سەلام عومەر
15
لەسەر هەرمێن
لەژێر سێبەری گابەردێ
رێک بەرامبەر
سەرتەپکان و باخچەی میرزا
لەنێو مەیدانی مەنگوڕان و کەندە دڵۆپ
دۆش داماوم
هێندە ماندووم
جارێک وێنەی خدری زیندەو
هەندێ جاریش
فرمێسکە سوور باوەکانی
)شێخ فەرخ و خاتوئەستی(
بەڵێڵی دێتە بەرچاوم
لەسەر هەرمێن
بەرامبەر شار خەو وەکو باز دەمفڕێنێ و
لە ئاسۆس خۆم دەبینمەوە
ئەویش دەیەوێ ونمکاو
بۆ هەمیشە و تا هەتایە
دنیای روناک نەبینمەوە
هەر لە خەودام
)دێوە شەلە(
دێت و بەزێیەم دادەدا
ئەویش پێڵاوەکانم دەباو
خۆشم هەڵدەداتە ئەو بەر
هێشتا ونم
هێشتا لەنێو خەوێکی قوڵ
نێو دەریایەکی بێبنم
)مەحمود قندۆڵ(
بەخۆ و بارگینە شەلەکەی پەیا دەبێ و
دەمباتە گوندی بنەوشان
لەوێش( شێخ خدری) لێیە
کەسێک بەدڵێکی سپیەوە
دوو دەست و ناخێکی سپی و
وەک کۆترێکی سپی دەنوێنێ
خەونە ناخۆشەکانم دەباو
دەمباتەوە ناوەندی شار
لەوێ لە باوەشی گەرمی
دایە (نەجیبە)م دەنوێنێ
*********
لەسەر هەرمێن
پاڵم بەدرەختێکی پیر داوە
خەو چاوەکانم شل دەکا و
شنەیەکیش رامدەژێنێ
لەخەونمدا
)لالی) مەستە و
بەدەستێکی دەستم دەگرێ و
بەوی دیکەش توند پیرەدار دەهەژێنێ
هاوار دەکاو دەڵێ هەستە
شارەکەمان هاوشاریان ناناسێتەوە
هەستەو سەرنج لە گۆڕستانی شار بدە
هێشتا شەهیدان (خالید و دایکە ئامینە و شەفیق و قوباد(ی هەر لە مێزدایە
کەچی هێشتا لەودیو دەربەند
قەڵادزێ گیان بیرکراوە و
هەر لە نێو پەراوێزدایە
هەستە خەو رابردوومان دەبا و
فەڕشی مەرگمان بۆ رادەخا
هەستە خەریکە قەدەرێک
شانۆ و
کۆڕ و
مەیخانەمان لێ دادەخا
******
هێشتاکە هەر لە هەرمێنم
بەدیار لوتکەکانی قەندیل
کە بوونەتە سەنگەرەکانی دوژمن
رادەمێنم
بۆ چۆڕە زێیەکەی خۆمان
کەپێشتر هەڵدەستا و کڵۆی دەکرد
لە خەمان خۆم دەچەمێنم
هێشتاکە هەر لە هەرمێنم
یا ئەوەتا کەسایەتی و
ئەکتەری راپەڕینەکان
لە خەوی قوڵ هەڵدەستێنم
یاخود منیش لە بناری ئەم کێوەدا
شیدەبمەوەو
بۆ هەمیشە جێدەمێنم.