قه‌ڵه‌می ئه‌وین

1

به‌ قه‌‌ڵه‌می خه‌مگینی پاییز 

له‌ سه‌ر گه‌ڵا نووسیم تۆم خۆشئه‌ویست 

هێنده‌ له‌ باڵای تۆ ئاڵام تا دواجار 

له‌ باوه‌شی من هه‌ڵوەرایت

2

به‌ قه‌ڵه‌می ته‌ڕی باران 

له‌ سه‌ر سینه‌ی كێڵگه‌ نووسیم تۆم خۆشئه‌ویست 

هێنده‌ به‌ گوڕ باریمه‌ سه‌ر دڵی گه‌رمت 

تا دوا تنۆكت هه‌ڵمژیم 

3 

به‌ قه‌ڵه‌می هاژه‌ی ڕووبار 

له‌سه‌ر ڕوخساری ده‌ریا نووسیم تۆم خۆشئه‌ویست 

هێنده‌ به‌ تاو هه‌ڵڕژامه‌ ده‌روونته‌وه‌ 

تا ونبووم و بڕامه‌وه‌ 

4 

به‌ قه‌ڵه‌می گه‌رمی هه‌تاو 

له‌سه‌ر ڕۆحی به‌فر نووسیم تۆم خۆشئه‌ویست 

هێنده‌ به‌ كوڵ به‌ ناو خوێنی تۆ هه‌ڵپژام 

تا بۆ ئه‌به‌د توایته‌وه‌ 

5 

به‌ قه‌ڵه‌می ناسكی په‌پووله‌ 

له‌سه‌ر گڕی مۆمێ نووسیم تۆم خۆشئه‌وێت 

هێنده‌ هاتمه‌ ناو چاوته‌وه‌ هه‌ڵكروزام 

تا دواجار توامه‌وه