مەغدید حاجی
سەلام عومەر دەڵێ:
" دایکم فانۆسێکی هەبوو
کارەبا کوشتی
٭ ٭ ٭
کە دایکم کوژایەوە
فانۆسەکە گریا
گریا
گریا
تا تاریکبوون "
دوای خوێندنەوەم بۆ دیوانە شیعری (دەڕژێمە منداڵیمەوە)ی سەلام عومەر ئەم نووسینەم لەدایکبوو
ئەز ڕەخنەگریی ئەدەبیات نیم بەڵام عاشقی ئەدەبیاتم، کە دیوانە شیعرێک یان کۆمەڵە چیڕۆکێک یان ڕۆمانێ دەخوێنمەوە کۆمەڵێک سەرنجم لا دروست دەبن، هەندێ جار لە چوار چیوەی وتارێکدا بڵاوی دەکەمەوەو هەندێ جاریش بڵاوی ناکەمەوە.
دوا بە دوای خوێندنەوەی تەواوی دیوانە شیعرییەکەی هاوڕێ سەلام عومەر ئەم وتارەم نووسیوەو پێشکەش بە هەموو ئەو هاوڕێ ئازیزانەم دەکەم کە دەمخوێننەوە!
بۆچوونێک هەیە پێی وایە، پابەندبوونی ئەدیب یان هونەرمەند بە حزب و ئایدیۆلۆژیا لە بەهرەی ئەدەبی و هونەری و داهێنانی کەمدەکاتەوە. بەڵام لە سەدەی ڕابردوودا زۆر لە شاعیرو هونەرمەندە سیاسییە بە هەڵوێستەکانی کورد، وەکو : ( عەبدوڵلا گۆران،هەژارو و هێمنی موکریان،دڵدارو دڵزاری کۆیەوکوردستان،جەمیل ڕەنجبەری شەهید، تەها خەلیل و دیلان و سلێمان شاکری هونەرمەند، کاکەی فەلاح و د. عیزەدین مستەفا ڕەسوڵی داهێنەر)...هتد، لە کاروانی خەباتی گەلەکەیان ، لە حزبایەتی و سیاسەتیش دانەبڕابوون، لە هەمان کاتدا داهێنەربوون.بەڵام نەدەبوونە دۆگماو کۆیلەی حزب و ئایدیۆلۆژیا.بۆیە لە بواری داهێنانی ئەدەبی و هونەریدا زۆریان پێشکەشکرد.
نموونەی دیکەشمان لە کاروانی ئەدەبیاتی گەلان زۆرە،کە هەرگیز سیاسەتکردن و ئایدیۆلۆژیا ،نەبوونەتە کۆسپ لە ڕێگای داهێناندا.نموونەی وەکو مەکسیم گۆرکی و نازم حیکمەت و بابلۆ نیرۆدا ...هتد
سەلام عومەر 40 ساڵ دەبێ شیعر دەنووسێ و بڵاودەکاتەوە،زیاتر لە 30 ساڵیشە وەکو ڕۆژنامەنووس بەبێ پچڕان ، بەبێ ئەوەی چاوی لە پاداشت و مووچەی چەوربێت، بە هێمنی، ڕۆژانە لە ڕاگەیاندنی حزبی شیوعی کوردستان کاردەکات،ئەندامی مەکتەبی ناوەندی ڕاگەیاندنە، ئەرکی سەر شانی ڕادەپەڕێنێت.. ئەو دەڵێ ئەمن لە تەک ئەرکی ڕاگەیاندن ساڵی کتێبێک بە چاپبگەیەنم پێم لە هەموو پۆستێک باشترە.
من سەلام عومەر بە یەکێک لە شۆڕەسوارەکانی بواری ئەدەبیاتی کوردی دەبینم، ئەو ماوەی ساڵانێکی زۆرە، بە هۆشیارییەکی بێگەردی نیشتمانی و میللەت پەروەری، بە زمانێکی ئەدەبی جوان و پاراو، بە هەستێکی ناسک، بە کوردییەکی پاراو، شیعر دەنووسێ، ڕۆمان و چیڕۆک دەنووسێ، لە هەر سێ بواردا ئەسپی خۆی تاوداوە،بەرهەمەکانی دەخوێنرێنەوە، بە دواداچوون و ڕەخنەیان لەسەر دەنووسرێت..
