ئەمە بڵاوبكەوە
FaceBook  Twitter  

بەشی شەشەم

پێشمەرگایەتی و ئەركی هاوڕێ حەیدەر

هاوڕێ حەیدەر بۆ جاری دووەم چەكی پێشمەرگایەتی لەشان دەكات و (لەناوزەنگ) دەبێتە پێشمەرگە، هاوڕێ حەیدەر لەبەرئەوەی پێشتر لە ساڵی( 1968 ) پێشمەرگایەتی كردبوو، شارەزایی و ئەزموونی لەژیانی رۆژانەی پێشمەرگایەتی و ئەركەكانیدا هەبووە، بۆیە هەر زوو بەشێوەیەكی ئاسایی لەگەڵ ژیانی پێشمەرگایەتی راهات و هیچ گیروگرفتێكی نەبوو، هاوڕێ حەیدەر لەماوەیەكی كورتدا لەناو پێشمەرگەكانی حزب ناسراو و دیار بوو، هەروا خۆشەویست و رووخۆش و گەشبین بوو، لەئەرك و جێبەجێكردنی فەرمانی حزبی لەتەك هاوڕێیان بوو، بەهیچ جۆرێك دوانەدەكەوت، ئەز ئارەزووی گەلێك زۆرم هەبوو كە لەنزیكەوە ئاشنایی لەگەڵدا پەیدا بكەم و بەشداربم لەدیدارو كۆبونەوەكانیدا، هەروا دەمویست هەندێ زانیاری دەربارەی بزانم، دوای ماوەیەك لەهاوڕێ (ئەبو دلشاد)م بیست كە هاوڕێ حەیدەر ئەو هاوڕێیەیە كە لە پاییزی 1968 سەركردایەتی مانگرتنی كرێكارانی كارگەی (روونی رووەكی) لە بەغدا كردووە و بریندارببوو لەئەنجامی هێرشی پیاوانی بەعس بۆ سەر كرێكاران هاوڕێ حەیدەر بە برینداری حزب گەیاندیە ناوچەی (بەرسرین) و ئەوكات بووە پێشمەرگەی حزب.. كاتێك ئەم زانیاریانەم زانی زیاتر متوی هاوڕێ حەیدەر بووم، پاشان هاوڕێ (حەیدەر) لە (ناوزەنگ) دیار نەماو بەكاری حزبی لەناوچەكە دووركەوتەوەو پاش ماوەیەك هاوڕێ حەیدەر سەری هەڵداوەو دەركەوتەوەو سەردانی هاوڕێیانی لەبارەگاكانی حزب دەكرد و باسی بارودۆخی ئێران بە تایبەتی (كوچەی عەرەبان) دەكرد و هەواڵ و دەنگ و باسی جەماوەری راپەڕیوی تاران و ئەندامانی حزبی تودەی دەكردو، ئەوكات زاندرا كە هاوڕێ حەیدەر دەچێتە ئێران – تاران پۆستەی حزب دەبات بۆ ئەوەی رەوانەی دەرەوە بكرێت و پۆستەی دەرەوەشی بۆ سەركردایەتی لە (ناوزەنگ) دەهێناوە، تا وای لێ هات هاوڕێ حەیدەر بەردەوام لەهاتوچۆدا بوو لەنێوان ناوزەنگ و تاران هاوڕێیانی سەركردایەتی لەدەرەوە دەهاتنە تاران هاوڕێ حەیدەر بۆ ناوزەنگی دەهێنان، یەكەمجار كە هاوڕێ (عەزیز محمد) لەبەهاری 1981 لەرێگای پاكستانەوە گەڕابۆوە هاوڕێ حەیدەر گەیاندیە (راژان) و لەوێوە بۆ ناوزەنگ، ئیتر هاوڕێ حەیدەر ناوی دەركرد و تەواوی پێشمەرگەكانی حزبمان دەیانناسی و دەیانزانی كە ئەركی چیە، هەروا بەرپرسانی پارتی و حزبی سۆسیالیستی كوردستانیش دۆستایەتی و ئاشنایەتیان لەگەڵ هاوڕێ حەیدەر پەیداكردبوو، چونكە هاوڕێ حەیدەر گەلێك ئەركی لەرێگای پارتی و حسك رادەپەڕاندو ئەوان (بەرگەیان) بۆ ساز كرد و هەرچەند جارێك هاورێ حەیدەر بۆ ناوزەنگ بگەڕابایەوە هەواڵی گەڕانەوەی بەخێرایی لەبارەگاكان بڵاو دەبۆوەو هاوڕێیانی بەتایبەتی، هاوڕێیانی عەرەب، چاوەڕێیان دەكرد هاوڕێ حەیدەر ببینن، چونكە زۆر جار نامەو یارمەتیان بۆ لەدەرەوە دەهات,.. هاوڕێ حەیدەر تەواوی یارمەتی و بڵاوكراوەكانی حزب و (گریق الشعب)ی بۆ ناوزەنگ دەگواستەوە.

