ئەمە بڵاوبكەوە
FaceBook  Twitter  

بەشی دووەم

رەوەند

بەرلەوەی هاوڕێ حەیدەر لە ساڵی 1964 بپاڵێورێت بۆ ئەندامێتی حزبی شیوعی عێراق، دۆستی حزب بووە، یارمەتی حزبی داوەو بڵاوكراوەكانی حزبی پێگەیشتووە، هەروا پەیڕەوی ناوخۆو بەرنامەی حزبی خوێندبۆوە، و كەم و زۆر هەندێ جار پرسیاری دەربارەی هەندێ بڕگەو پرەنسیپەكانی پەیڕەوی ناوخۆ كردووە، هاوڕێ حەیدەر بەرلەوەی بپاڵێورێت بۆ ئەندامێتی حزب، بەشێوەیەكی باش خۆی ئامادە دەكات و بایەخ بەخوێندنەوە دەدا، ئارەزووی تەواوی دەبێت ببێتە ئەندام لەحزبدا، كاتێك ئەو هاوڕێیەی پەیوەندی لەگەڵدا دەبێت داوای لێ دەكات كە نامە بۆ حزب بنووسێت و خۆی داوا بكات بیپاڵێون، هاوڕێ حەیدەر ئەم داوایە بە خەڵاتێكی پیرۆزو مەزن دەزانێ و سێ و دووی لێ ناكات و نامەی داواكردن بۆ پاڵاوتنی خۆی دەنووسێت، و پاش ماوەیەكی كەم وەڵامی بۆ دێتەوە كە حزب نامەكەی پەسەند كردووەو بوویتە پاڵێوراو بۆ ئەندامیەتی حزب، هاوڕێ حەیدەر شاگەشكە دەبێت و پای زەوی ناگرێت و نازانێت بە چ شێوەیەك وەڵامی ئەو رێزلێنانەی حزب بداتەوە، هەر ئەوەندە دەتوانێت بڵێت كە دەبێت جێگای بڕوای حزب بم، دوای ئەوە دەخرێتە شانەیەكی پاڵێوراوانەوە، لەیەكەم كۆبونەوەی شانەكەدا، هاوڕێی بەرپرسی شانەكە، هاوڕێ حەیدەر بەهاوڕێیان دەناسێنێ و روو لە هاوڕێ حەیدەر دەكات و دەڵێت، تۆ ئێستاكە پاڵێوراوی بۆ ئەندامیەتی حزبی و دەبێت لەماوەی پاڵاوتندا كە نۆ مانگە بۆ قوتابیان و هەموو چین و توێژەكانی كۆمەڵگا، بەڵام بۆ كرێكاران ماوەی پاڵاوتن شەش مانگە، بەردەوام دەبێت و دەڵێت تۆ هەموو ماف و ئەركێكی ئەندامی حزبت هەیەو لەسەرە، تەنیا مافی خۆپاڵاوتن و دەنگدانت نییە، پێویستە لەماوەی پاڵاوتندا تەواوی ئەركەكانی ئەندامی حزب كە لەپەیڕەوی ناوخۆ هاتووە جێبەجێ بكەیت و وەكو سەركردەیەكی جەماوەری هەڵسوكەوت بكەیت، و دەبێت گرنگی بێسنوور بە كاتی كۆبونەوەكانی حزب بدەیت و نە زوو بێیتە شوێنی كۆبوونەوەو نە دوابكەویت، بۆ كاری حزبی ئێمە كات زۆر گرنگە، ئیتر لەمەودوا هەر دە رۆژ جارێك كۆبونەوە ساز دەدەین..

