سەلام عومەر
ووردبونەوەم لە جەستەی تۆ
جمكانەی دوو كاتی دژن
بۆیە لێكدانی نیگامان
بروسكەی هەورو تەم و مژن
* * *
جاران سەرنجت لە ڕووی من
رژابووە نێو حەزێکی نوێ
وروژانێکی شێتانەت
لەخوێنمدا دێنایە سوێ
* * *
لە دوا دیداریش بزانە
دوورنیە لێوت بتەزێنم
ئەگەر دەستم بەنەرمی خزی
بزانە سینەت دەترازێنم
* * *
ئێستاش حەزدەكەم لە ژوانا
چەناگەو لێوی لەرزۆكت
بەدەم ڕاگرم و متت كەم
بەدەست خستنە نێو بەرۆكت
* * *
ئەوەتانێ چاوی دڵم
پێڵوی ئارامی لێكنانێ
شەو و رۆژ لە بۆسەدایە
بۆ دیدەنی و ساتی ژوانێ
* * *
گەردەشتەوێ وەكو ئەوسا
تەتەری هاوڕازت زووبێ
دەبا ئەوجارەش شیلەی دەم
خۆراكی خوای ئارەزوو بێ
* * *
ئەوسا دەزانی نهێنی
خۆشەویستی لە كوێدایە
لێكدابڕان و ئاشتبونەوە
چ لەزەتێكی تێدایە .