ئەمە بڵاوبكەوە
FaceBook  Twitter  

بەشی سێیەم

لەپۆلی خوێندن بۆ وەرشەی كاركردن

هاوڕێ حەیدەر شێخ عەلی قوتابییەكی هێمن و وریا و زیرەك بووە لە قوتابخانە و پەیوەندی فراوانی لەگەڵ قوتابیاندا هەبووە، لەچالاكی و جموجۆڵیدا بەردەوام بوو، ئەو وتەیەی بەرپرسی شانەكەی لەبیربوو، كە لەكاتی پێدانی شەرەفی ئەندامێیەتی حزب گوتبووی ئەندامی حزبی ئێمە لە هەرشوێنێك و كاتێكدا دەبێت خۆی بەسەركردەی جەماوەر و پێشڕەوی جەماوەر بزانێت و دیاربێت و قسەوكرداری وەكو یەك بێت، هاوڕێ حەیدەر بەم رێنماییە بەو داوایەی حزب لە قوتابخانە و لەگەڵ قوتابیاندا هەڵسوکەوتی دەكرد و خۆی بەسەركردە و پێشڕەو دەزانی، قوتابیانیش بەڕێزەوە گوێیان لە وتەكانی دەگرت و لەدەوری كۆدەبوونەوە، هەر لەهەمانكاتدا هاوڕێ حەیدەر فەیلی پەیوەندییەكی فراوانی لەگەڵ دانیشتوانی گەڕەكەكەیان دروست كردبوو، بەتایبەتی لەگەڵ لاوانی كرێكار و كاسبكار و هەژارانی كوردە فەیلییەكان هەبوو، بەردەوام هاوڕێ حەیدەر لە كۆبوونەوەكانی حزبیدا باسی لە گرنگی پەیوەندی لەگەڵ كرێكاران و هەژاران دەكرد و رێكخستنییانی بەبایەخەوە باس دەكرد، هەروا لە كۆبوونەوەكانی بەرپرسەكانی حزب باسییان لە شۆڕشگێڕی كرێكاران دەكرد و هەوڵییاندەدا كە كرێكاران لە ریزی حزبدا پێشبكەون و ببنە سەنتەری كاری حزبی و كادیری پێشكەوتووی حزب و جەماوەر، هاوڕێ حەیدەر لە ناخییەوە ئارەزووی دەكرد لەگەڵ كرێكاران بێت و لەتەكییاندا كار بكات و بۆ ئەوەی بتوانێت لە نزیكەوە لە مەینەتی و ئێش و ئازار و برسێتیان بگات و رێكییان بخات و سەركردایەتییان بكات و پێشڕەویان بێت، بۆیە واز لە خوێندن و قوتابخانە دێنێت و روو لە كرێكاری دەكات و بەدلەی شینی كرێكاری دەپۆشێ و لە وەرشەی كار لەتەك كرێكاران دەست بەكاركردن دەكات، و دەست و پەنجەی نەرم و نۆڵی حەیدەری قوتابی دەگۆڕێت بۆ دەست و پەنجەی دڕ و قڵیشاوی كرێكارێكی كارخانەی (روونی رووەكی) لە شاری بەغدا. هاوڕێ حەیدەر شێخ عەلی هەر لەیەكم رۆژی دەستبەكاربوونیدا لە كارگەكەدا ئەوەی لە یادی بوو كە دەبێت ببێتە سەركردەی كرێكاران و رێكییان بخات و لە پێشەوەی پێشەوەیان بێت لە تێكۆشان لە پێناوی وەدەستهێنانی مافەكانی كرێكاران، بۆ ئەم مەبەستە داوا لە حزب دەكات كە پەیوەندی حزبی بگوازێتەوە بۆ رێكخستنەكانی حزب لە ناو كارگەكەدا، ئیتر هاوڕێ حەیدەر وەكو سەركردەیەكی بەتوانا لەگەڵ كرێكاران هەڵسوكەوت بكات و پەیوەندی دۆستایەتی و برادەرایەتی لەگەڵ كرێكاران دەبەستێت، و بەردەوام هەوڵدەدات كرێكاران رێكبخات و هەوڵدەدات پەیوەندییەكانی ئاسایی و دۆستایەتی لەگەڵ كرێكاران بگۆڕێت بۆ پەیوەندی سیاسی و حزبی و بڵاوكردنەوەی راوبۆچوونەكانی حزب لەناو كرێكاران و گیروگرفتەكانییان بۆ حزب دەگوازێتەوە، تاوای لێهات هاوڕێ حەیدەر بووە كەسایەتیەكی دیار و ناسراوی ناو كارگەكە و جێگای متمانەی كرێكاران و راوبۆچوونەكانی هاوڕێ حەیدەر لەلایەن كرێكارانەوە بەهەند وەرگیراو رێكخستنی حزب لەناو كارگەی (روونی رووەكی) فراوان بوو، و دۆست و لایەنگرانی حزب زیادی كرد و پەیوەندی هاوڕێیان لەگەڵ كرێكارانی كارگەكە پتەو و چەسپاو بوو.

