بەشی٣٧
هەرگیز نەیتوانی بۆمان دایکێکی میهرەبان بێت
بێخاڵ: چیتر خولیای ئالوودەبوون بە وڕێنەم نەما.
ڕێزان: ئەوە جگە لە چاوەڕوانییەکی گۆدۆیانە چیتر نییە و دەزانم مانەوە و ڕۆیشتنەکەیشم هەردووکی هەرعەدەمە.
سەیران: ئەی بەدیل؟
بێخال: ئنتیحار!
بێخاڵ: من و خەم دوانەیەکی دانەبڕاوین.
سەیران: کە مردم لەسەر گلکۆکەم بنووسن: بویە هات بۆ ئێرە، تا شکست بە عەبەس بدات.
ڕێزان: دەزانم لە ڕاکردنێک بۆ ڕاکردنێکی تر زیاتر نییە.
بێخاڵ: دەی مردن دەسا بە ئشتیاوە هەڵم مژە.
سەیران: لەوەتەی بەبیرم دێ هەر کراسی عەبەس لەسەر بەردی پووچگەرێتی هەڵدەخەم و جگەرەی خەم دادەگیرسێنم.
ڕێزان: ئەو زەوییە پڕە لە دڵ تەنگی و من
چیتر بەرگەی پێوەڕینی ئەو هەموو قەڵەقییەناگرم.
بێخاڵ:بە ژیان بڵێن با بێدەنگ بێت.
سەیران: بەڵێ ئەو هەرگیز نەیتوانی بۆمان دایکێکی میهرەبان بێت.
ڕێزان: هاوڕێیان، من شێت نیم نا، بەڵکو دەمەوێ ڕەهابم ڕەها.
بێخاڵ: نزای هیچ دایکە شەهیدێکیش نەیتوانی بیوەستێنێ!
سەیران: من نازانم خودا بۆچی بێدەنگە خودا؟
بێخاڵ: دەی لێی گەڕێن باهەر پێمان بوەڕێت،
ڕێزان: من دەزانم، ئەوە پیشەیەتی خەم.
سەیران: سنوور دەست پێبکە.
بێخاڵ: ئیتر خەجاڵەتی دەکەم بە میدال و لە بەرۆکی بوونی دەدەم.
ڕێزان: با تاریکی تونتر بەخۆیەوە بمانگوشێت و زیاتر لەو زەڵکاوەی مرۆڤ ڕۆبچین.
سەیران: کچینە ئەوە بۆ هەست بە هیچ ناکەم؟
بێخال: ئەها بیرم کەوتەوە،
ڕێزان: ئەو نهلیستە خەونێکی منداڵیمان بوو.
سەیران: کەواتە بێدەنگی بەدیل نییە؟
بێخاڵ: هەرنەمزانی ئەو ئەو عەزابە زۆڵ و بەربەره،
خۆڕسک و زگماک بوو یان دەستکردی سروشت!
ڕێزان: دەی با عەدەم قافیەی تەمەنمان بشکێنێت و غەرقی خۆییمان بکات.
سەیران: چ چەتەیەک بوو ئەو ئازاره سەگبابە،
بێخاڵ: وا بەهێز ڕۆحی شێلاین!
ڕێزان: پیف!
سەیران: چی بوو؟
بێخاڵ: ئەو وجودە سەرسەرییە فیزی چیمان بەسەرەوە دەکات!
ڕێزان: من جگە لە هێڵنج و قەڵەقییەکانم لە هەموو شتێک بەریم.
سەیران: گریمان وەرزێکی تریش بێت،
بێخاڵ: دڵنیام کەسێک نابێت دەستی خەمەکانمان بگرێت و لێمان تێبگات.
ڕێزان: دەی کەواتا ئەی بوون، بێ منەت بە و بە دڵی خۆت تاراوگە لە نیشتمانی ڕۆحمان بڕوێنە و عەزابمان دەرخواردە.