ئەمە بڵاوبكەوە
FaceBook  Twitter  

تێناگەم بۆچی لەكوردستان هەر كاتێ خۆپیشاندانێك، یاخود هەر گردبوونەیەك بەهەر شێوەیەك لەشێوازەكانی مەدەنیانەو هێمنانەی دەنگی نارەزای خەڵك، لەكۆتاییەكەی دەبێ بەیاری بۆكسێن وزۆرانبازی ویەكتر كوتان بەگۆچان وبەقوتوی بەتاڵا، دواییش چەكی ئاگرین.. لەكاتێكدا هەردوو بەرە كەمەبەست دەسەڵات و خۆپیشاندەرە، خەڵكی هەرێمی كوردستانن وپەیوەندی هاوبەشی مێژوو وخوێن وزمان لەنێوانیاندا هەیە بەشێوەیەك كە چ دەسەڵات وچ خەڵكەكە بەیەكتر نامۆ نینن وهیچ ئیمتیازاتێك یاخود سووكایەتیەكی بۆ یەكتر تیادا نییە. تەنها گەیاندنی دەنگیانە بەو دەسەڵاتەی كە هاوخوێنیانن وتێگەیاندنیانە بەبوونی كێشەگەلێك، كەرەنگە بیریان چووبێتەوە، یاخود بیریان چوێنرا بێتەوە بەهۆی سەرقاڵبوونیان بەشەوە ئەرخەوانیەكانیان. بەڕای سەرجەم شارەزایانی بواری كۆمەڵناسی وسیاسی ئەو هۆكارانەی لەپشت هەر نارەزایەتی وخۆپیشاندانێكەوەیە، ئەوەندەی پەیوەندییان بە ناعەدالەتی وگەندەڵی ئیداری وسیاسییەوە هەیە، نیو هێندەش پەیوەندی بەدەست لەپشدان ودەستێوەردانی دەرە كیەوە نییە، گەر هەشیبوو بێ دەرهاویشتەی نابەرپرسیاریەتی دەسەڵاتداری خۆسەپێنە، گرنگ هاوكێشەكە ئەوەیە باهۆزی دەنگی نارەزایی خەڵك لەئەنجامی ناعەدالەتی وگەندەڵی هەڵدەكات، جا درەنگ یان زوو. ئەمە لەوەختێكدا باس وخواسی گەرم وگوڕ كوردستانیان شەتكداوە، هەموو ئاراستەكان بۆ ئەوە دەچن كە گۆڕانێك بەرێوەیە، جا چۆنە، ئەوە جێدەهێلین بۆ رۆژانی داهاتوو. كورد گوتەنی(حاڵی حازر) بارودۆخەكە ئارامە، هەموو لایەك بە ئۆكسترای ئاشتەوایی وهێوركردنەوە ئاواز دەژەنێ، وەلێ ژەنیاری رووداوەكان تا ئێستا نەزانراوە كە ئەمریكایە یاخود هەر كەسێكی دیكە.. بەدەر لەرێژەیەكی كەم، زۆرینەی شەقامی كوردی زانیاری تەواویان دەربارەی نییە، هەموو ئەمانە پرسیار گەلێكن هەر یەك بەچاویلكەیەكی جیاوازو بەشرۆڤەیەكی جیاواز لەدیدو بۆچوون دەیخوێنێتەوە. بۆیە ئەوەندەی بۆم كرا بێ، خۆم دوور گرتووە لەشرۆڤەی وروژێنەرانە، بەو ئامانجەی ئەم رۆژنامە قەشەنگە رۆشنبیریی سیاسییە چۆن وێستەگەیەكی یاخود كەشكۆلی زانیاری سیاسییەكانە بەجیاوازی ئاراستەی هزری وبیری سیاسی.. بەو ئەندازەیەش هەوڵمداوە نووسینەكە خاڵ دانان بێ لەسەر پیتە جۆراوجۆرو جیاوازەكان. وەكو گوتم نامەوێ وروژێنەرانە بەنێو سیاسەتی ناتەندروستی دەسەڵاتدا رۆبچم كەبەرهەمهێنی ئەو گەندەڵیانەن كە كۆمەڵگەی كوردیان خنكاندوەو وەك قەیرانێكی ترسناك بینەقاقای كوردستانی گرتووە ، بەڵام لەگەڵ ئەوەشدا ئەم دوورە پەرێزیەم نەحەباندوە، نەكا وا شرۆڤە بكرێ كە نووسەران ورۆشنبیرانی كورد لەمیانەی نووسینەكانیاندا نەیانتوانیوە وێنایەكی زەینی ومەعریفی تەندروستی رووداوەكان بدەنە شەقام وخوێندنەوەیەكی قوول بكەن بۆ هەموو ئەو بابەتە گەرم وگوڕە سیاسیانەی كوردستانیان شەتەك كردووە... دەچیبكەین لەو وڵاتە نیمچەئازادەی خۆماندا گەر بەرێژەی رەهاش نەبێ دەتوانین بڵێین دەسەڵاتی كوردی گشت پێوەرەكانی ئەدەبیاتی سیاسی بەزاندووەو نموونەی نییە لەرۆژهەڵاتی ناوەڕاستدا، بەجۆرێك خاكیەتی خۆمان لەدەستداوە.. لەوەش زیاتر بۆ ئەو باوەڕە چووە كە هەر زمانی سیاسەتە بزوێنەری جەمسەری ژینگەو ژیانی ئەو گەلە، جگە لەوەش زمانی سیاسی ئێمە لەڕووی زاراوەو دروشم وكلێشاكانییەوە دەگمەنەو هاوشێوەی نییە. سەیرەكە لەوەدایە لەمەتەڵ دەچێ وكەس بۆی شیناكرێتەوە..نەدۆست،نەدوژمن. گەر ئەدەبیاتی سیاسیمان وەك مادەیەكی دیراسی لەكۆلیژەكانی ئەهلی وحكومی بخوێنرایە، گومان نەبوو لە ( 99 % ) ئەندامانی كارای سەندیكای خاوەن بڕوانامەكانی دكتۆراو زیاتریش لەوان لەتاقیكردنەوەكاندا دەرنەئەچوون، تا ئێستاش نووسینگە وتەكیەكانی حیزبی وحكومی بێ بڕوانامە ئەبوو. ئەمڕۆ وایلێهاتووە بوێژترین سنعەتداری ئەدەبیاتی سیاسی كورد ئەو كەسەیە لەوتەكانیدا باق وبریقەدار بێ وخەڵك كەمەندكێش وسەرسام بكات بەموهاتەرات و سەركێشییە سیاسییەكانی . لەگەڵا هەموو ئەمانەشدا شتێك نییە سەرسامم بكات.. چونكە ئاماژەن بەكلتوورو نەریتە قێزەونەكانی دەسەڵاتی ناسەقامگیر، گەر خودا تەمەن بدا وچەند ساڵێكی دیكە تیایا ژیاین.. ئەو كاتە تێئەگەین وهەست بەوە ئەكەین دەسەڵاتی كوردی چەندە وابەستەی كەلتوورە قێزەونەكانی دیكتاتۆرەكانی پێش خۆیەتی.

  • 1