بەیەكەوە لەگەڵ هاوڕێ حەیدەر لە ورمێ

لەمانگی كانوونی یەكەمی ساڵی 1981 واتە لەكۆتایی ساڵەكە لەگەڵ هاوڕێ حەیدەر بووم لەشاری ورمێ، و هەندێ پێداویستی بارەگاكانمان كڕی و بڕیاربوو من شتەكان بۆ ناوزەنگ بگوازمەوە و هاوڕێ حەیدەریش بەرەو تاران بڕوات، كارەكانمان تەواوكردو شەوێك بەیەكەوە لە ئوتێل بووین، وابزانم ناوی ئوتێلەكە زیبا بوو، ئەو رۆژەی بەیەكەوە لەگەڵ هاوڕێ حەیدەر بووم و لەشەقامی ئیمام خومەینی دەڕۆیشت و بەدەنگێكی بیستراو دەیووت (بە پیش خومەینی بەپیش) (بەپێش ئیمام بە پێش) زۆر دڵخۆش بوو پڕ بەدەنگی خۆی پێدەكەنی، نەمدەزانی بۆ وادەڵێت و بۆچی ئەوەندە شادو دڵخۆشە، یەك دوو جار لێم پرسی بۆ وا دڵۆشی و بۆچی وادەڵێیت، لەوەڵامدا دەیووت حەقت نەبێت وەرە دووم.. ئەو كەل و پەل و شتانەی كڕیبومان لەماشێن باركران و لەگەڵ هاوڕێ حەیدەر لێك دابڕاین من بۆ ناوزەنگ گەڕامەوەو ئەویش بەرەو تاران. بە رێكەوت پاش ماوەیە ك دەنگ و باس بڵاوبۆوە كە هاوڕێ (حەیدەر) لە تارانی پایتەختی ئێران دەستگیركراوەو، هیچ دەنگوباسی نییەو كەس نازانێت بۆ چ شوێنێكیان بردووە، بەڕاستی هەواڵێكی گەلێك ناخۆش بوو، تەواوی هاوڕێیان خەمبار و پەرێشان بوون. گیرانەكەی لە كۆتایی ساڵی 1981 بوو، هاوڕێ حەیدەر بۆ ماوەی پێنج ساڵ لەگرتووخانەی ئەڤین بوو، هەموو جۆرە ئەشكەنجە و ئازارێك دەدرا و مردنی بەچاوی خۆی بینی و باسی ئەو هەموو ئەشكەنجە و ئازارەی ناكەم، چونكە رۆماننووسی ناودار و بەناوبانگ (عەبدولڕەحمان منیف) بەدرێژی باسی كردووە لە رۆمانی (الان هنا او شرق المتوسگ مرە أخری)، بەڵام هەر ئەوەندە دەڵێم كە هاوڕێ حەیدەر شێخ عەلی سێ ساڵ و سێ مانگ لە ژوورێكی بچووك بەتەنیا دانراوە و زۆربەی كاتەكان چاوی بەستراوە، بەهیچ جۆر نەیانهێشتووە ئەوانەی لێكۆڵینەوەی لەگەڵدا دەكەن بیانبینێت، و هەروا ئەوەندەش دەڵێم كە قاچی هاوڕێ (حەیدەر شێخ عەلی) بزمارڕێژ دەكەن و تاكو ئێستاكەش شوێنی بزمارەكان دیارە، هاوڕێ حەیدەر وەكو شاخ دەبێت، چۆن شاخ ناڕوخێت و بەردەوام سەر بەرزە، ئەویش شاخئاسا بوو، چەند جار نزیك بۆتەوە لە مردن، بەڵام لەبەرانبەر ئێش و ئازار و ئەشكەنجە و مردن ورە پۆڵاین و خۆڕاگر و بڕوا بەخۆ بوو، هەواڵی خۆڕاگری و مقاوەمەتی هاوڕێ حەیدەر تەواوی گیراوەكانی كە ئەوكات لە گرتووخانەی ئەڤین بەتایبەتی سەركردەكانی حزبی تودە و فیداییانی خەلقی ئێران ئەو مقاوەمەتەی هاوڕێ حەیدەر دەزانن.

