکی شۆڕشی کورد داناو بۆ ماوەیەک شەڕ وەستاو هەردوولا پشوویاندا..بەڵام نە ئەو کات و نە دواترو نە تاکو ئێستاش حکومەتەکانی بەغدا، نەیان ویستووە مەسەلەی کورد بە شێوەیەکی بنەڕەتی چارەسەر بکەن و مافەڕەواکانی کورد جێبەجێبکەن.

سەرکردایەتییەکانی بزووتنەوەی ڕزگاریخوازی کوردیش،هەر لە ئەیلولەوە تاکو قۆناغی هەشتاکان و تاکو ڕاپەڕینی١٩٩١ و قۆناغی دوای ڕاپەڕینیش تاکو ئێستا، لە ئاست سەرکردایەتییەکی شۆڕشگێڕی نیشتمان و میللەت پەروەری خاوەن ئیرادەی سەربەخۆی دوور لە دەست تێوەردانی دەرەکی، دوژمن بە کورد نەبووینە.. لە  ئاست پاراستنی سەرکەوتن و دەستکەوتەکان و خوێنی پێشمەرگەدا نەبووینە، هەروەها لە ئاست خزمەت کردنی میللەتدا بە گشتی نەبووینە..هەرگیز سوودیشیان لە وانەو پەندەکانی مێژوو  وەرنەگرتووە..

 شایانی وەبیر هێنانەوەیە،کەوا داستانی هەندرێن،ئەو داستانە مەزن و مێژووییە،بە خوێنی سێ پێشمەرگەی قارەمان تۆمارکرا،کە ئەم نەمرانەن:( شەهید عەریف یونس هەولێری،شەهید خدر عەوڵا  بەگ دەرگەڵەیی،شەهید ساڵح مام ئەلیاس ڕواندزی) هەزار سڵاو بۆ گیانی پاکیان، یادیان بەخێر.

 تێبینی:تابلۆی ئەم سێ وێنە نەمرە،ساڵی پار هاوڕێی هونەرمەندی فۆتۆ، عومەر خدر کاکیل، تایبەت بۆ ئێمەی ئامادەکرد..جێگای سوپاس و ڕێزە.

  • 1