کاک سەلام توانیویەتی لە میانی بەرهەمە چاپکراوەکانیدا مێژووی ناوچەکەیان، کەسایەتییە جوانەکانی دەڤەرەکەیان،ڕووداوە تراژیدیاکانی پشدەرو بیتوێن،ڕانیەو قەڵادزێ، دیرۆکی خەباتی سیاسی و پێشمەرگایەتی حزبەکەی نیشتمانەکەی، ڕووی جوانی کەلەپووری کوردەواریمان ، ژیان و بەسەرهاتەکانی خۆی و دەوروبەری بە خۆشی و ناخۆشییانەوە،هەموو ئەمانە و زیاتریش ڕاستگۆیانە وەکو ناوەرۆکێکی دەوڵەمەند لە ناو چوارچیوەی دەقە ئەدەبییەکانیدا ڕاستەوخۆ یان ناڕاستەوخۆ جێبکاتەوەو بەرجەستەیان بکات و لە ئەنجامدا بەرهەمی ئەدەبی جوانمان پێشکەش بکات و کتێبخانەی ئەدەبیاتی کوردیش دەوڵەمەند بکات.
بێگومان هیچ بەرهەمێکی نووسراویش، هیچ کتێبێک بەدەر نابێت لە کەمو کوڕی، ڕەخنەگری ئەدەبیش مافی خۆیەتی بە هەردوو ڕووی ئەرێنی و نەرێنی مامەڵە لەگەڵ بەرهەمەکانی بکات و هەڵسەنگاندنیان بۆ بکات.
بەندەش لەگەڵ خوێندنەوەی ئەم دیوانە شیعرییە(دەڕژێمە منداڵیمەوە) ڕژامە ناو هۆنراوەکانی، هەست و نەست و تابلۆ شیعرییە جوانەکانی. ڕژامە سەردەمی منداڵی و هەموو قۆناغەکانی تەمەنی، ڕژامە ناو دەربڕینی شاعیرانەی، ڕەخنەی شیعری،خۆشەویستی بۆ دایک بۆ دڵخواز،بۆ هاوسەر، بۆ نیشتمان و بۆ گەلە ستەمدیدەکەی..
لەم دیوانە شیعرییەدا وێنەی شیعری جوانم بە دیکرد، ڕژامە ناو هەستەکانی شاعیرێکی ڕاستگۆی نیشتمان، شاعیرێک لە یەک کاتدا مرۆڤێکە لە مەیدانی کارو خەباتی بەردەوامە،لە هەمان کاتدا لە بواری داهێنانی ئەدەبێ بەردەوام بەرهەم لە دوای بەرهەم بە زمانێکی کوردی پاراو بە خوێنەران دەبەخشێت.
هیوای بەردەوامی و تەمەندرێژی بۆ دەخوازم.
با بە دوو کۆپلە هۆنراوەی ئەم دیوانەی شاعیر سەلام عومەر کۆتایی بەم نووسینەم بێنم:
(دەڕژێمە منداڵیمەوە
ئەو نوقورچەی دایکم بیردەکەوێتەوە
کە لەسەر دەستبردن
بۆ شەکرلەمەی ڕەسوو بێچوو
لا ڕانێکی شین کردمەوە
نوقورچێک
دەستمی بە بەتاڵی هێشتەوەو
دایکیشم پارەی پێنەبوو
تا منداڵیم ژیرکاتەوە)
٭ ٭ ٭
(دەڕژێمە منداڵیمەوە
هەرگیز ئەو شریقەیەم بیرناچێتەوە
کە خاڵە[نورەدین]م
لە نێو قاپە ستیلەکەیدا کوڵاندی و
وەک دووپشک لە منی دا
شریقەیەک...
زوو منی هەستاندەوە
حەزمدەکرد خاڵم ماباو
هەمان شریقەی لە حزبەکەی منیش داباو
هەر وەکو من هەستاباوە)!
هەولێر 6ی ئابی 2025