کراسی هاوینە،
گۆیەکانی لێ دیارە؛
دار هەنار!
__
قەتارەی خالبەندە،
لە گۆنای ئاسمان دەدرەوشێتەوە؛
گەلە ئەستێرە!
__
خورپەی عەشقت،
لەسینەم بێدارە؛
کاتژمێری دڵم!
__
بگاتە کەنار،
شەپۆلی ماچی دەڕژێ؛
دەریا!
__
لە لێوی خونچە،
ماچێکی جێماوە؛
بزە!
__
کۆلارەی سوور،
لەسەر رووی مانگ نیشتەوە؛
جێماچی گەردەن!
__
دوای مەرگی زەردە پەڕ،
کراسەکەی ڕەشکرد؛
شەو!
__
دووا نیگای ئێوارە،
چرای خامۆش دەکا؛
هاتنی شەو!
__
لە ئاوێنەی دەریا،
تاڵە قژ شانە دەکا؛
خۆر هەڵات!
__
ونبونی خۆر،
جاڕدانی شەو؛
داخستنی چاوەکان!
__
ئارەقەی گەردەن،
لەسەر سینگی گۆزە دەڕژێ؛
فرمێسکی کانی!
__
بەربەستی نیە،
بەربێتەوە دەکەتە سەر لێو؛
ماچەکانت!
__
با هەڵیدا،
گەڵای دار و داوی پرچ؛
لە شەرما زەرتر بوو لیمۆ!
__
لە گۆشەی دڵم،
ئینفرادێکی تەنیایە؛
دڵت!
__
لە خەلوەتگای عەشق،
بەوێردی ماچ زکردەکا؛
لێوی دوو ئەویندار!
———
هەناسەیە،
دڵم پێی دەژیت؛
خۆشەویستیت؟
————-
ستیانیان رەشە،
بۆنی خەردەلیان کردووە-
سیوەکانی هەلەبجە٠
—————
لە عەڕعەڕ هاتۆتەوە.
مەپرسن خەلکی کێیە؛
ناسنامەکەی گەرمیانیە!
__
ناوێری قورئان بخوێنی.
لەوە ترساوە؛
بگاتە سورەتی ئەنفال!
————
لەجێگای مۆم،
چرای سینە هەڵدەکەم:
جەژنی لە دایکبوونت!
————
مۆم نا بەشعلەی سینە،
شەو ڕووناک دەکەم؛
یادی لە دایکبوونی تۆیە!
————
بە نیگای عەشق،
برینەکان تیماردەکات؛
پەرستا!
هاڤان محمەد