شەماڵ بارەوانی
بەیانی
لەگەڵ دەنگی یەکەم ترپەی هەناسەی غوربەتدا،
لەگەڵ دەرکەوتنی گزنگی خۆر،
دێمەوە.
دێمەوە و
وەکوو جاران سروودی پێکەنین بۆ کچە عازەبەکانی دێ دەچڕین و
ئێوارەی شیعرمان پڕ دەکەین لە خەونی ئاشقانە.
دێمەوە و
ئامێزت دەکەم به سەرین و
ئەو تیۆرە پۆچەڵدەکەینەوە کە باس لە ئاوابوون دەکات.
دێمەوە و
لە نزیک دووڕیانی بێ ئومێدی، نەمامێک بۆ پەیمان دەڕوێنین و
لە پێدەشتی دابڕاندا کانی بیرەوەرییەکان دەژییێنینەوە.
دێمەوە و
لە هەواری جێژواندا
زیوانی ئازار لە دەفتەری چاوەڕوانی بژاردەکەین
و
خۆمان لە هەراسان خاڵی دەکەینەوە
دێمەوە و
قافیەی حوزن دەشکێنین
و
ئیتر ڕەها ڕەها دەبین.