 

 

بیرۆكەی مانگرتنی كرێكاران لە كارگەی (روونی رووەكی)

هاوڕێ حەیدەر و هاوڕێیانی تری كرێكار لەناو كارگەكە لە دیدار و كۆبوونەوەكانیدا بیرۆكەی مانگرتنی كرێكاران گەنگەشە دەكەن و ئاڵوگۆڕی بیرورا دەكەن، و گیروگرفتی كار و كرێكارانی كارگەكە دەخەنە بەرباس و گفتوگۆوە، لەئەنجامدا ژمارەیەك گیروگرفتی كرێكاران و داواكاریان دەستنیشان دەكەن و رێكدەخەن، و بڕیار دەدەن كە بە وریایی و هێمن و رێك و پێكەوە پەیوەندی بە كرێكارانەەوە بكەن و داواكانیان بخەنە روو، داوا بكەن كە بۆ وەدەستهێنانی داواكان پێویست دەكات تەواوی كرێكاران لەناو كارگەكە مان لەكاركردن بگرن، بۆ ئەم مەبەستە هاوڕێ حەیدەر شێخ عەلی و هاوڕێیانی تر داواكان دیار دەكەن و دەینووسنەوە، لەم داوایانەی كە بەباشیان زانیوە دیاردەكەن، وەكو 1- زیادكردنی مووچەی مانگانەی كرێكاران 2- پێدانی بیمەی مەترسی كاركردن –ختورە- 3- دابینكردنی كەلوپەلی كاركردن وەكو –بەدلە و پێڵاو و كڵاوی پاراستنی سەر- و هەروا رێكخستنی چێشتخانەی كارگە بۆ كرێكاران و باشكردنی جۆری خواردن... ئەم داوایانە بەشێوەیەكی رێكخراو دەگەیەننە كرێكاران و داوا دەكەن بۆ دەستهێنانی پێویستییەكان مان لەكاركردن بگرن، چەند رۆژێك هاوڕێیانی بەشێوەیەكی رێك و پێك و رێكخراو لەگەڵ كرێكاراندا لە پەیوەندی و كاركردن بەردەوام دەبن، لە ئەنجامدا بابەتەكە دەخەنە بەرباس و لێكۆڵینەوە، بۆیان دەردەكەوێت كە كرێكاران بەگەرم و گوڕیییەكی زۆرە وە پێشوازی لە بیرۆكەكە دەكەن و هەموویان بڕیار دەدەن بەشداری لە مانگرتندا بكەن، بۆ ئەوەی مانگرتنەكە بە باشی بەڕێوەبچێت، لێژنەیەكی تایبەت بۆ سەرپەرشتی مانگرتنەكەدا لە چوار هاوڕێ دروست دەكرێت یەكێكیان هاوڕێ حەیدەر شێخ عەلی دەبێت و لێژنە چوار هاوڕێییەكە رۆژی مانگرتن دیاری دەكەن و بەئاگاداری حزب هەموو پێداویستییەكانی مانگرتنەكە لە دروشم و لافیتە و یاداشتی داواكارییەكان رێكدەخەن و شەوی پێش مانگرتنەكە لێژنەی چوار هاوڕێیەكە دوا كۆبوونەوەی تایبەتی خۆیان گرێدەدەن و تەواوی بابەتەكە بەسەر دەكەنەوە و بڕیاری مانگرتنەكە دەدەن و بۆ بەیانی بەر لە كرێكاران دەچنە كارگە و دروشم و لافیتەكان هەڵدەواسن و پێشوازی لە كرێكاران دەكەن، مانگرتنەكە لە مانگی تشرینی دووەمی ساڵی 1968 بووە و ئەو كاتە حزبی بەعسی سۆسیالیستی عەرەبی لە عێراق دەسەڵاتداربوو، ئیتر كرێكاران كۆدەبنەوە و كاركردن لە كارگەكە دەوەستێ و وتار دەخوێندرێتەوە و لافیتەكان بەرز دەكرێنەوە، بەرپرسانی كارگەكە هەرچەندی هەوڵدەدەن كە كرێكاران بگەڕێنەوە سەركارەكانییان و دەست بەكار بكەنەوە و هەڕەشە و چاوسوركردنەوەش لە كرێكاران دەكرێت، بەڵام هەوڵەكانی بێ ئەنجام دەبن و مانگرتنەكە بەردەوامی دەبێت و، هاوڕێ حەیدەر و هاوڕێیانی تر لەسەرپەرشتی و وتاردان و هاندانی كرێكاران بەردەوام دەبن، لەناكاو چەتەكانی حزبی بەعس بەسەرپەرشتی تاوانبار سەلاح عومەر ئەلعەلی ئەندامی هەرێمایەتی بەعس هێرش دەكەنە سەر كرێكارانی مانگرتوو لە كارگەكە و دەبێتە شەڕ و پێكدادان و شێتانە و دڵڕەقانە دەكەونە سەرگیانی كرێكارانی مانگرتوو، تاوانبار سەلاح عومەر كە دەزانێ كرێكاران لە مانگرتن بەردەوام دەبن و وازناهێنن بڕیار دەدات تەقە لە كرێكاران بكەن، و ئیتر كوێرانە كرێكاران گوللەباران دەكەن و هاوڕێ حەیدەر كە لە بەرایی كرێكارەكان دەبێت بریندار دەبێت، هاوڕێیانی كرێكار هاوڕێ حەیدەر بەجێناهێڵن و هەڵیدەگرن بەبرینداری رزگاری دەكەن و مانگرتنەكە بەهێزی چەكدار دەوەستێنن، ئەم هەواڵ و دەنگوباسەی مانگرتنەكە كاتی خۆی بەهۆی رێكخستنەكانی حزبەوە گەیشتە تەواوی رێكخستنەكان لە سەرتاسەری عێراق و كوردستان، هەر لە هەواڵەكەدا هاتبوو كە هاوڕێیەك لەم مانگرتنە بریندار بووە، بەڵام نەكەوتۆتە دەستی پیاوانی رژێمەوە بەڵكو رزگار كراوە لەلایەن كرێكارانەوە، پاش ماوەیەك ئاگاداركراین كە هاوڕێ كرێكارە بریندارەكە رزگار كراوە و گەیشتۆتە بارەگای حزب و پێشمەرگەكانی لەناوچەی دەرگەڵە، بەڵام ئەوكات ناوی هاوڕێ حەیدەر نەهاتبوو و كەس باسی لەناوی نەدەكرد و نەیدەپرسی.

