خدر گوڵانی
بەدیار تریفەی، مانگی ڕوخسارت
خەو هات و خزا سەر، پێڵووی چاوم
وەکو شەکەتیی ڕێگایەکی سەخت
هەناسەم سوارو شل بوون هەنگاوم
بیرم ئاڵۆزە و نیگام کز بووە
هێندەی ڕامێنم لەجەوری گێتی
دەروونم کەیلی خەم و کۆڤانە
هاکا هەڵمگرت شوهرەتی شێتی !!
چاوەڕێی ناکەم بۆم بێتە گۆچان
دارێک دانەیێ بە تەڕی و شلکی
کەباڵای کردو لە خۆی بوغرا بوو
بۆ تەورێک باشە، ببێ بە کلکی
هەر پێڕەوکە بووم کەوتمە ژێر باری
خەمی خاکێکی بێکەس و خاوەن
بازرگانەکان بست بە بست فرۆشتیان
بە دراوی قوڕسی دۆلارو پاوەن
بزانە ئەوەی دوو ڕکات نوێژی کرد
خەڵوەت نشین و عیرفانی نیە
بشبیتە خاوەن گەنجینەی قاڕوون
کە مردی کفن گیرفانی نیە
نیشتمان دۆستی درۆی سیاسەتە !
تەلار نشینان پێمان دەفرۆشن
لای ئەوان تەنها بازاڕی نەوت
لەبرەو دابێ، دامان دەدۆشن
ڕۆژێک فرۆشیاری گردو تەپلکەن
ڕۆژێک جوگڕافیا ژێر خان و سەرخان !!
هەر کەس کڕیار بێ بێتە پێشەوە
زوو تاپۆی ڕەشی بۆ دەکەن تەرخان