شێركۆ بێكەس لە مردن گەورەترە

زیرەك كەمال

دە ساڵ پێش ئێستا شێركۆ بێكەسی شاعیری گەورەی كورد دەرگای ژیانی بە یەكجاری لەسەر خۆی داخست‌و بەناو تونێلی تاریك‌و گەوەو پێچاوپێچی مەرگدا گوزەری كرد، بە مردنی شێركۆ بێكەس قۆناغێك لە شیعری كوردی كۆتایی هات‌و سەرەتایەكی غەریبی‌و كەساسی لە شیعردا دەستی پێكرد، شێركۆ بە مردنی هەموومانی خستەسەر سارایەكی روون‌و خاكە دێمێكی وشكەڵانی ترسناك، چونكە مەرگی ئەو پیاوە  لەگەڵ خۆی شیعریشی فڕێدایە ناو پایزی غوربەت‌و نامورادی، بەڵام مەرگێك جوانتر لە ژیان‌و نەمر وەكو جوانی، چونكە شێركۆ بێكەس كاتێك رۆیشت كە چوار وەرزی ساڵی ئێمەی كردە بەهاری جوانی‌و سەرزەمینی وڵاتی كردە گوڵاڵەی زمان‌و سەوزەڵانی ئەدەب، شێركۆ بێكەس بە وزەو هێزی مەعریفەو رستە‌و خاڵا‌و بڕگە زمان ریزێك چرای عەقڵانییەت‌و رۆشنگەری لەسەر تاق‌و دیوار‌و ژوورە تاریك‌و نوتەكەكانی یەكەیەكەی ماڵەكانی نەتەوەكەی پێكرد‌و ئاوەدانییەكی یەكجار گەورەی بەدونیای كتێب‌و زمان‌و فەرهەنگ‌و رۆشنگەری ئێمە بەخشی، بۆیە مەرگی ئەو شاعیرە مەزنە سەفەرێكی جەستەییەو ماناو ناوی مەرگی كلاسیكیانەی بەسەردا ناسەپێت، مەرگی جەستەیی شێركۆ بێكەس بۆ من كۆست‌و شكستێكی گەورەبوو چونكە بە شانازییەوە دەیڵێم من لە نزیكەوە پەیوەندییەكی بەهێزی كۆمەڵاتیم لەگەڵ ئەو شاعیرە مەزنە هەبوو، لە دەیان بۆنەی تايبەتی دوو قۆڵی لە خزمەتی دانیشتووم، لە رەنگ‌و سەر‌و سیمای شیعری ئەوم روانیوە، چێژم لە قسەكانی‌و ئەزموونی شیعری تەمەنی ئەو وەرگرتووە، ئاخر شێركۆ بێكەس قسەی ئاسایشی دەربڕین‌و شێوازێكی شیعریانە بوو، هەر كاتێك لە سلێمانییەوە بهاتبا هەولێر دوو رۆژ پێشتر تەلەفۆنی بۆ كردم‌و لە هاتنی خۆی ئاگاداری دەكردم‌و هەر بۆ گاڵتەو جەفەنگ‌و بەدەم پێكەنینەوە دەیگوت تۆ‌و هوتێلم حجزكردووە، چونكە دەبوایە بەردەوام بۆ هەر كوێیەك بڕۆیشتبا، لەگەڵیدابم، شێركۆی مەزن چەند لەسەر ئاستی زماندا هەڵكۆڵینی كرد‌و سەدان وشەی پەراوێزخراوی زمانی كوردی لە فەوتان دەربازكرد‌و سەدان وشەی نوێشی خستە دووتوێی زمانی شیرینی كوردی، چەند لەسەر ئاستی شیعریدا داهێنانی گەورەی كرد‌و چەند دیوانی شیعر خستە ناو كتێبخانەی كوردی ئەوەندەش لەسەر ئاستی پەیوەندی كۆمەڵایەتیدا پاك‌و راستگۆبوو شێركۆ هەموومانی خۆش دەویست تووڕەبوون‌و هەڵچونەكانی كاتی بوو، بەڵام لەو یەك دوو ساڵەی پێش مەرگیدا لە نیشتمان‌و نەتەوەكەی تووڕە بوو تووڕەبوونێك پڕ لە جوانی‌و خۆشەویستی بۆیەش دیوانێكی شیعری بەناوی ئێستا كچێك نیشتمانمەی بە چاپ گەیاند، شێركۆ لەم دیوانەدا بە زمانێكی ئەفسوناوی ئەدەبی پێناسەی قۆناغێكی سیاسی كوردستانی كرد.

ساڵێك بەر لەوەی مەرگ زەفەری پێ‌ ببات لە دانیشتنێكدا پێی گوتم فڵان كەس كە شاعیرێكی دیاری كوردە چەندین ساڵە لە من عادزەو قسەم لەگەڵدا ناكات منیش هیچم بة خۆم شك نایەت‌و بە پێچەوانەوە  ئەوم خۆش دەویست، من لە قسەكانی ئەو شاعیرە ئەوەم خوێندەوە كە دەیەوێت لەگەڵیدا ئاشت بێتەوە، منیش دواتر هەموو هەوڵێكی خۆم خستەگەڕ بۆ ئەوەی پەیوەندی شێركۆی مەزن‌و ئەو شاعیرە بخەمەوە سەر راستەڕێی ئاشتبوونەوە، بۆ بەدیهێنانی ئەم ئامانجە شێركۆ بە هەموو شێوەیەك هاتەپێش‌و هەموو ئامادەییەكی دەربڕی، بەڵام بەداخەوە لایەنی بەرامبەر بەوپەڕی رق‌و كینەی چاخەكانی كۆنی ناو پەیوەندییە كۆمەڵایەتییەكانی عەشایەری رووبەڕووم بوویەوەو خۆی لەمە دزییەوە، ماڵئاوا شێركۆ بێكەسی مەزن، تۆ نەمری‌و مردن هەرگیز دەرەقەتی تۆ نایەت.