سەلام عومەر
وەك سێوێكی قەپاڵ لێدراو
لایەكی جەستەم گەنیوە
كەسێك تفم دەكاتەوەو
كەسێكیش دەمكاتە نیوە
* * *
درەختێكی رۆخ روبارم و
لافاو دەورەمی تەنیوە
خاوەنەكەم لە دوورەوە
چاوی لە كەوتنم بڕیوە
* * *
وەكو سێوێ وەك درەختێ
قەت رەشەبا نەیكەواندووم
وەلێ ئێستا شلوشەكەت
هەستدەكەم گەلێ ماندووم
* * *
دەستاڕێكی لێكەوتووم و
هەرتایەم لەنێو دەستێكە
لەنێو دوو زۆندا كەوتووم و
پێویستیم بەتوانای كەسێكە