ئەمە بڵاوبكەوە
FaceBook  Twitter  

 

 

لە هەفتەیەكدا سێجار موشەكبارانی كێڵگەی غازی كۆرومۆركرا. سەرانی حكومەت پەیتا پەیتا هۆشداری دەدەن و هەڕەشەكە دەكەن كە لەكاتی بەردەوامی هێرشەكان و پەلاماردانی كێڵگەكەدا وەڵامیان دەبێت، كەمێك پێش ئێستا باس لە جوڵاندنی هێزكرا بەرەو سێ ڕێیانی دووز-كەركوك-قادركەرەم لە لایەن ناوەندەوە، كەمێك دوای ئەو هەواڵانە كە زیاتر لە دەنگۆ دەچوون، باس لە جوڵاندنی هێزیش كرا لە لایەن حكومەتی هەرێمەوە، بە ئاراستەی ناحیەی قادر كەرەم و گوندی كۆرومۆر.

توندبوونەوەی ململانێكان لە دوای یەك دوو ڕوداوی ڕابردووەوە بوو كە زۆرێك پێشبینی ئەنجامەكەیان كردبوو، لەوانە لێدوانە ئاگرینەكانی سەرۆكی حكومەت كە دەتوانین ببینە جێگرەوەی ڕوسیا بۆ دابینكردنی  گازی سروشتی بۆ ئەوروپا، و ملنەدان بۆ ڕێكەوتنی سیاسی لەسەر پۆستی سەرۆكایەتی كۆمار كە دابەشبوونی كورد بۆ سەر دوو بەرەی نزیك لە یەكتر لە ڕووی ژمارەی كورسییەوە كە چوارچێوەی هەماهەنگی و ڕزگاری نیشتیمانی بوون.

ئەو هەنگاوانە بوونە هۆی دەركردنی بڕیار لە دادگای فیدڕاڵییەوە دژ بە دەسەڵاتەكانی هەرێم، وەك هەمیشە دەوترێت نەیارانی كورد لە كاتی دژایەتیكردنی كورداندا ململانێكانیان وەلاوە دەنێنن و هاوڕان. ئەمجارەش هەر وا دەرچوو، دەسەڵاتداران هەڵەبوون لە حساباتەكانیان بۆ پەراوێزخستنی ڕۆڵی ئێران و ڕوسیا كە ئێستا لەگەڵ جیهاندا لە شەڕدان و دۆستی دوژمنەكانیان بە دوژمنی خۆیان دەزانن و پەڕ و باڵی هەر دەسەڵاتێك دەكەن كە بیەوێت پێگەیان لە شەڕی ئابوریدا لاواز بكات.

 توركیا كە سوودمەندی یەكەمە لە قەوارەی هەرێم، لە ڕووی ئابورییەوە قازانجی خەیاڵی دەستدەكەوێت و نەوتەكەی هەرێمی كردووەتە لغاوێك تا ساڵانێكی زۆر دژ بە بەغدا بارگاوی بكات، لە لایەكی ترەوە لە ڕووی ئەمنییەوە دەیان كیلۆمەتر هاتووەتە ناوخاكی هەرێمەوە و بە درۆنەكانی ڕۆژی لە شاروشارۆچكەیەك كردەوەیەكی تیرۆریستی ئەنجام ئەدات، خۆی لە ململانێكان دەپارێزێت و تا ئێستا یاریزانێكی باشە و كارێكی نەكردووە بەرژەوەندییەكانی بكەونە مەترسییەوە، هێزی یەكەمی هەرێمیش كە پارتییە لەگەڵیدا تەبایە و هەمیشە هەوڵیداوە هەموو ڕێگاكان لەبری بانە، بڕۆنەوە بۆ ئەنقەرە.

نەوت و گاز بوونە هۆی لێكترازانی دەسەڵاتداران و خەڵكی ئاسایی، ئەگینا كۆرومۆر 5 دەقە لە گوندی تازەشارەوە دوورە كە لە قۆناغی سێی ئەنفالدا بەعس بە هەمووی هێزی خۆیەوە و لە هەموو قۆڵەكانەوە هێرشی كردە سەر 22 پێشمەرگە و لە بەیای تا ئێوارە شەڕیان كرد تا هەموویان شەهیدبوون، زرێپۆش بەسەر شەهیدەكاندا ڕۆشت دواتر بەعس پێشڕەوی كرد، چونكە ئەوكاتە شەڕەكە شەڕی مانەوەی نەتەوە و گەلێك بوو كە بەعس بڕیاری سڕینەوەی دابوو، بەڵام ئێستا خەڵكی گوندەكانی قادركەرەم و بناری گل لە سایەی گازەكەی كۆرومۆرەوە نەحەساونەتەوە و جگە لە موشەكەكان كە مەترسی لەسەر ژیانیان دروست ئەكات، سودیان پێناگەیەنێت و خەڵكیش بە كێڵگەی خۆی نازانێت و پێیان وایە كە كێڵگەی بەرپرسەكانە و دەبێت ئەوان بیپارێزن، چونكە دواجار ئەوانن لە سێبەری نەوت و گازی هەرێمەوە بوون بە ڕەقەمی گەورە و خەڵكیش ژیانی سەختتربووە.

  • 1