سارا فەقێ خدر
بەھەورە ناوەختەکان بڵێ، لەگرمە نەکەون
تا بارانی پەیڤەکان تەڕم کا
با پەیڤەکان نم..نم ببارێن و
بۆنی گڵی رۆحت ھەڵمژم
نا، با بەخوڕ ببارێن
تا رۆحی شەقار..شەقارم شەڵاڵ دەبێ
زەمەنێکە ئاڵای تەوارم ھەڵکردووە و
بێئاگا ، عیشق تیرۆر دەکەم!
لەم پاییزە خامۆشەدا
حەزم لە ڕامانی سەر گەڵا وەریوەکانە و
تەرزەی پەیڤی سەوز ، بەڕێژنە داکا
تا جەستەی بووکەشووشەییم
پاک.. پاک بشوا و
ڕەنگی فریشتان بگرم
لەگەڵ تیشکی چاوانت تێکەڵ بم و
ببین بە پارچەیەک لە نوور
ئاوابین و ئەم زەمینە شێوێنراوە جێبێڵین!
لەم پاییزی تەمەدا
لەسەر گەڵا وەریوەکان دانیشتووم
ئەژنۆم وەک سروودەکەی دڵم، لە ئامێز گرتووە
لەگەڵ ئاوازە ھێمنەکانی ڕادەژێم !
**