 

 

لە وەرشەی كارەوە بۆ پێشمەرگایەتی

هاوڕێ حەیدەر شێخ عەلی كە لەگەڵ هاوڕێیانی تر سەرپەرشتی و پێشڕەوایەتی گەورەترین مانگرتنی كرێكارانی لە شاری بەغدا لە ئەستۆ گرت، بەلێهاتوویی و لێوەشاوەییەوە كارەكەی بەڕێوەبرد و (800) كرێكار لە مانگرتنەكە بەشداریان كردبوو، هاوڕێ حەیدەر كە لە مانگرتنەكە برینداربوو، ئەگەر ئەوكات بكەتبایە دەست پیاوانی رژێم بێشك لە سێدارە درابوو، بەڵام حزب هاوڕێ حەیدەری بەبرینداری لە بەغداوە بۆ كوردستان گواستەوە و هاوڕێ حەیدەر چەكی پێشمەرگایەتی لەشان كرد و لەگەڵ هاوڕێیانی پێشمەرگەی حزب شاد و دڵخۆش بوو، هاوڕێ حەیدەر فەیلی هەر وەك لە كاری حزبی و جەماوەری لێزان و سەركەوتوو خۆشەویست بوو ئەوانش لە جێبەجێكردنی ئەركی پێشمەرگایەتیش لێهاتوو بوون، و پەیوەندی باش و پتەو بوو لەگەڵ تەواوی پێشمەرگەكان و خۆشەویست بوو هاوڕێ حەیدەر تا كۆتایی ساڵی 1973 لە پێشمەرگایەتی بەردەوام بوو، هەر لەم ماوەیەدا چەندین جار بەنهێنی و بۆ كاری حزب رەوانەی بەغدا كرا بوو، هەرچەند ئەو كاتیش مەترسی لەسەر بوو، و لەلایەن دامودەزگاكانی ئەمن و حزبی بەعس داواكراو بوو، بەڵام ئەو فەرمانی حزبی بەبێ وەستان و سێ و دوو، ئەنجام دەدا و بەوریایی زۆرەوە هاتوچۆی بەغدای دەكرد.

 

  • 1