قوبادی جەلیزادە
ژنان،
خودایان لە خۆیان و
لە مێردەکانیان و
لە منداڵەکانیان خۆشتر دەوێ.
پیاوان،
نیشتیمانەکەیان لە خوداو
ڕەوەزە شاخیان لە بەردەڕەش و
کانی بناریان لە بیری زەمزەم خۆشتر دەوێ.
دوو دڵم لەوەی پیاوان پێ بنێنە بەهەشتەوە
لێ؛
لەچوونە بەهەشتی ژنان دڵنیام.
پیاوان،
سوێند بە سمێڵ و
بە شەرەف و
بە تیخی خەنجەر دەخۆن
ژنان،
بە بەرماڵی پەیامهێن و
مەرقەدی حەزرەتی غەوس و
بە شمشێری ئیمامی عەلی.
دڵنیام ژنانی میهرەبان
دەستی پیاوە گوناهبارەکان دەگرن و
لەگەڵ خۆیانا دەیانبەنە بەهەشت