عومەر خدر كاكیل
دوای دابڕانێكی درێژ لە نووسین وبڵاوکردنەوە، چیڕۆكێكی نوێی (دیدار مەسیفی) لە گۆڤاری ڕامان ژمارە (٣٢٥) بڵاو كرایەوە، نووسەر لەم چیڕۆکەیدادەیەوێ بەراوردێكی نێوان نەوەكان و ئەم سەردەمە و سەردەمێک پێش ئێستامان بۆ بكات.گێڕەرەوەی چیڕۆكەكە،برازاكەی كە نەوەی ئەم سەردەمەیە لەگەڵ خوشكە گچكەكەی و خوشكە گەورەكەی و خۆشی بەراورد دەكات، هەر لە بیركردنەوە و هەڵسوكەوتیان تا دەگاتە جۆری ژیان و گوزەران و ناو ماڵیان، هەرچەندە برازاكەشی هەندێ خەسلەتی جوانی نەوەی پێش خۆی تێدایە، هەر لە بیركردنەوە و ڕیزداری و ئارامیەكەی تا دەنگ خۆشیەكەی، كەچی جیاوازیش هەر هەیە،ئاخر ئەم سەردەمە تیژڕەوە بەهۆكاری ئەو هەموو ئامێرە ئەلیكترۆنی و بەرنامە زیرەكە، وشە نوێ و بێهەستانە لە چەشنی"ئایفۆن و درۆن، ئەمازۆن و بیت كۆین تاد...*" ژیانی زۆران خەریكە بێتام دەكات، لەکاتێکدا ژیانە سادە و ساكار و پڕ موحیبەتەكای جاران بە وشەی پڕ چێژتر ژیانیان ئاوەدان دەكردینەوە، لە چەشنی "سەردان، میوان، جیران و ژیان و باوان تاد...". ئەوەتا گێڕەرەوەی چیڕۆكەكە، كە دەچێتە ماڵی خوشكە گەورەكەی كە هەرگیزئاوی شێخی باڵەکیان لێ نەدەبڕا، ئێستا ئەو ئاوە سازگارەش لەناو پەرداخی پلاستیكی هاوشێوەی ئاوی ناو پەرداخە پلاستیكیەكانی تر تام و چێژ و سازگارییەكەی و جارانی نەماوە.
ئەو چەند ڕستەیەی لاپەڕەی دووەمی چیڕۆكەكە زۆر سەرنجی ڕاكێشام كە دەڵێ: "من هەمیشە ئارەزوو دەكەم گیرفانێكم لە نزیكی پێیەكانم هەبێت و ئایفۆنەكەمی لێ دابشارم. بەو نیازەی بە سانایی بۆی نەلوێت زوو زوو بە خۆیەوە مژووڵم بكات و لە ژیانی ڕاستی دامبڕێت." ئاخر زۆر ڕاستە ئەو ئایفۆنە نەك هەموومانی لە ژیانی ڕاستی دابڕیوە! بەڵكو خەریكە دەمانكات بە ئامێر، من زۆر جار بیر دەكەمە و دەڵێم: ڕەنگە من و زۆربەی ئەو خێزانانەی وەك ئێمەن، بەهۆكاری ئامێرە ئەلیكترۆنیەكان و تۆڕە كۆمەوڵایەتییەكانوە، سەرەڕای كات بەفیڕۆدان و ئاڵودەبوونی منداڵ و گەنج و پیر پێیانەوە، هەموو ئەو بەها جوانانەی پێشتر باو بوون خەریكەلەلایان لاواز دەبن، هەروەها ئەو ئامێرانە لە لایەكی تر داهاتێكی زۆرت لێ دەبەنبێئەوەی بتوانی دەستبەرداری بیت، بۆنموونە خێزانێكی شەش كەسی لە ماڵەوە شەش مۆبایلیان هەبێ ئەگەر هەر یەكەی مانگێ بایی 10 هەزاردیناریەكە تێ بكات، ئەوا 60 هەزار دینار دەكات و 40 هەزار دیناریش بۆ هێڵیئەنتەرنێتی ماڵەوە ئەوا دەبێت بە 100 هەزاردینار! دەی ئاخر دەبێ پێش هەموو خەرجیەك ئەم سەد هەزار(دینار)ە دابنێیت!.
