ئەکتەرەکان/ئاری+ڕەقیبی ژمارە پێنج (مەلا عەونولڵا)
شوێن/گرتوخانەی قەعقاع
پەردەی یازدەهەم
بەشی٤٨
ئایین دیاردەیەکی کۆمەڵایەتییە
ڕەقیبی ژمارە پێنج: تۆ گوتووتە ئایین دیاردەیەکی کۆمەڵایەتییە؟
ئاری: بەڵێ.
ڕەقیبی ژمارە پێنج: یانی تۆ ئاسمانیبوون لە ئایین دادەڕنیت؟
ئاری: بەڵێ.
ڕەقیبی ژمارە پێنج: چۆن؟
ئاری: ئەو هەزاران ئایینەی کە هەن، هیچیان ئاسمانی نین و خوداوەند خاوەنی هیچیان نییە.
ئەوکەسانەی ناویان لە خۆشیان ناوە پەیامبەر، بەشێکیان بەرژەوەندیخواز و ساختەچی و بەشێکیان عاریف و بیرمەند و بەشێک ڕیفۆرمخواز و بەشێکیان شۆڕشگێڕ و یاخی و بەشێکیشان دڵسۆز و هەرهێندەیان لەوەزعەکە زانیوە و وایان زانیوە خودا قسەی لەگەڵ کردوون و پەیامی پێداون و وەک پەیامبەرێک هەلبژێردراون !
ڕەقیبی ژمارە پێنج: ئەی خودا مرۆڤ دروست کات،
نابێت پەیامبەر و پەیامیش بنێرێت بۆی و سیستەمی ژیانیان بۆ ڕێکبخات؟
ئاری: ئەی کەواتە سوودی ئەقڵ چییه؟
تۆ پێم بڵێی وا بکە و وا بڕۆ بۆ تەوالێت و وا بخەوە و وا بیربکەوە و وا ڕێگا بکە و وا سێکس بکە. سیاسەت و سیستەم و نەزمی کۆمەڵایەتیشت با وا بێت.
ئەی بۆچی ئەقڵی پێداینە کەواتا؟
خۆ خوداوەند مرۆڤی قورمیشکرا و ڕۆبۆتۆی دروست نەکردووە. بەڵکو ئەقڵی داوەتە مرۆڤ ئەقڵ.
خۆ ژاپۆن و ئۆروپا، ئایین بەڕێوەی نابات، لەوێ سەنتەر ئەقڵ و بیرکردنەوەیە بیرکردنەوە.
ڕەقیبی ژمارە پێنج: یانی تۆی کافر، لە خودا باشتر دەزانیت چی باشە و چی خراپە؟
ئاری: کاکە مەلا، من وام نەگوتووە. بەڵکو دەڵێم خوداوەند ئەقڵی بە مرۆڤەکان داوە و مرۆڤ لە ڕێگای ئەقڵەوە دەتوانێت خودا بدۆزێتەوە و شتەکان بناسێت و لە گەردوون تێبگات.
ڕەقیبی ژمارە پێنج: یانی پەیامبەران زیادەن؟
ئاری: هیچ پێویست بە پەیامبەر و شت ناکات و ئەقڵی هەرکەسێک پەیامبەر و ڕێنیشاندەری خۆیەتی.
ڕەقیبی ژمارە پێنج: ئەستەغفیرەلڵا.
ئاری: چیبوو کاکە مەلا!؟
ڕەقیبی ژمارە پێنج: کفر هەیە لەوە گەورەتر؟
ئاری: لەچی؟
ڕەقیبی ژمارە پێنج: لە ڕەتکردنەوەی پەیامبەران.
ئاری: من لەوەتەی لە تۆنێلی جەهالەت هاتوومەتە دەر و لە خەوی غەفلەت و لە غەیبووبەی فیکری هۆشیاربوومەتەوە، چەمکی کفرم لە فەرهەنگی خۆم فڕێداوە.
لەگەڵ دەنگی چەپلەی ئامادەبووان، پەردەکە دادرێتەوە.