نیوسەدەیە...
دەقی فەرەیدوون سامان
نیو سەدە بە گـژ مەحاڵدا چوومەوە
نیو سەدە لە تەمەنی بەدبەختیم
بە ڕێ کرد،
خەونی منداڵیم هەر لە بێشکەدا هەڵبزرکا..
گەنجێتم خوێنی چۆڕاوی بەرخێکی سەربڕاو بوو
لەبەردەم قوربانگەی نەریت و خورافەدا...
نیو سەدەم لە حەسرەتی زیندان و
داستانی ئاوارەیی بە جێما..
نیو سەدە دەروێشانە لە نێو حەلقەی زیکری عاشقاندا حاڵم گرت
بە نێو کێڵگەی بە مینچێنراوی چەتەکانی سیاسەتدا
تێپەڕیم،
ئەمێستاش تەرمی خەونەکانم
لە کۆڵی خۆم ناوە
بەرەو ونگەیەک ڕێم گرتووە
خێڵی ڕیاکاران بەردبارانم دەکەن..