ئەمە بڵاوبكەوە
FaceBook  Twitter  

 

 

بەر لە 12 ساڵ ڕۆژنامەنووس سەردەشت عوسمان لە شاری هەولێر تیرۆركرا. تیرۆركردنی سەردەشت عوسمان لە تیرۆری ئازادیخوازانی پێشخۆی زۆر جیاواز بوو، گەر تیرۆری سۆرانی مامە حەمە لە كەركوك پاساوی بۆ بهێنرێتەوە كە دەسەڵاتەكان دابەشبوون لە نێوان بەغدا و پارتی و یەكێتی و بە شارێكی نائارام لە قەڵەم درابێت، ئەوا تیرۆری سەردەشت عوسمان لە ناوجەرگەی شاری هەولێری پایتەختی هەرێمی كوردستان و بە بەرچاوی هێزە ئەمنییەكانەوە دەرخەری حەقیقەتی كوشتنی ئەو گەنجە خوێنگەرمەیە لە لایەن خوودی دەسەڵاتدارانەوە.

تەنانەت تیرۆری كاوە گەرمیانیش لە ناوچەیەكی دوورەدەست لە ناوەند و هاوسنوور لەگەڵ ناوچە دابڕێنراوەكان بە بەراورد بە تیرۆری سەردەشت، وەها قوورس لەسەر دەسەڵاتداران و خوودی هێزەكانی پۆلیس و ئاسایش نەكەوتن. كە ساڵانێكە بانگەشەی بۆ دەكرا.

لەماوەی ئەم 12 ساڵەدا كەمترین قسەم لەسەر تیرۆری سەردەشت كردووە، پێم وابوو بۆ منی گەرمیانی گرنگە ڕەخنە لەو دەسەڵاتە و لەو هێزە بگرم كە دەسەڵاتداری ڕاستەوخۆی ناوچەكەی منە، نەك ئەو هێزەی لەوێ كەمترین دەسەڵاتی هەیە، هەر بۆیە هێندەی قسەم لەسەر تیرۆری كاوە گەرمیانی كردووە، قسەم لەسەر سۆران و سەردەشت و ویداد نەكردووە.

زۆرجار هەبووە كە ڕەخنەمان گرتووە لە یەكێتی، پێمانیان وتووە ئەو ئازادییەی لێرە لای یەكێتی هەتانبووە لەو زۆنەكە نیتانە، بێئاگا لەوەی ئازادی بەدەست دەهێنرێت و نابەخشرێت. جگە لەوەش هەمیشە پێموابووە یەكێتی و پارتی دوو هێزی لەیەكچوون و تاكە گرفتیان ئەوەیە زۆر لێك ئەچن، نەك لێك جیاوازبن، بۆیە نەمویستووە قسەكردنم لەسەر شەهیدانی قەڵەم پەیوەست بكەم بەوەی كامەیان مەترسی لەسەرم كەمترە، دەبێ زیاتری لەسەر بڵێم.

كێشەی حكومڕانانی دوای ڕاپەڕین ئەوەیە نەك عەقڵیەتی شاخیان هێنا و كردیانە بنەمای حكومڕانی لە شار، بەڵكو زۆرخراپتر لەو تیرۆرانەی پێشوو دەستیانكردە كوشتوبڕ و پاكسازی نەیار و ڕەخنەگرەكانیان.

ڕۆژنامەنووسانی تیرۆركراو لە ڕۆژنامەنووسی ناوچەیەك و دەزگایەكی لۆكاڵییەوە بەتیرۆركردنیان بوون بە موڵكی گەل و نەتەوە و بەرەیەك لە خەڵكی ناڕازی، دەبوو دەسەڵاتداران بیانزانیایە لە مێژوودا هیچ كوشتوبڕێك دەنگی ئازاد و دلێرانەی كز و بێدەنگ نەكردووە، بە پێچەوانەوە دوای هەر هەوڵێكی ترسنۆكانە، ئەو دەنگە كەم و كزانە بوونەتە هاوار و زریكەی حەشاماتێك لە حەقبێژ و ئازادیخواز و  زۆرجار بە تەفروتونابوونی فیرعەونەكانی دەسەڵات دامركاونەتەوە.

سیناریۆی پشت كوشتنی ڕۆژنامەنووسانی قەڵەم، كە خاوەنی هیچ نەبوون جگە لە قەڵەم و مینبەرێك بۆ بڵاوكردنەوەی ڕەخنە و نووسینەكانیان، بارتەقای كوشتن و ڕفاندنیان خەمناكە. هەرێمێك لانكەی داڵدەدانی سەدان تاوانبار بێت و هەموویان لە پلەی باڵای حزبی و حكومی بن، لەبری پەنابردن بۆ یاسا بیر لە سیناریۆ و كوشت بكاتەوە، واتا نەك تەنها بۆ ڕەخنەگران و دەنگە ئازاكانی، بەڵكو بۆ كۆی تاكەكانی ئەو هەرێمە زنجیرەیەك لە سیناریۆ و چیرۆك ئامادەن و ئەكرێت بیكەن بە بەری هەر كەسێكدا كە بیانەوێت.

دەسەڵات بە هەردوو زۆنەكەیەوە، بەرپرسیارن لەخراپ ئیدارەدانی حكومەت و جومگەكانی حوكمڕانی، بۆیە تەماشاكردنی كەیسی تیرۆری ڕۆژنامەنووسان و چالاكوانان بەگوێرەی زۆنەكان، جگە لە ناشیرینتركردنی خوودی دەسەڵات، هیچیتر نییە.

  • 1