ئەمە بڵاوبكەوە
FaceBook  Twitter  

د. فاخیر / پێشمەرگەی دێرین

بەشی یەکەم

دوای پڕۆسەكانی ئەنفال و كیمیابارانكردنی كورد لە لایەن ڕژێمی پێشووی عێراق لە ناوچە جیاجیاكانی كوردستان، ئومێدەكان بۆ مانەوەی كورد و بەردەوامی خەباتی چەكداری لەپێناو رزگاری نیشتمانیدا تەواو لاوازببوون، ترووسكاییەكی ئەوتۆ نەمابوو كە كورد باوەڕی پێ بكات و لە داهاتوودا بڵێسە بدات، بەڵام لەگەڵ ئەمەشدا هێشتا ئێمەومانان كە چەكمان لە شان كردبوو و لەپێناو دۆزی رەوای گەلەمان دەربەدەری و شاخمان هەڵبژاردبوو، دەبوو بۆ ئەوەی كەڵ بژین و لەگەڵ گەل بژین، تەكان بدەینە خۆمان و گۆڕەپانەكە هەروا بە ئاسانی بۆ دوژمن چۆڵ نەكەین.

بۆیە بڕیاری حزبی ئێمە و پێشمەرگەكانی ئێمە بۆ ئەوە بوو كە؛ نابێت لە كەسوكار و ئازیزانمان داببڕێین و لە بێئومێدیدا بەجێیانبێڵین، دەبوو بەرپەرچی بەعسییە فاشیستەكان و نۆكەرەكانیان بدەینەوە، بۆ ئەوەی بە ئاسانی لەناو هەولێردا بە پێی پەتی و دشداشەی سپییەوە لاف و گەزاف بەسەر شەڕەف و نامووسی ژنان و ئافرەتانی كورد لێ نەدەن، بڕیارمان بوو كە دەبێت تۆڵەی هەموو گوندە سووتاو و وێرانكراوەكان و ئەنفالەكان بكەینەوە، ئیتر ئەم بڕیارانە و چەندانی دیكە ئێمەیان وەها لێ كرد، لە مەفرەزەیەكی حزبدا كۆببینەوە و بە ئەركی بیروباوەڕ و دۆزی رەوای گەلەكەمان هەڵبستین، ئەوە بوو رێك (٣٤) ساڵ لەمەوبەر، هاوڕێیانی ئێمە، پێشمەرگە قارەمان و گیانفیداكان لە رووبەڕووبوونەوەیەكی ئەفسانەئامێزدا كە مەرگ لە هەموو كات لێمانەوە نزیكتر بوو، لە دەوروبەری كۆیەدا مەردایەتی و جوامێرییەتی خۆیان بەسەر بەعسییە فاشیست و جاشە نۆكەرەكانیان سەلماند.

دوابەدوای وەستانی شەڕی هەشت ساڵەی نێوان عێراق – ئێران، حزب بڕیاریدا بە رەوانەكردنی چەند مەفرەزەیەكی بچووك لە شێوەی گرووپ گرووپ بۆ ئەوەی رەوانەی خوارەوەیان بكات، لقی هەولێر یەكێك بوو لەو مەفرەزانە، هەموومان كۆكراینەوە بە بڕیاری حزب ناوی ئەو پێشمەرگانەمان خوێندرایەوە كە دەبوو لەناو مەفرەزەكەدا بن، هاوكات جۆری ئەو چەكانەیشمان بۆ دیاریكرا كە دەبوو هەڵمانبگراتەیە، لەگەڵ گرتنەبەری چەندان رێوشوێنی دیكەی پێویست بۆ جێبەجێكردنی ئەم ئەركە.

لە (٢٦)ی ئابی (١٩٨٨) هەریەك لە پێشمەرگەكان پێداویستییەكانی وەكوو خواردن و خواردنەوەی خستە ناو هەگبەكەی و بە پشتی دا و ئیتر تیمی ئێمە بەڕێكەوت.

راستییەكەی پەڕینەوە لە رێگای كۆیە زۆر سەخت بوو، بەڵام دەبوو بەرەنگاری ئەم سەختییە ببینەوە و هەر چۆنێك بێ و بە هەر گیانفیدایی و ریسكێك بێت كە ئەگەر گیانی خۆشمان بۆی كردبێتە قوربانی، هەر دەبوو بۆ بەستی شەرخە بپەڕینەوە، چونكە ئەو كات رێگای كۆیە بێجگە لە رەبایەكان، هاوكات سەدان جاش و سەربازی زۆری رژێمیشی لێ جێگیركرابوو.

دوای وەرگرتنی تەدابیر لەناو خۆمان و مشتومڕكردنی پلانەكانمان و گەیشتنمان بە ئامانجەكان، توانیمان زۆر بە لێوەشاوەیی و لێزانییەوە بپەڕینەوە، كە گەیشتینە سنوورەكە، بینیمان سنووری بەستی شەرغە هیچ ئاوەدانییەكی لێ نەمابوو، تەنانەت كە ئەگەر پیادەكیشمان ببینایە دەبووایە خۆمانی لێ بشارینەوە، چونكە پاش پرۆسەی ئەنفالكردنەكان بوو و پێشمەرگە زۆر كەم ببوو، هەروەها زانیاریشمان هەبوو كە لەناو فەوجە (خەفیفەكان) چەند كەسێكیان دەنارد بۆ ئەوەی پێشمەرگە شەهید بكەن یانیش بە ساغی بۆیان ببنەوە، پاشانیش لە پاداشتی ئەم ئەركە قێزەونەدا مەفرەزەیەكی بدەنێ.

مەفرەزەكەی ئێمە كە لە ناوچەكەدا جێگیرببووین، بە مەبەستی پەیداكردن و دەستخستنی بڕێك نان و خواردن، ناچار دەبووین كە دەبوو بگەڕێنەوە شوێنی كۆنە بارەگاكانی خۆمان، چونكە بڕێكی زۆری خواردن و پێویستییەكانی دیكەمان لێ شاردبۆوە.

شەوی( ٣/٤ )ی ئەیلوولی ( ١٩٨٨) لە شوێن كۆنە بارەگایەكی پێشووی خۆمان هەر چۆنێك بێ بڕێكمان نان ئامادە كرد، بەیانییەكەی ( ٤ )ی ئەیلوول، ویستمان هەندێك لەو شوێنە دووربكەوینەوە، تراكتۆرێكی حزبیش لەوێدا مابوو مەبەستمان بوو ئەگەر چاك بكرێتەوە، بەئیشی بخەینەوە، بەڵكوو بۆ گەڕان و سووڕانەوەمان لە ناوچەكەدا هەندێك بارمان سووك بكات.

  • 1