دوای ئەو ووتانەی بەرپرسی شانەكە، هاوڕێ حەیدەر سوپاسی حزب دەكات و دەڵێت دەبێت بیسەلمێنم كە دەتوانم ئەندامی حزب بم و ئەركەكان جێبەجێ بكەم و بەردەوام لەتەك هاوڕێیان بم و شادم كە ئێستاكە حزبیم.. ئیتر هاوڕێ حەیدەر لەجێبەجێكردنی ئەركەكانی حزب بەردەوام دەبێت و دۆست و لایەنگر بۆ حزب پەیدا دەكات و رۆژنامەو بڵاوكراوەكانی حزب دەگەیەنێتە دۆستەكانی و پیتاك و یارمەتی بۆ حزب كۆدەكاتەوە، لەماوەی پاڵاوتنەكەدا دەبێتە جێگای سەرنج و بایەخی هاوڕێی بەرپرس و ئەندامانی شانەكەو بەشدارییەكانی لەراپەڕاندنی ئەركەكان دیارو بەرچاو دەبێت.. كاتێك هاوڕێ حەیدەر ماوەی پاڵاوتنەكەی كە نۆ مانگ دەبێ تەواو دەكات، تەواو ئامادەو پەروەردە كراوە بۆ وەرگرتنی شەرەفی ئەندامێتی حزب و، راپۆرتی لەسەر دەنووسرێت بەمەبەستی پێدانی شەرەفی ئەندامیەتی حزب و ، نامەی پیرۆزبایی و پێدانی شەرەفی ئەندامیەتی حزبی بۆ دێت، و لەكۆبونەوەیەكی تایبەتی شانەكەی، بەرپرسی شانەكە دەڵێت ئیمڕۆ بەشێكی كۆبونەوەكەمان تەرخان دەكەین بۆ ئەوەی پێدانی شەرەفی ئەندامیەتی حزب و پیرۆزبایی بە هاوڕێ حەیدەر پێشكەش بكەین، و دەڵێت بەناوی حزبەوە پیرۆزباییت لێدەكەم بەبۆنەی وەرگرتنی شەرەفی ئەندامیەتی حزب، هیوادارم سەركەوتوبیت و بەرەو پێشەوە بچیت، تازە تۆ دەبێ بزانیت كە سەركردەی جەماوەری لەهەر شوێنێك بیت تۆ نوێنەری حزبی، دەبێت پەیوەندی بە جەماوەرەوە پتەوو فراوان بێت و بەردەوام لەگەڵ جەماوەر بیت و سەركردایەتیان بكەیت، حزبی ئێمە بەبێ جەماوەر ناتوانێت بژی و پەرەبستێنێ و بەردەوام بێت، پێویستە پیرۆزی ناوو بانگی حزب بپارێزی و یەكێتی حزب و نهێنییەكانی وەكو چاوەكانت بێت، چۆن ئەگەر چاوت نەبێت پەككەوتە دەبیت ئاواش ئەگەر یەكێتی حزب نەبێت ئەوە هێزو توانای حزب لاواز دەبێت و پەراوێز دەخرێت، هەروا دەبێت قسەو كردارت لەناو جەماوەر یەك بێت و راستیەكان لەحزب نەشاریتەوە، هەروا حزب داوات لێدەكات كە دەبێ بەرژەوەندی گشتی بخەیتە پێش بەرژەوەندی تایبەتی كەسییەوە، هاوڕێ بەرپرسی شانەكە بەردەوام دەبێت لە پێشكەشكردنی رێنمایی حزب، هاوڕێ حەیدەر بێدەنگ دەبێ، بە وریارییەكی بێسنوورەوە هەست لە ووتەكانی بەرپرسەكە دەگرێت و تەزووێكی وەكو تەزووی كارەبا لەجەستەی دەدات و هەست بەگەورەیی و گرانی ئەركەكانی دەكات، و دەزانێت ئەو رێگایەی بەویست و ئارەزووی خۆی هەڵًیبژاردووە پڕ لە هەوارزو نشێوەو ماندووبوون و دەربەدەری و راكەڕاكەو ئێش و ئازارو بەندیخانەو لەوانەشە شەهید بوونیشی بەدواداوە بێت، بەرپرسی شانەكە ووتەكانی تەواو دەكات و پیرۆزبایی لەهاوڕێ حەیدەر دەكات و چاوەڕوان دەبێت كە بزانێت هاوڕێ حەیدەر چی دەڵێت و هەڵوێستی چۆن دەبێت ، هاوڕێ حەیدەر كەمێك بێدەنگ دەبێت و چاوەكانی دەخاتە سەریەك و وەكو ئەوەی لەگەڵ خوودی خۆی ئاخاوتن بكات، ئەنجا بە دەنگێكی پڕ لە بڕواو متمانە بەخۆ دەڵێت هاوڕێیان لەدڵەوە سوپاستان دەكەم و لەناخمەوە سوپاسی حزبی شەهیدانمان دەكەم كە ئەو شەرەفە گەورەیەی حزبی پێبەخشیوم و جێگای بڕوای ئێوەو هاوڕێیانم، پێشتر دەمزانی ئەو رێگایەی هەڵمبژاردووە بەگوڵ و مافور فەرش نەكراوە، هەروا دەمزانی ئەو بارەی خستومەتە سەر شانم گەلێك قورس و بەسەنگە، بەڵام ئێستاكە باشتر بۆم رۆنبۆوە كە ئەرك و فەرمانەكانی حزب لەوە گەلێك گەورەتر و گرانترە كە پێشتر بیرم لێدەكردەوە، ئێستاكە بۆم دەركەوت كە دەبێت سەركردایەتی جەماوەری لەئەستۆ بگرم و بەرژەوەندی گشتی بخەمە پێش بەرژەوەندی خۆمەوەو قسەو كردارم یەك بێ و نهێنیەكانی حزب و یەكێتیەكەی بپارێزم و لەجەماوەر دانەبڕێم و لەبەرەییان بم بۆ داكۆكی و داواكارییەكانی، بەرگەی دەربەدەری و راوەدونان و گرتن و ئەشكەنجەو ئازار بگرم و بەگیانی خۆم هاوڕێیانم و رێكخراوەكانی بپارێزم، هاوڕێ حەیدەر بەردەوام دەبێت و دەڵێت هاوڕێیانی ئازیزم لەپێش ئێوە پەیمان بەئێوەو حزب دەدەم كە دڵسۆزی گەل و نیشتمان و تەواوی رەنجدەرانی بیرو بازووی حزب بم، ئەو ئەركەی خستومەتە سەرشانم بەبێ پشوودان و وەستان جێبەجێی بكەم و یەكێتی حزب و نهێنیەكانی و هاوڕێیان بەگیانی خۆم بپارێزم، دەبێت بۆ ئێوە و حزب بیسەلمێنم كە رۆڵەی بەوەفای دەبم و لەخزمەتی چینی كرێكاران و تەواوی هەژارانی ووڵاتەكەم دەبم و لەپێناوی ووڵاتێكی ئازادو گەلێكی بەختیار لەتێكۆشانی بەردەوامدا بم، دوای ئەو ووتانەی هاوڕێ حەیدەر شێخ عەلی هاوڕێیانی شانەكەی یەك یەك هاوڕێ حەیدەر لەباوەش دەگرن و هیواو داوای سەركەوتنی بۆ دەخوازن و دەڵێن بەو ئاواتەی لەدوارۆژدا بتبینین كە كادیرو سەركردەیەكی دیارو ناودارو بەتوانای حزب بیت، هاوڕێ حەیدەر فرمسێكی شادی و خۆشی لەچاوەكانی دەبارێت و دەڵێت سوپاس بۆ حزب كە ئیمڕۆ منی خەڵات كردو ئێوە رێزتان لێنام و دووبارە سوپاس.

 

  • 1