محەمەد چۆمانی
لێرە ئینسان شەقکراوە
لاق و دەستی راستی
لە زۆنی زەرد و
لاق و دەستی چەپی
لە زۆنی سەوز هەڵواسراوە
لێرە ئینسان کەرتکراوە
نیوەی دڵی لە سلێمانی
نیوەیکەی دی لە هەولێر
هۆڤیانە
لەسەر جادە فڕێدراوە
لێرە ئینسان رووتکراوە
باخەڵ، نان، پرێسکەی
لە تخوبی سەوز و
زەرد دا
لە حەشارگە و بانق دانراوە
لێرە ئینسان شکێنراوە
مێشک و رۆحی
هیوا و ئیرادەی
کەرامەت و زاخی
خەسێنراوە
لێرە هەر ئینسان نا
خاک، نیشتمان، ئاسمان
شەهید، مێژوو، خیانەت
هەرچی هەیە
نیوە بە نیوە
وەکو سێوێ بەشکراوە