کۆنگرە جەختی لە خەبات دژی فاشیزم و داگیرکاری کردەوە
حزبی شیوعی ئیسرائیل (ماکی) لە نێوان ١٢ بۆ ١٤ی شوباتی ٢٠٢٦ لە شاری شەفائەمر، بیست و نۆهەمین کۆنگرەی خۆی بە سەرکەوتوویی ئەنجام دا. کۆنگرەکە کە بە بەشداریی جەماوەرێکی فراوان و نوێنەرانی حزبە چەپەکان بەڕێوەچوو، بووە وێستگەیەک بۆ دووپاتکردنەوەی بنەماکانی فکری مارکسی-لینینی و داڕشتنی ستراتیژیی نوێ بۆ ڕووبەڕووبوونەوەی فاشیزم و پاراستنی مافی چەوساوەکان.
لەم چوارچێوەیەدا، دکتۆر سمیر خەتیب ئاماژەی بەوە کرد کە ئەم کۆنگرەیە نیشانەی زیندووێتی فکری کۆمۆنیستییە دوای زیاتر لە سەدەیەک لە تێکۆشان. ناوبراو ڕایگەیاند کە پارتی کۆمۆنیست تەنها یادگارییەکی مێژوویی نییە، بەڵکو هێزێکی سیاسیی کاریگەرە کە لە ناو جەرگەی ململانێکاندا دژی ڕەگەزپەرستی و سەرمایەداریی دڕندە خەبات دەکات. خەتیب جەختی کردەوە کە مانەوەی حزب لەم بارودۆخە سەختەدا، پەیوەستە بە پەیوەندیی ئۆرگانی لەگەڵ جەماوەر و پێداگری لەسەر هاوبەشیی ڕاستەقینەی خەباتی عەرەب و جوو.
کۆنگرەکە لە بەیاننامەی کۆتایی خۆیدا، زنجیرەیەک بڕیاری گرنگی پەسەند کرد کە تێیدا جەخت لەسەر سەرکەوتنی چەوساوەو خەباتی بێوچان بۆ کۆتاییهێنان بە داگیرکاری و نیشتەجێکردنی زۆرەملێ کرایەوە. بڕیارنامەکە ئاماژەی بەوە کرد کە لە سایەی گەشەسەندنی فکری زایۆنیستیی ڕەگەزپەرست، پێویستە یەکێتیی کرێکاران و تێکۆشەران لە دژی حکومەتی ئیسرائیلی پەرەپێ بدرێت بۆ بەدیهێنانی دادپەروەریی کۆمەڵایەتی و یەکسانیی جێندەری.
یەکێک لە خاڵە هەرە دیارەکانی ئەم سێ ڕۆژەی کۆنگرە، ئامادەیی بەرچاوی نەوەی نوێ و گەنجان بوو لە ناو ڕیزەکانی حزبدا. ئەمە وەک وەڵامێکی کردەیی بۆ قەیرانە ئابووری و سیاسییەکان وەسف کرا، کە تێیدا گەنجان بەدوای داهاتوویەکی دادپەروەرتردا دەگەڕێن لەژێر چەتری سۆسیالیزمێکی شۆڕشگێڕانە و دیموکراتیکدا. کۆنگرە بەو پەیامە کۆتایی هات کە تا ئەو کاتەی ستەم و داگیرکاری بمێنێت، ڕێکخستنی کۆمۆنیستی وەک پێویستییەکی مێژوویی بۆ ڕووبەڕووبوونەوەی نادادی دەمێنێتەوە.