هاوڕێ حەیدەر شێخ عەلی و نەخۆشخانە

هاوڕێ حەیدەر بارودۆخی تێك دەچێت و هۆشی لەخۆی نامێنێت و بەرپرسانی گرتووخانەی ئەڤین بێ ئومێد دەبن لەوەی كە هاوڕێ حەیدەر بژیت و چاك بێتەوە، بۆیە بڕیار دەدەن كە ڕەوانەی نەخۆشخانەی بكەن و هەوڵبدرێت بەڵكو چاك بێتەوە، لەنەخۆشخانەش وەكو گیراوێك مامەڵەی لەگەڵدا دەكەن، ماوەیەك لەژێر چاودێری پزیشك دەبێت و هێدی هێدی هۆشی دێتەوە و چاك دەبێتەوە، هاوڕێ حەیدەر نازانێت لەكوێیە و چی بەسەرداهاتووە، هەرئەوەندەی لەبەرچاو دەبێت كە لەشوێنێكی پاك و خاوێنە و جلو بەرگی نەرم و خاوێنی لەبەردایە، دەپرسێت چی بەسەرهاتووە و لەكوێیە، وەڵامی دەستدەكەوێت كە نەخۆش بووە ئێستاكە لەنەخۆشخانەیە، ئینجا دەزانێت شوێنەكە گرتووخانە نییە، هاوڕێ حەیدەر ماوەی مانگێك لەنەخۆشخانە دەبێت و بەتەواوی چاك دەبێتەوە و دووبارە بۆ گرتووخانەی ئەڤینی دەبەن، بەڵام ئەمجارە نایبەنە ژووری تاكەكەسی، بەڵكو دەیبەنە قاوشێكی فراوان و پڕ لە دەستگیركراوان، گیراوەكان هەموویان تودەییەكان و فیداییەكان دەبن، كە دەزانن ئەو گیراوە تازەیە هاوڕێ حەیدەرە هەموویان هەڵدەستنە سەرپێ و دەست لەسینگ رادەوەستن و دەڵێن تۆ پاڵەوانی و تۆ سەری ئێمە و حزبەكەت بەرز كردۆتەوە و ئێمە ئاگادارین و دەزانین چ جۆرە ئەشكەنجەیەك دراوی و چ جۆرە خۆڕاگری و مقاوەمەتێكت كردووە، بەردەوام دەبن و دەڵێن مرۆڤەكان هەموویان یەك مەعدەنن و یەك پێكهاتەن، بەڵام نازانین تۆ لە چ مەعدەنێكی و پێكهاتەكەت چییە. ئەنجا یەك بە یەك هاوڕێ حەیدەر لەباوەش دەگرن و ماچی دەكەن.

  • 1