خدر گوڵانی
ئێواران پێشی زەردەپەڕ
ئەڵقە ئەڵقەی مێوی حەزێکی شێت
چڕنووک لە خەیاڵم گیر دەکات،
بەسەر ڕشانەوەی بەرسیلەی،
عەشقێکی ناکامدا خلۆر دەبمەوە
بۆ ناو خەرەندی فیڕاق و لەبیر دەچمەوە !!
هەناسەکانی ئەو هەموو چاوەڕوانیەم،
وەک شۆڕابەی هەورێکی پایزی،
بەسەر دووندەکانی بیرەوەریمدا دەکشێن
تۆ هێشتا لەزەینی مندا چڵە ڕەیحانێکی
تەڕیت، بۆن و بەرامەت چوار دەورم بەرنادا
تۆ هێشتا قەسیدەیەکی درێژیت و،
هەر دەتنووسمەوەو ناگەمە کۆتاییت !!
حبری سەدان پێنووسم تەواو کرد
تۆ هەر تەواو نابیت و لەهەستم دەئاڵێی !!
ئێوارانێک دەستت دەخەیتە
ناو خوڕەی چەم و کانیاوەکانی ئۆخژنم
من هەر بینت پێوە دەنێم تینوێتیم ناشکێ !
هەندێجاریش لەخۆر هەڵاتەوە هەڵدێی وەک گەردیلەکانی ناو تیشکی خۆر
لەکڵاو ڕۆنەی ئەندێشەمدا
تیرۆژ، تیرۆژ دێیتە ناو ژووری تەنیاییم
تۆ تێناگەیت و نازانی
کونج و کەلەبەرە تاریکەکانی دڵی من
چەندە تامەزرۆی هەتاون؟
ناخم بووە بە گێڵگەیەکی دوورە باران و
تازە گاسنی عەشقێکی پەژموردە
ناشێ ئەم بەیارە بکێڵێت و
دووبارە وەردی داتەوە
مەگەر کراسی ئەو قەسیدە سەوزەم بپۆشیتەوە کە لە وەرزی،
بەهارێکی تەڕدا بۆم نووسیبووی
حوزەیرانی ٢٠٢٣