رێگای كوردستان
بڕیارە مانگی ئەیلولی ساڵی داهاتوو یەكەمین فێستیڤاڵی فیلمی سەرئاوەڵای ئاسمان، تایبەت بە بواری هونەری و گەشتیاری لە مهاباد لە رۆژهەڵاتی كوردستان بەڕێوە بچێت.
بەگوێرەی راگەیەندراوێكی بەشی راگەیاندنی یەكەمین فێستیڤاڵی فیلمی سەرئاوەڵای ئاسمان،
فێستیڤاڵەكە بە ئامانجی بەرەوپێشچوونی ئاستی هونەری سینەما و رۆشنبیری و كەلتووری ناوچەكە و هاوكات راكێشانی هۆگرانی گەشتیارییە لە مهاباد و سنوورەكە.
بڕیارە فێستیڤاڵەكە بۆ ماوەی ٤ رۆژ لە گۆڕەپانی سەرەكی شاری مهاباد بەڕێوە بچێت و هەموو ساڵێكیش لە هەمان مانگدابەڕێوە بچێت.
بەگوێرەی راگەیندراوێكی ئینستیتۆی فیلمسازی لاوان، بەرهەمەكان هەموو شەوێك لە شوێنی سەرئاوەڵای گۆڕەپان و ناوچەی سەرەكی شار 'گۆڕەپانی مەنگوڕان' پێشان دەدرێن و میوانانی ئامادەبووش ئەو گەشتیارانەنكە لەكاتی بەڕێوەچوونی ئەم رووداوە سینەماییە سەردانی شاری مهاباد و ناوچەی موكریان دەكەن.