بەشی(٢٨)
دەرپێی حــوزن
بێخاڵ:شەوێکی پڕپڕ لە تاریکیم.
ڕێزان: لەتێکم لە فۆغان.
سەیران:عەزابەکانم بەقەد قەڕنێک گەورەن.
بێخاڵ:من"ئێستا لە قورئانی سەرتاقچەی ماڵە ژنە سۆزانییەک تەنیاترم(٭)
ڕێزان:هێندە تەنیام، ڕێک دەڵێی خودام.
سەیران:نەیبرژێنین؟
بێخاڵ:چی؟
ڕێزان:خەمەکانمان.
بێخاڵ:نەخێر.
سەیران:دەی هەر بە کاڵی دەیخۆین.
بێخاڵ:دەست بۆ نووسینی هەر شیعرێک دەبەم،
سەیران:وشەکانم هەڵدەوەرێن.
بێخاڵ:ئەلحەدە ئەم گەردوونە!
ڕێزان:بەهەرلایەک خۆم ڕاتەکێنم،
سەیران:بەردی قەدەرێکی بێشەڕەف بەر پەراسووی خۆزگەکانم دەکەوێت.
بێخاڵ:خەمەکان بە شەپۆل سەنگەریان لێگرتووم.
ڕێزان:خودایە، ئەم هەموو هێڵنج و
سەیران:ئەم هەموو قەڵەقییە چییە؟
ڕێزان:جاڕز (کــــەرە) بوون.
بێخاڵ:من ناتوانم چیتر هاودەمی ژان بم.
ڕێزان:ئێمە لە لێواری کەوتێکی حەتمی داین.
سەیران:دەی با ستیانی ئازار فڕێدەین و دەرپێی حوزن داکەنین.
بێخاڵ:بەڵی، با جیهان چیتر تەنها بۆ قەحپەکان بێت.
ڕێزان:ئاخ، چ غوربەتێکە ئەم بوونە.
سەیران:چی لە تەرمی ئەو هەموو حەسرەتانەمان بکەین؟
بێخاڵ:با مۆمیایان بکەین.
ڕێزان:نەخێر، لە گۆڕستانی سینەمان دەیان نێژین.
سەیران:لەوانە ڕۆژێک تێبگەن.
بێخاڵ:لەچی؟
ڕێزان:لەو عەبەسیەتەی ئێمە.
بێخاڵ:ئاخ"ونم، ونم، لەخۆم ونم
وڵاتێکم پڕم لە غوربەت
دڵم پێکێک شەرابی حەسرەتە
لە نێو تەنیایی خۆم ونم
لەم دنیا فراوانەدا
ڕۆح لەبەردێک
گوێ لە خەمی من ناگرێ(٭)
سەیران:چەندخۆش دەبوو گەر ئەو هەسارەیه لە مرۆڤ خاڵی بوایه.
ڕێزان:دەی با بدەین لە شەققەی باڵ و دوور بۆ ئەو قەحپەستانەی بوون بفڕین؟
بێخاڵ:بەچی بفڕین؟
سەیران:خەیاڵ.
ڕێزان: ئێمەش بڕێجار زۆر فانتازیک و ئایدیاڵیستگەراین.
بێخاڵ:چاک گیرمان خواردووە بەدەست ئەم هەموو قەحپەیه.
سەیران:ئەی بوون، تۆ بێ ماناترین قەحپەبوویت کە ناسیومی.
ڕێزان:کچینە بێدەنگ بن.
سەیران:چی بوو دیسان؟
بێخاڵ:قەحپەیەکی تر هات.
لەگەڵ دەنگی بەهێزی چەپڵەی ئامادەبوان
پەردەکە دادەرێتەوە.
-------------
٭بەختیار عەلی.
٭دیوانی کەسان، عومەر عەبدولکەریم، چاپی یەکەم، ل٣٩-٤٠.