بەهرە هەولێری
کێ نیشتیمانی من دەناسێ ؟!
نیشتیمانی من..
کێوێکە بەرز و خۆڕاگر
نا..
دەشتێکی فراوانە
هەندێک جار
وشک و گەرمە
وەک هاوینی قەراج
هەندێک جاریش
تەڕ و پڕ گیا.
نا..
دەشتێکی تەخت و پانە
وەلێ هێندە ساردە..
گەرمی ڕوومەتەکانیشم
بۆخۆی دەبات..
* *
کێ نیشتیمانی من دەناسێ؟!
نیشتیمانی من
کێوێک نیە..
دەشتیش نیە..
نیشتیمانی من
سینگی پیاوێکە..
مەگەر تەنیا بەخەیاڵ
پێی بگەم و
هەر بەخەیاڵ
شەوێک تا بەیانی
خۆم بخزێنمەوە باوەشی و
سەری ماندووم بحەسێنمەوە.
ئەوسا هەرگیز
کەس ناتوانێ
گلەیی لە ساردی من بکات...