بەشی ٤٩
پەردەی دوازدەهەم
شوێن: دادگا.
ئەکتەرەکان: ئاری(کارمەند)+ ڕەقیبی ژمارەسێ(دادوەر).
پڕم لە خودا و خاڵیم لەخۆم
ڕەقیبی ژمارەسێ: تۆکەسێکی زندیک و بێباوەڕیت و خەریکی بڵاوکرنەوەی فیکری ئیلحادیت.
ئاری: ئێوە له ڕوانگەی ڕق و چەقۆ و شمشێرەوە سەیری ژیان دەکەن و بوون وەک سەربڕخانەیەک دەبینن !
ئێمە لە ڕوانگەی عیشقەوە شتەکان دەبینین و گەردوون وەک جوانترین تابلۆ سەرنج دەدەین. تابلۆیەک، کە لەلایان باشترین نیگارکێش(خوداوەند)و بە جوانترین شێوە دروست کراوە.
ڕەقیبی ژمارەسێ: بەڵام تۆ کفرت کردووە و لە ئایینی ئێمە تەنها سێ ڕۆژ مۆڵەت بۆ هەڵگەڕاوە لە ئایین هەیه. گەر کەسی موڕتەد تۆبە نەکات و نەگەڕێتەوە، ئەدرێت لە ملی و سەری لە لاشەی جیادەکرێتەوە.
ئاری: ئێوە جگە لە زمانی شمشێر، لە هیچیتر تێناگەن !
ڕەقیبی ژمارەسێ: هیچ ناچارنیم چیتر گوێ له قسەی کافرێک بگرم و بە زمانی گوڵ لەگەڵ له موڕتەدێک بدوێم. کافر دەبێ بە زاراوەی گوللـە ڕووبەڕووی ببیتەوە و بە شمشێر بدەیت لە گەردنی.
ئاری: من لە کوێ کفرم کردووە؟ تۆ شیعرەکەی منت خوێندووتەوە؟
ڕەقیبی ژمارەسێ: نەخێر.
ئاری: ئەی؟
ڕەقیبی ژمارەسێ: خەڵکی وادەڵێن.
ئاری: خەڵکی سەریان دای لەبەرد. بۆ چما حوکمی قەرقوشە، تا خەڵکێکی ناهۆشیار و نا ڕۆشنبیر بێت و سنوور و مەرج و ڕێگا و بت بۆ نووسەر و ڕۆشنبیر و خوێندەوار دابنێت و پێی بلێت ئەوە بنووسە و ئاوا بنووسه، ئەوە مەنووسە و ئاواش مەنووسه!
ڕەقیبی ژماره سێ، دەی لەوە زیاتر کاتمان نەگرە و ئیمزای ئێرە بکە.
ئاری: ئیمزای چی؟
ڕەقیبی ژمارەسێ: ئیمزای ئەوەی جارێکیتر کفر نەکەیت لە شیعر و شتە قۆڕەکانت.
ئاری: هەرگیز، ئەو مەمەحاڵە.
ڕەقیبی ژمارەسێ: بۆچی؟
ئاری: گوتم مەحاڵە.
ڕەقیبی ژمارەسێ: گوتم ئیمزای بکە. بۆتۆمە و ئاقڵ بە، گەرنا دواتر سەرت بە فەتارەت دەچێت و پسوولەی لێخۆشبوون ناتگرێتەوە.
ئاری: ئەوە ئێوە بەچی حەقێک دادگایی ئێمە دەکەن؟
ڕەقیبی ژمارەسێ: بۆچی؟
ئاری: لەبری ئەوەی من لە شوێنی تۆ و تۆ لەشوێنی من بوایتا و ئێمە ئێوەمان بە تاوانی بڵاکردنەوەی بیری توندڕۆیی و دەمارگیری ئایینی و پەتای مەزهەبی و جەنگی ئایینی تا حەوسەد پشتتان دادگایی بکردبوایە، کەچی ئێوە هاتوون و ئەقڵانییەت و شیعری ئازاد و لۆژیک و فەلسەفە و ڕۆشنبیر و ڕۆشنگەری دادگایی دەکەن ! ئەفسووس، لە جێی شێران، ڕێوی دەکەن گێران.
ڕەقیبی ژمارەسێ: دەم هەراش، دەتوانم هەر ئێستا کاسێک گووشت دەرخواردەم و لێرە بتتۆپێنم.
ئاری: دەتوانی بە تۆمەتی بێبڕوایی و دژایەتی کردنی بتەکان، هەمان شێوەی سوقرات، کاسێک ژەهریشم بدەیتێ.
ڕەقیبی ژمارەسێ: دەی چیتر کاتمان مەکوژە و درێژەی پێمەدە و ئیمزایەکەت بکە.
ئاری: دەزانی چی؟
ڕەقیبی ژمارەسێ: چی؟
ئاری: ئێوە کافر و خواپەرستن، ئێوە پڕن لە خۆتان و خاڵین لە خودا. من خواناسم خواناس. پڕم لە خودا و خاڵیم لەخۆم.
ڕەقیبی ژمارەسێ: هەستنەوە.
هەموو ئامادەبوانی دادگاکە هەڵدەستنەوە.
ڕەقبیبی ژمارەسێ: بیسم اللە الرحمن الرحیم.
ئەسسەڵات و وەسسەلام عەلارەسولیهی ئەلئەمین.
ئەمما بەعد.
تۆمەتبار(ئاری)ناسراو بە کارمەند، بە تاوانی بێبڕوایی و چەندین تاوانی تر، هاتەسزادان بە مەرگ.
لەگەڵ دەنگی اللە اکبر و چەپلەی ئامادەبووانی هۆلەکە، پەردەکە دادەرێتەوە.
