بۆ سەرجەم جوتیاران و هاونیشتمانیانی خۆشەویست
لەگەڵ نزیکبوونەوەی وەرزی دروێنە و بەهۆی ئەو بارانبارینە زۆرەی ئەمساڵ کە بووەتە هۆی زیادبوونی پوش و پەڵاش لە دەشت و کێڵگەکاندا، مەترسیی ڕوودانی ئاگرکەوتنەوە زیاتر بووە. پاراستنی بەرهەمی ڕەنجی ساڵێکی جوتیاران و سەلامەتی ژینگەکەمان ئەرکێکی نیشتمانیی هەموومانە. هەر بۆیە، تایبەتمەندی ناوەندی جوتیارانی حزبی شیوعی کوردستان ئەم ڕێنمایی و داواکارییانەی خوارەوە ئاراستەی لایەنە پەیوەندیدارەکان و هاووڵاتییان دەکات:
🔺جوتیارانی خۆشەویست، هاونیشتمانیانی ئازیز، ڕێبواران و شۆفێرانی دەڕاسە؛
ئێستا لە وەرزی دروێنە نزیک دەبینەوە و ئەمساڵ بەهۆی بارانبارینی باشەوە پوش و پەڵاش زۆرە، بۆیە هیوادارین ئەم خاڵانەی خوارەوە پەیڕەو بکەن:
داوا لە برا جوتیارەکان دەکەین دەوروبەری محاویلەکانی کارەبایان لە کژوگیا و پوش و پەڵاش پاک بکەنەوە. ئەگەر کارەبا بەکارناهێنن، باشترە سەرچاوەی سەرەکیی (ڕەیسی) کارەباکە بکوژێننەوە.
داواکارین جوتیاران لەم وەرزەدا خۆیان لە ئاگرکردنەوە بە هەموو شێوەیەک بپارێزن.
برا جوتیارەکان، ئەوانەی تراکتۆریان هەیە، ئامادەکاری بکەن (بۆ کێڵانی دەوروبەری ئاگر) لە کاتی هەر ڕووداوێکی نەخوازراودا.
خاوەن دەڕاسەکان، بۆ هەر کارێکی چاککردنەوە یان لەحیمکردن، پێویستە دەڕاسەکانیان بەرنە ناو گۆڕەپانێکی پاک. هەروەها زۆر گرنگە هەموو دەڕاسەیەک ئامێری ئاگرکوژێنەوە و تەنکەری ئاوی لەگەڵدا بێت.
داوا لە پارێزگار و بەڕێوەبەرایەتییەکانی بەرگریی شارستانی دەکەین ئامادەکاریی پێویست بکەن بۆ هەر ئەگەرێکی نەخوازراو.
داوا لە شۆفێران و سەرنشینانی ئۆتۆمبێل دەکەین خۆپارێزی بکەن لە کێشانی جگەرە و فڕێنەدانی پاشماوەکەی (قاڵتەجگەرە) بۆ ناو دەشت و کێڵگەکان.
داوا لە پارێزگار و لایەنە پەیوەندیدارەکان دەکەین بۆ پاککردنەوەی قەراغی شەقامە سەرەکییەکان لە گیا و پوش، بە مەبەستی ڕێگریکردن لە کەوتنەوەی ئاگر.
تایبەتمەندی ناوەندی جوتیارانی حزبی شیوعی کوردستان
١١ / ٥ / ٢٠٢٦