گێڕەرەوە لەم چیڕۆكەدا هەر لە ڕێی برازاكەی و ئایفۆنەكەی دەستی ئاشنامان دەكات بە زانای ئەمریكی بەڕەگەز سڕبیی (نیكۆلای تێسلە)، ئەو زانا داهێنەرە بەژن درێژ و ڕێك پۆشتەی كە ئۆتۆمۆبیل دەیكوژێ، "دوای تێپەڕینی نزیكەی سەدەیەكیش مۆدێلی ئۆتۆمۆبیێلكی پاتری ناوازە و گرانبەهای بەناو دەكرێت،"گێڕەرەوەی چیڕۆكەكە "كە ڕەنگە نووسەر خۆی بێ" تا ڕادەیەكی باش شارەزای ژیان و داهێنانەكانی تێسلەی زانا بوو، بەڵام لە ڕێگای برازاكەی زانیاری وردتری گوێ لێدەبێ كە بۆ ئەو زانیاری نوێ و پێشبینی نەكراوبوون! ئەوەتا برازاكەی دەڵێ: "تێسلە پیاوێكی پشت ڕاست و سەر ڕاست و ڕێگە ڕاست بووە! تێسلە بەدرێژایی ژیانی لە ئەمریكا لە نێو جەنجاڵی و ناشرینییەكدا كە بە دۆلار پەردەپۆش كرابوو ویژدانی گەلێك بە پاكی ڕاگرت."ئاخر ئەو ئەمریكایەی مرۆڤی زانا و دانای زۆربەی وڵاتە ناسەقامگیر و دواكەوتەكانی بۆ خۆی ڕاكیشاون تا سوود لە توانا و داهینانەكانیان وەربگرێت، كەچی دۆلاری زۆر و ژیانی باش، ژیانی ئەو زاناو داهێنەرانەی ئاسوودە نەكردوە و ئەوەتا تێسلا (تێسڵە) لە كۆتاییەكانی ژیانی بەتەنها لە هۆتێڵێکگیانی لەدەست دەدات و دوای سێ ڕۆژ ژنێكی پاكەرەوە بە مردنی دەزانێ.تێكەڵكێشكردنی ژیانی ئەم زانایە لەگەڵ ژیانی برازای گێڕەرەوەی چیرۆكەكە و خوشكەكانی ئەوەمان پێ دەڵێ: كە جیهان بوەتە گوندێكی بچوك و لە ڕێگای ئایفۆنی دەستی، مرۆڤ دەتوانێ شارەزایی و زانیاری لە زۆر بابەت بەئاسانی بەدەست بێنێ! بەڵام لەولاشەوە ژیانە سادە و ساكار و پڕ موحیبەتەكەی جارانیشی لێسەندوین..
من بەهۆی تێكەڵاویم و نزیكیم لە نووسەر (دیدار مەسیفی)، دەمێكە هەستم بەوە كردوە و زۆر جاریش لە خۆیم بیستووە، كە ئەو هەردەم ڕێكەوتی سەیر و چاوەڕوان نەكراو و بە بەردەوامی دێنە پێشی، ئەو ڕیكەوتانە بوونەتە بەشێكی دانەبڕاو لە ژیانی، بۆیەش بەردەوام لە نووسین و چیڕۆكەكانی گرنگی بەو پێشهاتانە داوە و ئیشارەتی پێ كردوون و تەوزیفی كردون لە نووسین و چیڕۆكەكانی. هەروەها نووسەر وەك هونەرمەندێكی دەستڕەنگینیش بەردەوام بە دەستكاری كردن و پارچە پارچەكردن و هەڵگلۆفاندنی پاشماوەی خواردنەكان و بەرگ و سیمەكانی قەپاغی ئاو، تابلۆی بچوك و ناواخن گەورە و جوانی دروست كردون و سەردەمیكیش ئەو كارانەی لە پەجی (وێناوە) بڵاو دەكردنەوە، بۆیەش دەبینین ئەو ئارەزوەشی لەم چیڕۆكەیا تەوزیف كردەوە، ئەمەش جوانیەكی تری بە چیڕۆكەكەیا بەخشیوە..
*دیدار مەسیفی لە شارەدێی مەسیف سەلاحەددین لە دایك بووە، ئێستا لە كەنەدا دادەنیشێ.
خاوەنی دوو ڕۆمان و كۆمەڵە چیڕۆكێكی چاپكراوە، لەگەڵ چەندین بەرهەمی چاپ نەكراو:
- ئیلشا - ڕۆمان-2009
- تەمۆخ – رۆمان - 2017
- قەلەمە پاركەرەكەی باوكم - كۆمەڵە چیڕۆك - 2015